7

إليكِ


إمبارح حسيتك وحشاني قوي فكرت فيكي كتير وقولت أكتبلك كل الكلام اللي نفسي أقولهولك ، روح قلبي أنا شايفاكي بقلبي ورسمالك صورة في خيالي كل ماتوحشيني ابصلها وأبوسك بعيني ، عارفة يا روح قلبي من كام سنة كدة مكنتش متخيلة أني ممكن أفكر فيكي ولا أستناكي ولا أحلم بيكي لكن سبحانة مغير القلوب فجأة كدة بقيتي في قلبي وفي خيالي وبستناكي ، عارفة يا روحي بستناكي لدرجة بتوجع ، عارفة أنا متعشمة في وجهه الله خير إن هاتكوني بعيون خضرا زي خالتي وعارفة ان كلهم مش مصدقني بس أنا بصراحة يا روح قلبي معتمدة علي الطفرات الوراثية تيجي في صفي لأن الطفرة الوراثية في عليتنا بتظهر كل كام جيل ومظهرتش في جيلين بس ما علينا من الكلام ده بلاش عيون خالتي لأن شكلها أخدت التوكيل ، عارفة يا روح قلبي عيون جدتك من أجمل العيون اللي ممكن تشوفيها خدي عيون جدتك اللي بعشقها دي علشان كل ما أبصلهم أحس اني أخيراً اخدت منها حاجة.
أنا عارفة أنك ممكن تطلعي شبة باباكي زي ما انا كدة شبة بابا بس أنا بحبك رغم كل شئ ، روح قلبي انا مش عارفة أندهلك بأسمك لأني معرفهوش بس علي كل حال أوعدك أني أخترلك أسم جميل في معناه ونطقة وتحبية وتشكريني عليه.
اوعدك أننا نكون أصحاب قوي ، أوعدك أني أقف جنبك وأساعدك تحققي كل اللي بتتمنية في حياتك ، أوعدك أني أسيبلك حرية الإختيار في حياتك وتكوني زي ماتحبي.
روج قلبي عاوزة اقولك أني مشتقالك ، مشتقالك قوي.
مشتاقة أشوفك علي السونار وأعملي حسابك ان دي أول صورة هاحطها في ألبوم صورك ، مشتاقة أمسك أيديكي الصغيرة ، مشتاقة أخدك في حضني ، مشتاقة أصحي ملاقكيش جنبي وأتخض عليكي وأدور والا قيكي في حضن ماما في البلكونة بتشمسك وتقرالك قرآن ، مشتاقة أحطك في حجر بابا وأخدلكم صورة وياخدك يشتريلك حاجات حلوة ، مشتاقة يشتريلك العربية بتاعه البيبهات ويحطك علي أول عجلة ، مشتاقة أحميكي ، واغيرلك وأسرحلك شعرك وأختارلك فساتينك ، مشتاقة أديكي اول قلم ترسمي بيه ، مشتاقة نلون سوا صورونرسم عصافير ، مشتاقة أسمع ضحتك روح قلبي مشتاقة أسمعك بتندهيني .............

7 قالوا رأيهم:

فاتيما

ربنا يرزقك بيها
عن قريب يا رب


خلى بالك
السنة دى خلاص
قربت تخلص
و ان شاء الله
توقعات برج الحظ هتحصل


بنهاية السنة دى
تكونى لبستى الطرحة
و على آخر السنة الجاية
تكون جدتها بتشمسها
و بتبصلك
و انتى جاية من بعيد
و تضحكلك



حلو و رقيق قوووووووووى
البوست دا

أحمد سعيد..نيجــر

ما أروع مشاعرك يا ميرا

انها المرأة الأم بالفطرة

احساسك عالي اوي يا ميرا


ربنا يحققلك كل شيء جميل بتحلمي بيه

اتمنالك حياة سعيدة


نيجوووووووووووور

мαησηα

الله يا ميرا جميل اوى حبيبتى

ربنا يارب يفرحنا بيكى حبيبتى

قريب ويتحقق كومينت فاتيما بالتفصيل

يارب اللهم اميييييين

عجبنى اوى وصفك للمشاعر الجميلة اوى دى

بجد تسلم ايديكى حبيبتى

Ramy

ميرا

الله الله عليكى بجد بوست يخلى الواحد فرحان جدا جدا جدا

يارب كل ما تتمنية يتحقق

(: ابتسامة كبيرة من القلب لكل الكلام الجميل دة

مش عارف اقول اية صراحة (:

غير انى ادعيلك (:

يارب يارب يارب

تتوفقى فى كل اختياراتك و ربنا معاكى دايما

MoHaMed AhMeD

أمومة مشاعر منجاة خياليات طيبة أونسة ألتفاف أحلام أشتياق
رهف تفائل 000 كل الكلمات ده انتى بتعبرى عنها فى أجمل بوست أبداعتى أنكى وانتى تكتبى أصبحتى " مصوراتى " جميع الأشياء عبرتى عنا فى صورة جميلة خلتينى أراه من خلال كلماتك أهاً عليكى مبدعتى أراكى نجوم بالسماء تحياتى على الأبداع

القوسى ناراً بلا رماد

Kiara

نفس الشوق :)

ربنا يرزقك الزوج الصالح اللي يسعدك ويحميكي ويرزك الذرية الصالحه اللي بشتاقيلها :)

غير معرف

كم انتى رقيقة فى مشاعرك صادقة فى احاسيسك المتدفقة التى أشعت كلمات أدمعت عينى ومست قلبى حتى أحسستها مع كونى رجل احسستها باحساس الأب الذى يملأ خلجات نفسى أدعو الله أن يترجم مشاعرك الى حقيقة تلمسينها بيديك وتملأ ضحكتها الرقيقة أذنيك وابتسامتها عينيك آميييييييييييييييييييييييييين
RAMADAN

Siguiente Anterior Inicio