62

أول تاج

دة أول واجب في حياتي البلوجية اجاوب علية ومع اني مليش في موضوع الواجبات والتيجان ده بس دة جالي من المدون عرفة الأسيوطي مدونة علي الطريق وبصراحة مينفعش اطنش لآنة عربون صداقة , يعني لو قبضت العربون هاخد باقي الحساب ومحدش يرفض النعمة ولا ايه وبهوذه المناسبة باقول من دلوقتي محدش يتعشم اني اجاوب علي واجبات وتيجان تاني ببلاش كدة , كلة بحسابة اه.
استعانا علي الشقي بالله .
1- ما أكثرَ شئ فعلتـَهُ وتركَ لكَ ألمًا نفسيًا ؟
سؤال صعب قوي هي حاجات كتير بس اخرها لما قررت أقطع علاقتي بصديقة ليا صحيح القرار كان صعب بس الأصعب خيانتها ليا وجرحها ليا .
2- ما أكثرَ حادثةٍ عامة ٍتركتْ لكَ جرحًا نفسيًا ؟
الحوادث اللي بتأثر فينا كتير بس حادثة الدويقة دي مأثرة فيا جداً حاسة اني حزنت بجد واتغميت قوي ربنا يصبرهم في مصيبتهم ويخلفهم أفضل منها اللهم أمين .
3- ما أكثرَ حادثة ٍ خاصة ٍ تركتْ لكَ جرحًا نفسيًا؟
حادثة انفصالي عن شخص كنت مرتبطة بيه الكلام ده كان من قريب بس كل ما يفوت الوقت اكتشف عمق جرحي .
4- هل تعيش ُ الآن قصة َحب ٍ تتمنى أنْ تنتهى بالزواج ِ ؟
لا طبعا انا لسة منزلة الستارة المحزنة عن القصة الأولي .
5- كيف َ ترى الآخرين َ ؟ كيف تحددُ علاقتـَكَ بهم ؟
انا اصلا بحب الناس وبحب اعرفهم و باخد الناس بحسن نية لحد مايثبت العكس.
الحدود بقي دي صعب احددها انا بتعامل بطبيعتي جدا او علي الأقل انا فاكرة كدة فمش بحط حدود بمعني حدود بسيب الوقت والظروف هما اللي يحددوا طبيعة علاقتي بأي حد اعرفة هاتبقي ازاي لا بيقرب مني وبثق فية لا بخرجة برة دايرة حياتي لا بيبقي في حدود المعرفة العادية وبس.
6- ما أكثرَ شئ ٍ يسببُ لكَ أحراجًا مع الآخرين ؟
حاجات كتير لآني بجد بحس اني بحرج نفسي كتير واحطها في مواقف محرجة يمكن لآني مش بتعامل بحرص قوي مع الناس او يمكن علشان بتعشم فيهم زيادة عن اللزوم بجد مش عارفة.
7- منْ هو أقربُ شخص ٍ إليك .؟ برجاء حددْ شخصًا مع عدم ِ الإلتزام ِ بذكرِ اسماء
لو كنت اتساءلت السؤال ده من حوالي شهرين كنت حددت , بس حاليا مفيش غير مجموعة مقربة من الناس اللي بحبها وبيتهيئلي انهم كمان بيحبوني.
8- ما هو حلمـُكَ لحياتـِك مستقبلا .؟ وما هو حلمـُك لوطنـِك ؟
مستقبلي فية احلام كتير قوي يارب احقق ولو جزء بسيط منها .
لوطني بقي احلام كتير بحلم ان الخير والحق والعدل يبقوا في كل مكان بحلم اني يوم مشوفش طفل نايم في الشارع ولا متسول , بحلم ان محدش يوم يشتكي من حق ضايع , بحلم أن بكرة يبقي فية مكان لأولادنا .
9- لمن ْ تمررَ الواجب .؟ ولماذا .؟
سؤال جميل وطبعا الجزء الشرير في نفسويتي بيقولي اني ادبس ناس بعينهم فية بس كان صعب عليا قوي
اقولكم اللي عاوزة ياخدة وكل واجب وانتم طيبين

62 قالوا رأيهم:

همس الاحباب

اجابة رائعة لتاج صعب بصراحة
بس كنتى موفقة جدا
وعجبنى قوى الجزء ده
لوطني بقي احلام كتير بحلم ان الخير والحق والعدل يبقوا في كل مكان بحلم اني يوم مشوفش طفل نايم في الشارع ولا متسول , بحلم ان محدش يوم يشتكي من حق ضايع , بحلم أن بكرة يبقي فية مكان لأولادنا .
تحياتى

غير معرف

التاج صعب اوى

و اجاباتك رائعه

ربنا يكرمك

سلامات

Diyaa'

جرعة صراحة عالية..ومثالية معقولة وخلصت الإجابة :)
ربنا يحققلك كل أحلامك بما فيها المثالية منها ..ومسألة الحدود تلقائيتها قد تفيدك مع ناس معينة ومع ناس تانية لأ للأسف ..فحاولي تاخدي كورس حدود بقي :))
kidding

blue-wave

ممممممممممممم
تاج صعب بصراحه
بس اجاباتك هايله
المهم
ماتبصيش للى فات
وخليكى دايما باصه اقدام
وربنا يوفقك

طلاب من أجل مصر

ملقتيش غير التاج ده تجاوبي عليه

ده اصعب تاج شفته ..ومحرج كمان

بس انتي (امراءة بعقل رجل)ولا زم تجوبي عليه بنفس اجاباتك دي

اجابات جمييله وصريحه

ربناا يوفقك ..ويرزقك باللي يستهلك

ِِAdem El-Mahdy

بجد اجابات رقيقة جداا

و دبلوماسية

وفقك الله لحياتك و مستقبلك

وبس

Ahmed Al-Sabbagh

يا تاجاتك الجامدة
واجاباتك الرائعة
دايما بقول عليكى متألقة والنعمة
كل سنة وانتى طيبة
اوعى ما تجيش يوم السبت

غير معرف

ميرا

الواحد فرح أوي لما عرف أن عندك

فرااااغ عاطفي .

ههههههههههههههههههههه


إجابات جميلة جدا


ربنا يكرمك يا ميرا

نيجووووووووور

مدحت محمد

كل واجب وانتى بالصحة والسلام

الواجب فعلا رخم بس انتى كنتى صريحة فى اجاباتك

حسن حنفى

اجابات حلوه علي التاج

خصوصا ان حضرتك جاوبتي عنه بكل صدق

غير معرف

ميرا

رمضان كريم

جميلة قوى أجاباتك دى

فيها تلات حبات صراحة وفيها كام حلم

جميل يارب يتحققوا كلهم


وجميل ان الناس

قالت ان التاج صعب رغم انى شايفة مش قوى يعنى

فى تاج تانى آخر رمضان تاج جميل أعمل حسابك فيه

ما ده كان العربون والتاج التانى باقى الحساب
ههههههه
وكل سنة وانتى طيبة

غير معرف

يااااااااااااااه

انا اتاخرت كل ده

بجد ماشاء الله اجابات صريحه

عن نفسى لو جالى تاج زى ده لو كان نسبه حلى لتاج 30% لاسهل تاج

ده نسبه حلى ليه 1%

بس ايه الاجابات الجامده دى

:d

ربنا يوفقك ويسعدك يارب

Empress appy

اصلك طيبه وانا عارفه انا عن نفسى بحبك بحسك واقعه من حته منى ههههههههههه لا يا ميرا انت بجد حلوة وتتحبى

أختكم فى الله

اول زيارة ليا لمدونتك

لفت نظرى اوى اسمها

بجد مدونة رائعة

ربنا يكرمك ويبارك فيكى

الاسئلة دى بجد صعبة اوى اوى

بس انتى اجاباتك زى العسل

تقبلي مرورى

Mona Shereif

مااااااااااااااااااااشى يا وومن
انتى عارفة انا بقولك ماشى ليه
بس انا هسامحك المسامح كريم
واحنا فى ايام جميلة

بقولك ادعيلى اوى بجد محتاجه دعاااااااااائك

اجاباتك جميلة على فكرة
سلام يا قمر

يوسفيات..محمد يوسف

حلوة الإجابات


وبترسم شخصية أحلى


ألف شكر ع المساعدة


أكيد فاهمة

(;

ميرا ( وومن )

همس الأحباب

ربنا يكرمك يارب بس بالراحة عليا احسن بعدين اتغر ومحدش يعرف يكلمني

تحياتي


***********************************

magn0lia

ده بس من زوقك والله

تسلمي يا قمر

***********************************

diyaa

طب تفتكر الخلطة دي ممكن تجيب نتيجة ولا محتاجة إضافات تانية

رينا يسمه منك يارب وبالمناسبة متعرفليش حد كويس اخد عنده كورسات حدود

ميرا ( وومن )

blue-wave

ربنا يكرمك يارب دايما كدة بتحرجني بذوقك

ابص بقدام مبصش ليه ما اخدتش حاجة من البص ورا

***********************************

عبد الهادي_سارة

انا مش اخترت هو بصراحة كدة ادبست اتورطت حاجة زي كدة

الحمد لله كلة بيعدي الحمد لله اني جاوبت بصراحة

***********************************

adem el-mahdy

مين دبلوماسية دي انا معرفهاش

ههههههههههه بهنزر

ربنا يكرمك يارب كل سنة وانت طيب

نورتني

ميرا ( وومن )

احمد الصباغ

يا أهلا يااهلا والله المدونة نورت

متألقة ايه بس بعدين كدة هاشوف نفسي واصدق

كل سنة وانت طيب

يوم السبت كان يوم فوق الفظيع

***********************************

أحمد سعيد

هو الفراخ العاطفي دة فريب الفراخ المشوية

ههههههههههههههههههههههههه

لو الإجابات عاجباك اتفضلها

ميرا ( وومن )

مدحت محمد

وانت طيب شطل الواجب عاجبك قوي بص هدية مني ليك

***********************************

حسن حنفي

ده بس من زوقك

تحياتي

***********************************

المحارب المتيم

تلات حبات صراحة إيه بس

اصلا بعد إجاباتك مينفعش غير اننا نحاول نبقي صرحا

وبعدين تاج في اخر رمضان ايه بس انا هارجع في كلامي بين صاحب التاج والمدون بفتح الله

خالص تحياتي ومودتي

ميرا ( وومن )

حسام يحي

لا مش أتاخر قوي يعني وإجابات جامدة ايه بس

اقولك مني لك ونشوف ( وش شرير )

***********************************

appy

طب بالذمة يعني أرد اقول ايه ( وش مكسوف )

ربنا يخليكي ليا وميحرمكيش مني ابدا

قولي آمين

بنت القسام

ميرااااا
بصي ورب الكعبه والله والله والله انا قريت البوست وربنا بس نسيت اعلق
مش تزعلي مني
انتى عارفه الزهايمر
التاج صعب الصراحه بس انتى ياعم ماشاء الله اجاباتك حلوة
حاساكي شفافه اوى بالرغم من ميت قناع
تحياتى
بحبك اووووووى وربنا
جيلاان

ميرا ( وومن )

أختكم في الله

نورتيني وشرفتيني وربنا يكرمك يارب

ده بس من زوقك

***********************************

sometimes

يالهوي

إلهي اعدم البلوج ولا اوعي اعلق فية تاني ما واخدة بالي

أنتي عارفة الزهايمر بعيد عنك

ربنا يخليلي قلبك الكبير المتسامح ده من عنيا الإتنين يا حبيبتي انتي تؤمري

ميرا ( وومن )

محمود محمود يوسف

عجبتك اتفضلها بجد

وبرسم ايه بس انا مبعرفش ارسم انا بعرف اخطط وبس

بلا نيلة ولا اخطط كمان

ومفيش داعي للشرك خالص علي فكرة انت اللي ساعدتني مش انا

واجب الشكر ده عندي

***********************************

جيجي

صادقة يا حبيبيتي من غير حلفان عارفة والله

وبعدين تعالي هنا ايه بقي المية قناع دول وضحي قصدك والنبي

بحبك انا كتيررررررر

أحمد بكر

ملحوظه على امرأه بعقل رجل
يعنى ايه مه عقل المرأة زى عقل الرجل ده عقل و ده عقل مفيش اى فرق عارفه الفرق بس فى المشاعر و الاحاسيس و مساهمتها فى السلوك
و احلى حاجه فى المراه على فكره شعورها
خليكى امراه و متخديش اى حاجه من الرجل تحياتى

عايش... ولكن !!!!

التاج ده اسئلته رزله اوى كده ليه
بس قدرتى تخرجى منها باقل الخساير
دمتى موفقه
علاء

حمادة زيدان

ميرا

كل سنة وانتى طيبة ورمضان كريم

أولاً الحمد لله أنك ما ممرتيش التاج ليا لأني يالهوي لساني فالت

المهم تمام يا بونية ردودك حسيت بالصدق فيها ربنا يكرمك يارب بحد تاني تثقي فيه

كلام على بلاطة

;كل عام وانت بخير

كلام على بلاطة

;كل عام وانت بخير

الدرعمي

السلام عليكم

جميلة ٌ أنتِ يا ميرا

كما عهدتكِ

أدعو الله أن يوفقك لابن الحلال

الذي يمحو الجرح الذي يتعمق


رمضان كريم


آدم

دعاء مواجهات

ازيك ياقمر

كلامك مس فيا حاجات كتيير

والواجب نفسه حلو اوى

ربنا يارب يهديكى للصالح دائما

ابقى ابعتيلى رقمك ع الميل عوزاكى

نسيت اخدة لما شوفتك

بيس

شفـقــة و إحســــان

مبروك يا قمر على التاج بس اوعى يكونوا ضحكوا عليكى وادهولك فلصوا

ضــى القمــر

وومن

أجاباتك رووعه ..خاصة انها بتبين شخصيتك وجمالها بجد ..

على فكرة قرأت لكِ اكثر من قصه هناا ..
وفعلا لقيت مدونتك أكثر من رووعه ..
واضح أنك هكون زبونه مستديمه هناا للقراءة ..

ولكن من اللى قريته حبيت أقولك بس ..هونيها حبيبتى بتهون ..

ومشتاقه جدااا لقصتك الجديده
أجمل تحيه لكِ اختى الغاليه

ميرا ( وومن )

بيكر

واضح انك رومانسي جداً بس علمياً في فرق بين عقل الراجل والمرأة في استخدام المنطق وترتيب الأفكار واللي أخدتة من عقل الراجل مكنتش بأختياري

الموضوع ده يطول شرحه عموماً شرفتني

ميرا ( وومن )

عايش ولكن

الحمد لله جت سليمة المرة دي

شرفتني

***********************************

حمادة زيدان

اهلا اهلا بالناس المتأخرة

وأنت برضة تهون عليا أعمل فيك كدة لا خلي فرامل لسانك سليمة . ربنا يسمع منك يارب

ميرا ( وومن )

كلام علي بلاطة

وأنت بألف خير وصحة

***********************************

ِadam

ربنا يكرمك يارب دايما منورني . الله أكرم

ميرا ( وومن )

دعاء مواجهات

ده أيه النور ده كلة البلوج نور

شكل الواجب عجبك طب مني ليكي يا قمر

اي ورطة

انا سجلتك علي الميل ابعتيلي قوليلي صح ولا لاء علشان ابعتلك الرقم

ميرا ( وومن )

شفق هانم إحسان بيك

يا أهلا يا أهلا

لا مش تقلقوا انا روحت فصلتة بره بمعرفتي برضة عقل رجل ميتخافشي عليا

نورتوني

ميرا ( وومن )

ضي القمر

مش قادرة اقولك قد ايه تعليقك اسعدني وأدخل السرور علي نفسي جداً جداً

أهلا بيكي في أي وقت المدونة مدونتك .

ربنا يهون علينا كلنا دعواتك

إن شاء الله مش هاتأخر في النشر علشانك

خالص تحياتي ومودتي

Hossam

hello Miss Mira
ازيك
بجد مبسوط انى دخلت مدونتك
اتمنى نكون اصدقاء
اجوبتك فى التاج لذيذة
hope c u soon
bye bye

بنت الاسلام

احلي اجابة علي سؤال عجبتني

احلامك بالمستقبل

ياريتها تتحقق

تاج جميل واجاباتك ان كانت مغلفة بحزن فانه ياخذ طابع القوة

تحياتي

تلميحاتى - يوسف الشافعى

اجمل مافى البوست انه تاج ليكى انتى بالذات لانه دليل على انك تأثرين ايما تأثير فيمن حولك ومن يقرأ لكى
اجاباتك صريحه وزكيه
احلامك منطقيه وكلنا بنتمناها تتحقق ليكى ولمصر
قولى امين
تحياتى وتقديرى

Asmaa mahaba

طول عمرك طيبه يا ميرا ومش بتحبى تدبسى حد
على فكره انتى جدعه جداا على الحقيقه اكتر من مدونتك بكتير ومش بعقل رجل فقط لكن بهمه الرجال ونشاطهم ودا شىء جميل
سومه

ريمان

جدعه والله يا ميرا

اكتر حاجه عجبتنى انك مدبستيش حد فى الواجب ده

بجد صعب اوى ومش اى حد يجاوب عليه بكل صراحه

كل واجب وانتى طيبه يا قمر

اموااااااااه

ريمان

على فكره وحشانى موت

princess

هاى
اول زيارة
شدنى اوى الاسم"امراة بعقل رجل"
اجابتك حالمة جدا على فكرة وتدى ايحاء انك طيبة اوى
كل تاج وانتى طيبة

الســـاحر

كل سنه وانتى طيبه
انا عجبنى اوى اسمى مدونتك
امراه باسم رجل
جميل فعلا
والاجمل اجاباتك الدبلوماسيه جدا والضريفه على التاج
وتانى كل سنه وانتى طيبه
وانا سعدجت بزياره مدونتك
اتمنى زيارتك

Mona Shereif

يا نهار ابيض
ايه يا بنتى انا كنت بقول على التاج اللى من زمان وبعتهولك وما جاوبتش عليه
هههههههههههههههههههههه
والله انا نسيت هو كان شهر كام

يالهوى ده لو كان حصلك حاجه انا مكنتش هسامح نفسى
طمنينى عليكى اول ما تشوفى التعليق ده

Beram ElMasry

ان كنت ممن يتذوقون الشعر العامى والزجل ، ارجو زيارة مدونتى والتفضل بالنقد والتعليق ، فالنقد كالنصح ، والدال على الخير كفاعله
كلنا نقدس مصر ، ولكن اليس من حقنا ان نغضب اذا ما انحرف المسار

غير معرف

ميرا

رمضان كريم والعيد قرب

ومنزلتيش حاجة جديدة وبعدين يا ستى ابقى طلى كدة قوليلى رأيك فى العك اللى بكتبه عندى على المدونة

وموضوع الواجب ولا التاج الجا ى بتاع
أخر رمضان ده ليا انا واللى عاوزة ياخدة

هو مجرد جرد للأعمال بتاعت رمضان

نصفى حسابات قبل العيد

ميرا ( وومن )

بنت الإسلام

ياريت كنت ابقي اسعد مخلوقة في الدنيا . ولو علي الحزن أو قدر ولو علي القوة ادعيلي ربنا يمدني بيها

وحشتنيني قوي قوي

***********************************

تلميحاتي

هو مش تفصيل ولا حاجة بس اخدتة عربون صداقة

كويس إن الإجابات عجبت حضرتك وشايف انها صريحة

بالنسبة للأحلام اللهم آآآآآآآآآميييين

ميرا ( وومن )

سومة

يالهوي

الكلام دة ليا انا ( وش مكسوف ومندهش )
يعني أول مرة تدخلي المدونة تعملي فيا كدة

يا فمرة انا مش حمل الكلام الحلو دة يجرالي حاجة

بجد بجد نورتيني

ميرا ( وومن )

ريمان

حبيبة قلبي الجدعن دي بنتعلمها منك وحشااااني قوي عاوزة اطمن عليكي بالله عليكي تطمنيني


***********************************

PRINCESS
نورتيني وشرفتي المدونة يارب متكونش الأخيرة

ده بس من زوقك والله

وانتي بالصحة والسلامة

***********************************

الساحر

وأنت طيب علي فكرة المدونة اسمها امرأة بعقل رجل

وإجاباتي مش دبلوماسية ولا حاجة دة بس دة من ذوقك

أنا أسعد بزيارتك

ميرا ( وومن )

sometimes

كدة برضة وقعتي قلبي يا بنتي حرام

عليكي انا مستحملشي أن حد يزعل مني

خصوصاً لما يكون حد بقدرة وأحترمة زيك

طمنيني انتي الأول عليكي

ميرا ( وومن )

بيرم المصري

يعني حتي لو جاي مدونتي تعمل إعلان عن مدونتك

كان من الأولي تتعب نقسك وتقرا اللي انا كاتباه وتقولي رأيك

علي الأقل تديني سبب أتعب نقسي وأقرا اللي بتكتبة وأقول رأي ولا ايه

ميرا ( وومن )

عرفة الأسيوطي

كل سنة وانت بصحة وسلامة

انا كفاية عليا تاج واحد بس واديك شايف النتيجة بجد مبسوطة اني جاوبت علية

بخصوص النشر بقي والله بحاول بس الوقت في رمضان مش مساعد

انا علي فكرة بزور المدونة علي طول بس مش بلاقي كلام اعلق بية

من هنا ورايح هابقي اعلق حتي ولو بالسلام عليكو

خالص تحياتي ومودتي

Amgad
أزال المؤلف هذا التعليق.
Unknown

ايجاباتك لاتختلف عن
ميرا التى نعرفها انسانة طيبة وصريحة وجميلة وتلقائية
نصيحة المرور ههههه
لا تحزنى على خائن
فالخيانة لا تنسى ابدا


كل عام وانتى بخير
ويارب تحققى كل احلامك ياقمر

sebofy7alo

إجاباتك لذيذة وحلوة
أنا متبعك بس مبعلقش كتيرر
تحياتي

غير معرف

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

ارجو من كل من يقراء هذا ان يزور ( مقالات ثقافة الهزيمة ) فى هذا الرابط:

http://www.ouregypt.us/culture/main.html

ميرا ( وومن )

amdad

مش قادر تفهم اية بالظبط ؟

لو كنت تعبت نفسك شوية وبصي علي من انا في البروفايل كنت هاتعرف اني بعقل رجل مش مسترجلة ولا بأخلاق تربية النواصي لو كان فكرتك عن الرجولة انها معاكسة البنات

بالنسبة لموضوع العصمة واضح انك معندكش فكرة عن حاجات متير حتي لو فرضنا اني اخدت العصمة دة حق شرعي ولا ينفي حق الرجل في التطليق ودة طبعا تكريم للمرأة ملوش علاقة بالرجالة خالص

موضوع امراة بقي هايخلني اتشكك اصلا انت اتعلمت عربي فين ؟ لأن كلمة امرأة هي وصف لنوع الأنثي ذي كلمة رجل مهي وصف لنوع الذكر

وطالما ان نوعي انثي وبالغة يبقي انا امرأة ملوش علاقة بكوني أنسة ولا مدام اللهم إذا كان كلمة رجل بتطلق علي غير العذاري منكم

نفس الشئ ينطبق علي كلمة وومن ودة برضة هايخليني اتشكك انت اتعلمت انجليزي فين

ياريت متتحفنيش بأسألة من النوع ده تاني

ميرا ( وومن )

إيناس

ربنا يخليكي يارب ويكرمك .

اطمني انا مش حزينة ولا حاجة محدش بياخد غير نصيبة

***********************************

سيبه في حاله

الحمد لله انها طلعت لذيذة . ومش بتعلق كتير ايه بس ياراجل انت مش بتعلق خالص

هههههههههههههههههه بهزر طبعا

كفاية علينا المتابعه تنور في اي وقت

تحياتي

أ / أحمد عبد المنعم

بسم الله الرحمن الرحيم
كل عام وأنت بخير
وكل زائرى مدونتك
وتقبل الله الصيام
والقيام
والزكاة
وجعله عيد يمن وبركة عليكم
وأدعوك لزيارة مدونتى " أمــــى "

Siguiente Anterior Inicio