12

مين يحب يفطر معانا ؟

كل سنة وأنتم طيبين
كل سنة وأنتم في رمضان صايمين ومصليين و للخير داعيين

وزي ما وش الخير قوس قزح كل سنة داعية للخير والفرح دي دعوة خير وفطار
تفاصيل الموضوع منقولة بالنص من عند :
قوس قزح
خالد همس الأحباب
آبي وكوكبها

السنة اللى فاتت ربنا وفقنا و عملنا يوم جميل التقينا فيه على الخير و اسعدنا اطفال كتير معنا فى مستشفى ابو الريش
و يمكن يومها شوفنا ان اغلب الاطفال سنهم صغير و بيحتاج وجود مرافق معهم و
غالبا بيكون المرافق ده ام الطفل او باباه .. الناس دى لاحظنا انهم وقت الفطار
بيدور على اى حاجة بسيطة تنفع يفطروا بها لدرجة ان فى امهات فرحت بشوية
البسكويت اللى وزعناهم للاطفال علشان تخليها للفطار


طفل مريض و بيتالم حاجة صعبة جدا .. لكن فى نفس الوقت المرافق له بتكون حالته اصعب لانه مش
عارف يخفف عنه ازاى .. و علشان كده الفكرة المرة دى هتكون للناس دى .. محاولة للتخفيف عنهم و نقولهم اننا بنشارككم حتى لو بوجبة افطار بسيطة


و طبعا اللى يحب منا يقدم تبرع مادى او عينى بجانب الوجبة يبقى جزاه الله خيرا


الوجبة هتكون عبارة عن : رز + خضار + قطعة فراخ او لحمة + مخلل
عيش + ثمرة فاكهة

و هيكون تكلفيتها 10 جنيه
و المعاد هيكون يوم 5 سبتمبر

الساعة 3 قدام باب مستشفى ابو الريش اليابانى للاطفال

نفس المستشفى اللى اتجمعنا فيها قبل كده


و لو ربنا اكرمنا و كان عدد الوجبات يفرح و عددها كتير ممكن نفطر التمرجية
بتوع المستشفى او نطلع على المستشفى اللى جنبها و هى مستشفى المنيرة لاطفال و
نوزع على المرافقين هناك


و اليوم ده مش بس للناس ده كمان لنا احنا لان الرسول الكريم قال " مَن فطَّر
صائماً كان له مثل أجره غير أنه لا ينقص من أجر الصائم شيء "يعنى ان شاء الله ناخد اجر صيام كل شخص قدمنا له وجبة


و فى حاجة عايزة اقولها للناس اللى مش هتقدر تشارك فى التبرع انهم ممكن
يحضروا معنا و يشاركوا فى توزيع الوجبات و التخفيف عن الاطفال و اكيد ده
بردو له اجر عند الله


و طبعا لاننا مش هنلحق نرجع بيوتنا على وقت الفطار ممكن بعدها نروح نفطر مع
بعض فى نفس المكان اللى روحناه المرة اللى فاتت - جزا الله سوو خيرا هو اللى راح
صور المكان و جاب قائمة الاسعار منه - محل ابو خالد فى شارع شمبيليون و
ده بيقدم مشويات و رز و سلطات و سعر الفطار عنده ممكن يكون فى حدود ال 30 جنيه

و لو حد عنده اقتراح بمكان تانى للفطار ياريت يقول لو المكان ده مش مناسب
وممكن لو تحبوا نعمل حسابنا اننا نفطر من نفس الوجبات اللى هنقدمها للناس معهم


اما بقى عن الوجبات اللى هنقدمها للناس فيفضل كل حد ناوى يشارك معنا يبعت يقولنا على الايميل او برسالة على الموبايل بالعدد اللى ناوى يشارك به علشان احجزه

المرة دى مينفعش نحدد يومها لازم على الاقل يوم الاربع اكون عارفة عدد الوجبات اللى هحجزها علشان تتحضر ليوم السبت


ده ايميلات الناس المسئولة عن اليوم





و ده ارقام ممكن تبعتوا رسالة عليها او تسالوا على اى شىء خاص باليوم ده

داليا صاحبة مدونة قوس قزح

0117742287

استاذ خالد صاحب مدونة همس الاحباب

0101345140

يلا مين بقي هايحب يفطر معانا ؟؟؟؟

12 قالوا رأيهم:

كيــــــــــــارا

ان شاء الله هكون موجوده :)

كل سنة وانتي طيبه ياقمر

ahmed_k

ربنا يوفقكم دايما للي فيه الخير
كان نفسي أكون معاكم بس حال بيني وبينكم بعد المسافه
بس فيكم الخير والبركه

فاتيما

بت يا ميرا يا اميرة
يا ست البنات
إنتى معزّمة على البوستات و لا إيه ؟؟!!
بقالى كام مرة مش عارفة اعلق
و بعدين فين و فيييييييين لما عرفت طريقة التعليق فى الآخر
يا ستى انا جاااااااااااااية افطر معاكو و بكل فخر و فرحة و ربنا يكرمنا جميعا و اليوم يبقى حلو زى وشك الجميل و قلبك الاجمل
اشوفك يوميها يا ست البنات على كل خير
و بوسة و حضونة
و كل سنة و انتى طيبة عشان عرفتش اقولها فى البوست اللى فات

الدرعمي

كل عام و أنت بكل خير سيدتي الأديبة .. تقبل الله جهدكم و سعيكم و جزاكم كل الخير @ رمضان كريم @ آدم الدرعمي

قوس قزح

ان شاء الله احاول اجى يومها
هههههههههههه


جزاكى الله كل خير يا قطتى على النشر
كل سنة و انت جميلة

!!! عارفة ... مش عارف ليه

كل سنة وأنت طيبة ميرا

رمضان كريم

وإن شاء الله أكون موجود

يومها بإذن لله

محمد مارو

meeeeeeeeeera
miiiiiiiiiiiiiis uuuuuuuuuu
that is a very vice idea
kol sana e entom kolukom bkher
tomorrow i will go to everett housing this place like a housing for adapting children and nursing houe
. the nice thing that every
the nice thing we can help peopl in any plce
sorry foe typing english
but i dont have arabic

micheal

ربنا يكرمكوا

Sometimes

ربنا يقدركم على فعل الخير دايما يارب

كل سنة وانتى طيبه يا قمر

Lyssandra

هلا ميرا

ان شاء الله اليوم ده هاكون في القاهرة
بس مش ضامنة ظروفي خالص

لو قدرت أكون موجودةهاعرفك

كل سنة وانتي طيبة

Lyssa

micheal

ربنا يباركلكوا يا ميرا

adel

مدونة جميلة و فرصة حلوة اني اتعرفت قبل ما ااقرا المدونة
هههههههههه

هابقي اشوف ايه حكاية البايب دي بقي :)

Siguiente Anterior Inicio