انت دلوقتي في 3 إبتدائي في البريك ( كان سعتها اسمها فسحه ) وعبد الرحمن واحد من اطول تلاتة في المدرسة اسمر بلون البرونز – بموت في اللون ده ومش موجود في مصر كتير – شعر بني فاتح وعيون عسليه يقترب بابتسامه واسعه
- ميلا يا ميلا ( يعيني ميرا يا ميرا )
- انا في فرح ممزوج بالخجل نحم يا حبد اللحمان ( نعم يا عبد الرحمن )
- انا كبتلك سوكلاته بابا جابهالي امبالح اكلت واحده وكبتلك واحده ( انا جيتلك شوكلاته بابا جبهالي امبارح اكلت واحده وجبتلك واحده )
ابصله وانا عيني هاتطلع عليها وامد إيدي في فرح - ويستوقفني شيئا ما – واطرق في حزن ( علي الشيكولاته طبعا )
- ميلسي يا عبد اللحمان مش عاوزة ( ميرسي يا عبد الرحمن مش عاوزه )
- ليه يا ميلا دي حلوه خالث وبابا بيقول مثتولده ( ليه يا ميرا دي حلوه خالص وبابا بيقول مستورده )
- اصل انا حيانه الدكتور قال مش تاكلي سوكلاته علشان حندي حساسيه ( اصل انا عيانه والدكتور قال متاكليش شوكلاته علشان عندي حساسيه )
يبص عبد الرحمن في الأرض ويرجع الشيوكلاته لجيبة ويسيبني ويمشي تصاحبه موسيقي حزينه زي التايتانك ساعه مكانت بتغرق
بعدها بيومين عبد الرحمن في نفس المكان بيدي الشيوكلاته لكريمان التي تقبلها بمنتهي الفرح وداعا عبد الرحمن
قطع
-----------------------------------------------
تتعامل انت مع الصدمه عادي وتقول لو راح راجل في الف راجل والواحد لازم يختار راجل بحق وحقيقي ممكن يتحمل ويكون متين وسعره مناسب علي اساس انك بتشتيريهم من سوق الموسكي مثلا
وروحي يا ايام وتعالي يا ايام وخلاص كبرت بقي ودخلت الإعداديه وخد عندك فلاش باك
قاعد انت برضة في البريك ( كان لسه اسمها فسحه ) وبجوارك اولي صديقاتك مع تجربه الأنتيم في أولي مراحلها
- ميرا اتفضلي يا حبيبتي
- ايه ده ؟
- كيكه ماما عملاها وعملت حسابك معايا
امسكها واقربها بحذر لآنفي واسألها بتشكك فيها بيض ؟
- ترد وهي بتبلع الكيكة بالحاجة الساقعه وشكلها محشورة في زورها - اه طبعا
- ارجعها بسرعه للعلبة ميرسي مش عاوزه
- ليه اوعي تكوني بتقرفي ، لا والله دي ماما نضيفة جدا وحاجاتنا نضيفه والله
- لا ياسيتي مش كده
- (هي بشئ من التأثر) لا شكلك قرفانه والله دي ماما زي الفل واسألي فلانه وعلانه
- والله مش قرفانه
- (تمد الكيكه في وشي وبلهجه آمره) طيب كلي
- يادي المصيب يا ستي لاء عندي حساسيه مش باكل بيض
وهنا تبدأ في البكاء حساسيه يعني ايه حساسيه قولي بقي انك خايفة من حاجتنا انا الحق عليا ان فكرت فيكي وعملت حسابك
- ياناس حد يفهما اني مش ينفع اكل بيض وإلا هاعيا واقضي باقي اليوم في عياده المدرسه
لا ثم لا ثم لا وطبعا لأنك ظاهريا زي الحصان ومبتشتكيش من حاجه ومش شايل معاك علاج ولا بتروح للدكتور كتير ولا مامتك بتيجي تشحت عليك قصدي توصي عليك والنبي خلي بالكم منها اصلها عيانه فانت بالطبع سليم معافي
والنتيجه تودع تجربه الإنتيم من قبل ان تبدأ وربنا يخلي ليكي شيمو واللي يخرج مع حد غير اخته يستاهل اللي يجراله
قطع
-----------------------------------------------
وروحي يا ايام وتعالي يا ايام وكبرت حبه كمان وبقيت في ثانوي وياتري يا عبد الرحمن عامل ايه في قطر دلوقتي ؟؟؟؟؟
المهم ها انت واقف قبل طابور الصباح وعند الكورنر اللي عصابتك محدداه انه تيرتوري إيريا ( منطقة نفوذ ) مع محمد عبد المحسن وهو شاب طويل شعر اسود وعيون بني غامق توحي بالغموض
- ثباح الخير يا ميرا
- صباح الخير يا ميمو
- معاكي ثندوتشات ايه انهارده ؟
- لا خلاص كلتهم في الطريق وشربت حاجة ساقعه شويه كده لما اطلع الفصل هاطلب فطار
- طب كويث قوليلي بقي هاتخدي في البريك مثتر لونج ولا ماندولين ؟
وهنا اقع في حيص بيص , يادي الوقعه السودا نوعين الحلويات المسموح بتداولهم في المدرسه علي حسب قرار اللجنه العليا اللي انتدبها الكبير للكانتين لتحديد الحلويات اللي هانتعامل فيهم ( كانوا بيتغيروا كل سنه مع انتخاب كبير جديد وعليه فقد مررنا من المستر لونج للماندولين لدادي للبوب كورن للمصاصات بنكهه الكوكا والفراوله وانتهينا بعدوي اللبان للدرجه التي اضرت مديره المدرسه من منعه في الكافتريا )
- لا يا ميمو انا هاخد بوب كورن او كوووول
- (يبصلي كده في نظره ممزوجه بالإندهاش والإستغراب) ايه ؟
- (انا بشئ من التردد) ايه اه عادي هو احنا لازم نمشي بسياسه القطيع لازم نبقي شخصية مستقله ونختلف ونتميز و.......و.........
بعدها بيومين ميمو في الكانتين بيشتري اتنين مستر لونج واحده له وواحده للبنت ندى بتاعه تانيه رابع
بعدها بيومين كمان ندي في البريك وشكلها بتتخانق مع ميمو وحولين عنيها كدمه زرقا – في حد فتان راح قال لطنط مامه ندا ان ميمو بيروحها كل يوم لحد البيت – ايه الناس الشريرين دول ؟؟؟؟ نياهاهاهاهاهاهاهاهاه
قطع
-----------------------------------------------
وتمر ايام ثانوي وتدخل الجامعه اللي تعتبرها واحه الديمقراطية مفيش كبير ولا مقرر للأكل ومش مضطر تاكل حاجة عندك فيها شك ولا كل شويه تقول عندي حساسيه بلاش الطاقية ويبقي عندك اصحاب كتير كتير وبنات وصبيان وتبقي الدنيا بيس واخر حلاوه لكن دوام الحال من المحال
إظلام
-----------------------------------------------
وتتخرج من الجامعه وتتنقل من عمل لعمل وتكون الطامه الكبري انك تشتغل في شركة مفروشة موكيت طبعا الناس العادي هاتشوف انها حاجة شيك لكن بالنسبه ليا مصيبه سودا وطبعا كل يومين بتاخد اجازة مرضي بسبب حساسيه الفرو ويضطر مديرك انه يوصي الكير سيرفس انهم يغسلوه كل يومين فيكرهوك عمال الكير سيرفيس ويبتدوا يغلسوا عليك لأنك محملهم شغل زياده بتناكتك اللي ملهاش لازمه.
قتزهق وتسيب الشغل وتنتقل لأفضل مكان ممكن تتخيله واللي فيه زمايلك معظهم عندهم حساسيه ولأنك مميز جدا فانت بتتشارك معاهم في كل انواعها ، بين الفصول تشارك شيري حساسية تغير الفصول ، وفي الربيع تشارك هايدي حساسيه العيون الربيعيه وطبعا تبطل تلبس عدسات وتحط النضاره ، وفي الخريف انت مع ميمو وشادي في حساسية الصدر ، وانت طول السنه مع ساره في حساسيه الأنف وفي النهايه هنيئا لمستشفي الحميات.
النهاية