إمبارح كان معدنا في مستشفي فلسطين علشان نزور الجرحي الفلسطنين صاحبة الدعوة آبي مدونة كوكب آبي
اللي حضروا
قوس قزح
خالد همس الأحباب
أ / شريف مدونة شريف
ضياء Beautiful Mind
محمد عبد الغفار مدونة في العمق ...مكان للحرية
عاشقة النقاب نونو وزوجها وبنوتتها مريم
شمس النهار وبنتها آيات
مايكل مدونة michealitoo
وكمان كان في مشروع مدونة جميلة قوي اسمها دينا كانت مع مايكل إن شاء الله نقرالها قريب وبجد هي دي البنات اللي تفرح مش اللي عاوزين جزمة منتظر اللي عندي – دي مش نميمة انا بقولهم الكلام ده في وشهم – ما علينا المهم ان الحمد لله كان معانا حاجات كويسة تبرعات مادية وعينية وزورنا كل المرضي ومنهم علي سبيل المثال
رعد عصفور 10 سنين رعد من عيلة عصفور اللي آبي زارتهم في الإسماعيلية وكان يا دوب ابتدي يفوق ومكنش مستوعب حاجة وبيرد بالإشارة ولما سألت عرفت ان ده اول يوم يبتدي ياكل طبيعي
كان في ولد جميل وشقي اسمة احمد وعنده إصابة في دماغة بس الحمد لله بقي كويس عمره حوالي 7 سنين
وكان المصابين اكترهم شباب ومع ذلك معظمهم روحهم المعنوية عالية جداً وبيهزروا معانا وبيضحكوا وعاوزين يرجعوا فلسطين وفعلا زي ما اتقال احنا المفروض نتعلم منهم الصبر علي الإبتلاء والأمل
معظم الإصابات بتر في الساق أو القدم وإصابات في الصدر في ناس حالاتهم اتحسنت وناس برضة لسه شوية ربنا يتم شفائهم كلهم علي خير يارب
المهم بقي أن أ/ نصار واحد من مكتب العلاقات العامة اصر علي اننا نزور مريض اسمة أحمد ونسمع حكايتة اللي كانت ببساطة علي حد كلام والده ان احمد كان راجع من عند شباب المقاومة هو واربعه من اصحابة وقعت عليهم قذيفة قتلت تلاتة وانصاب اتنين احمد وواحد تاني وبعد ما اختفي احمد لمدة يوم بلغ والدة السلطات والصليب الأحمر وبعد غياب 3 أيام وإنسحاب القوات الإسرائلية ابتدي يدور في المستشفيات ولم يعثر عليه لكن عثر علي جثة مجهولة عبارة عن أشلاء مكنش واضح فيها غير جزء من وشها وكانت تشبة احمد ووجد مع الجثة هاتف أحمد المحمول وبعد ايام حاول هو وأسرتة التعرف علي الجثة او العثور علي أحمد وفي النهاية قبل الأمر الواقع واحتسب ابنه شهيد واستلم الجثة ودفنها واقيم سرادق عزاء وقامت حركة المقاومة بطبع بوستر علية صورة احمد وتسجيلة في الشهداء وبعدها بثلاثة أيام فوجئ والد احمد بأحد أصدقائة يؤكد لة ان احمد حي يرزق في مستشفي الشفاء تحت إسم محمد حجازي ذهب والد أحمد لغرفة العناية المركزة علشان يلاقي ابنة وحوالية اسرة محمد حجازي واللي رفضت تصدق إن احمد مش ابنها وكان احمد وقتها فاقد النطق وكل اللي بيقدر يعملة انه لما يشوف حد من اهلة يبكي وتدخل طبيب من المستشفي لحل الخلاف وطلب من العائلتين تحديد علامات في جسم ابنها وبالكشف علية اتضح انه احمد وإن الشهيد هو محمد حجازي لينتقل أحمد للعلاج في مصر وتقيم أسره الشهيد محمد العزاء في منزلها ।
الغريبة بقي بجد يعني إن والد احمد كان بيتكلم عن شباب المقاومة بفخر شديد ونفسي أسأل سؤال ليه مفيش مواطن فلسطيني عادي من اللي احنا شوفناهم بيقول حماس هي سبب بلاوينا مثلا زي ما البعض هنا بيحب يقول ؟ يارتني كنت سألتة
اقرا تفاصيل حكاية الشهيد الحي