70

شوية رغي مع نفسي

طيري يا طيارة طيري يا ورق وخيطان
بدي أرجع بنت صغيرة علي سطح الجيران
وينساني الزمان ......... علي سطح الجيران

بالرغم من أني وأنا صغيرة مكنتش بعرف أطير طيارات ورق لا أنا ولا أي حد من أخواتي وكنا كل صيف بنكتفي بأننا نراقب الطيارات الورق اللي في السما اللي بيطيروها ولاد الجيران.
وبالرغم كمان اني عمري ما عرفت أي سطوح غير سطوح بيتنا لأني معنديش الأوبشن ده اللي هو الجيران – مش لأني عايشه في صحرا – لا أني طول عمري في حالي وايام طفولتي كان البيت مليان اولاد وبنات من سني يعني عندي اكتفاء ذاتي وبشجع المحلي .
بس عندي رغبة قوية أوي الأيام دي ارجع بنت صغيرة ارجع لزماااااااااان ارجع لسطوح بيتنا – بيت العيلة – اقعد فوق اعلي حيطة واحس اني قربت من السما اراقب العصافير واحلم اني يوم هاصحي الاقي نفسي بقيت عصفور واطير اطير والف كل حتة واشوف العالم كله اللي بقرا عنه في الكتب.
عندي رغبة اطلع علي الحيطة العالية وراقب السحاب ويحكيلي حكايات السحابة دي زي الملاك لا بقت بنوتة صغيرة لا بقت ولد بيلعب بالكورة.

ودي شبه الساحرة الشريرة اللي في الحدوتة لا بقيت الذئب الشرير اللي عاوز ياكل ذات الرداء الأحمر لا بقت موجه بحر ومشيت .
ودي شبه عروسة البحر لا بقت جمل مسافر في الصحرا لا بقت راجل عجوز مكشر.
ودي ودي وساعات وساعات وانا مع السما الدنيا هاتضلم والشمس هاتمشي ماما تندهلي علشان مقعدش في الضلمة لوحدي
انزل واستني الليل علشان القمر هايطلع , القمر جنبة نجمة بعيدة بس بتاعتي صحبتي بكلمها وتكلمني بكتب انا وهي شعر ونرسم صور وتحكيلي حكايات.

طب بلاش ارجع علي السطوح طب ارجع احلم زي زمااااااان , احلم بعيون مفتحين احلم بالدنيا الواسعة احلم ببكرة بتاعي والونه بألواني ارجع اسافر في الأحلام اشوف بعقلي واختار حلمي ارجع ابقي زي سندباد ولا علاء الدين مش عاوزه المصباح ولا عاوزه اركب السجاده المسحوره بس أي حلم والسلام.

طب عاوزه اقولي حاجات كتير اقولي العبي اكتر وافرحي اكتر اقري اكتر مش هاتلاقي وقت تقري , قصي شعرك الطويل علشان هاتكرهيه وبرضة خاتخليه , اتغيري اسرع وخليكي اقوي , افضلي حبي الدنيا ومتبطليش كتابه , حاولي تتعملي تحكمي علي الناس صح.

عاوزه اقولي ........... اقولي عمري ما هيطلعي جناحات ولا هاطير , اقولي وطي سقف طموحك علشان ميعذبكيش , اقولي خلي حاجات كتير وخلي حاجات اكتر حاولي تتعملي تطيري الطيارة.
وفي الأخر هاقولي متخافيش كله هايعدي.

علي الهامش
أنا مش داخلة علي حاله اكتئاب ولا ناوية اكتئب مجرد حاله عابره أنا بس وحشتني.


Siguiente Anterior Inicio