كل عام وانتي حبيبتي

حاجة من اكتر الحاجات اللي مش بننساها هي تاريخ ميلادنا مع اننا مش بنفتكر حاجة خالص عن اول يوم لينا في الدنيا لكن بنكبر واحنا بنسمع حكاية يوم ما اتولدنا
كل واحد حكاية ميلاده مختلفة بيبقي مهتم يعرف امتي مامته عرفت انه حامل فيه ؟ كان متعب ولا لاء ؟ امتي حست بالوجع ؟ طب اتولد فين ؟ طب مين اول حد شافه من العيلة ؟ طب كان امور ولا شكلة مش ولا بد ؟
واسئله كتير كتير وحكايه مش بنزهق نسمعها لآنها احنا اللي منعرفوش ولا نفتكره
انا بقي كان يوم ميلادي متميز جدا جدا لانها لحظة ميلاد فريدة ، اللحظة اللي وصلت فيها الدنيا مع اختي التوءام يعني كان في حد معايا وانا في بطن ماما لحظة بلحظة ساعه بساعه يوم بيوم اختي حبيبتي سمعت دقات قلبها وانا جنين ولمستها ولمستني صحيح مش فاكره بس ده احساس تاني بجد احساس تاني فاكره اننا واحنا في اعدادي واحدة زميلتنا قالت لنا :-
- انا كنت لوحدي في بطن ماما لكن انتم كنتم بتلعبوا مع بعض وبعدها ثبت فعلا ان الجنين ساعات بيلعب في بطن مامته .
ياااااااااه كل السنين عدت وكبرنا وانهارده ، انهارده عيد ميلادنا
انهارده بقولك كل سنه وانتي حبيبتي كل سنه وانتي معايا كل سنه وانتي حته مني كل سنه وانتي شئ مهم في حياتي ، كل يوم وانتي مش بتوحشيني علشان انتي دايما معايا.
انهارده وزي كل سنه بتمني ان في ناس تبقي معايا وناس تفتكرني وناس اشوفهم اليوم ده بالذات لكن بسيب كل دول واروح امدد جنبك في الصاله وفوقينا بطانية ولب وسوداني واللي فاضل من التورتة ونتكلم ونتكلم ونتكلم انهارده عيد ميلادنا .
اه وكمان ياريت تنتظمي في اخد الدوا خلصنا النوم وبقيت بنام طبيعي بس غممان النفس بيتعبني مش عارفة اكل هو انتي تخلفي وانا اعاني ولا ايه؟ ربنا يقومك ليا بالسلامه ياااااااارب واسمع حد تاني بيقولي يا خالتو .

علي الهامش
لكل الناس اللي بتسألني عن معني اسم ميرا ، الأسم اصله عربي وجي من ميره وهي ما يضع فيه المسافر مأكلة ومشربة .
وباليونانية معناه المدهشة أو العجيبة