8

من وحي الخنقة


أنا أصلا مش عارفة أنا مخنوقة قوي كدة ليه مع اني المفروض ابقي مبسوطة والدنيا بيس بس جاية معايا عكس
كنت ناوية اتخانق بجد واعمل زعلة كبيرة وتبقي دي أول مرة بس معرفتش اكلمك وانا مضايقة ومهنتش عليا اتخانق معاك L واللي يغيظ انك بتقنعني ان انا اللي فهمت غلط @) انا مبحبش النكد بس محتاجة النكد اليومين دول وانت تغيظ ومش مديني فرصة
----------------------------
طيب يعني ايه الواحد قاعد كده لا بيه ولا عليه ويلاقي مكالمة من أخر الدنيا ويصعب عليا ان حد يغير نظام يومة بفرق توقيت 12 ساعه علشان يكلمني بس اتنكدت واتخنقت اكتر ما انا مخنوقة ومش فاهمة يعني ايه حد عايش بقناعه ان هو الوحيد اللي في الدنيا دي اللي بيحبك وخايف عليك وبيوعيك علشان مصلحتك علشان انا رقيقة ورمانسية ومشاعري بتعميني !!!!
ومش عارفة مصلحتي ولا بعرف اخطط واي حاجة عاوزة اعملها متخططة غلط ولازم اعمل واسوي كذا ودي نصيحة من شخص محنك وعارف الدنيا كويس ومش علي نياتة ( وبيحبني وبيخاف عليا )
كام مرة المفروض اقولك خلي عنك يا عم الحاج انا مش صغيرة وعارفة مصلحتي واصلا محدش خرب حياتي قد ما انت خربتها ومع ذلك مصمم انك بتعمل الصح طب كام مرة هاقولك حل عن سمايا !!!! مفيش فايدة يعني حتي بعد ما سبت البلد كلها وهاجرت !!! طب اهاجر انا علشان ترتاح
----------------------------
طب ايه في حاجة عاوزة اعملها وربنا يقويني هاتسحل سحلة تمام لمدة لا تقل عن سنتين وهانضغط أكتر بس يارب اصلا تنفع والبديل محتاج برضة سنتين والأتنين نتايجهم مش مضمونة بس محتاجة اخطي الخطوة دي وهحاول ابذل كل جهدي يمكن ربنا كاتبلي التوفيق المرة دي ... مهو مش هافضل محلك سر كدة كتير
----------------------------
برغم المود الوحش اللي موجود معظم اليوم بس بجد مفيش حاجة بتهون عليا قد مابدخل جروب كلمات علي الفيس واشتكي والاقيهم كلهم بيطبطوا ويخرجوني من اللي انا فيه ... كلكم طيبين قوي قوي ربنا يكرمكم ويسعدكم ويسمعني عنكم كلكم سمع خير يارب انتم فعلا اخوة في الله وانا بحبكم في الله :))

8 قالوا رأيهم:

مدونة رحلة حياه

السلام عليكم ميرا
حلوة قوى الفضفضة ع الاقل بتخفف علينا شوية ولما نلاقى حد يسمعنا ويفهمنا ويحتوينا بتفرق اكتر
دا دورنا كلنا فى كلمات اننا منسيبش جزء مننا زعلان واحنا بنتفرج عليه عشان كلنا واحد
دومتى بخير حال

richardCatheart

عارفه عجبااااااااااااااااااااانى فححححححححححححت كححححححححححححححت
التدونه هههههههههه فى حاجات بين السطور حاستها اوى بصرف النظر بقى عن موضوع كلمات دا لاننا فعلا اخوات حتى لو ماتكلمناش كتير يا ميرا بس بردو بنحس ببعض اوى

اعملى اللى انت عايزه واياكى تدى فرصه لحد يتحكم فى حياتك

عاشقه الرومانسيه

ده لان كلمات مش مجرد جروب
ولا اهل كلمات مجرد ناس فاضيه بتشغل وقتها
احنا فعلا اخوات بجد
بنحب بعض لله وفى الله لا بينا مصلحه ولا عايزين من بعض الا الكلمه الطيبه :)

تعرفى ان لما حد يدخل الجروب جديد بكون قلقانه ومتضايقه لانى باخاف يفسد جو الألفه اللى بينا
لكن الحمد لله حتى الان كل الناس اللى معانا ناس محترمه وجميله جدا

اقولك على حاجه كمان؟
انتى من جواكى حلوه ياميرا علشان كده الناس بتحبك وبتخاف على زعلك
وبصراحه انتى تستحقى كل ده واكتر :)

مدونة عرفة فاروق

ميرا

مع انى مش فاهم حاجة ومش عارف مين اللى بتكلمى عنه ولا فاهم اصلا ايه السحل اللى هيكون السنتين الجايين
بس اللى اقدر اقوله

يارب يطمنك ويريح بالك ويكتبلك اللى فيه الخير
وتكونى دايما يارب معانا ومنورانا على طول

بنت قلبى

قبل اى شىء كل سنه وانتى طيبه

مونتي بوكيه ورد

تعرفي .. هو لو النكد والخنقة هتعمل الكلام الحلو دا .. ممكن تعملي جدول للباد موود وفيه هتقدري تطلعي حاجات كانت مستخبية جواكي
انتي مش عارفه انتي مخنوقة ليه .. مع انك المفروض تبقي مبسوطة .. حاجه جواكي مش عارفه سببها مخلياكي حاسه بخنقة في حلقك و مش قادرة تبلعي نفسك و كان حد ماسك علي رقبتك ومش قادرة لا تشوفيه ولا قادرة تتخلصي منه
وهو دا السبب ال خلاكي من جواكي تنوي الخناق مش كدا وبس دا كمان هتعملي زعلة كبيرة بس الحمدلله انك معرفتيش و الحمدلله انها مبقتش اول مره عشان منفتحش دفتر حسابات
الحمدلله ان قلبك قدر يتحكم في مشاعره علي اخر لحظة و ميهونش عليكي حد بيحبك و لو حتي محتاجه للنكد اليومين دول فخلي عندك ثقة ان ال بيحبك هيستحملك بس مش هيحب لحظة يشوفك في حالة نكد
عارفه .. حتي لو مفهمتيش غلط .. البنت ال بتعدي بنت حكيمة و عندها ذكاء انثوي .. وانتي يا ميرا بتملكي دا ..متفهميش غلط لاننا بنصادف حاجات كتيره في حياتنا بتخلينا ممكن نفهمها غلط و هي في الحقيقه مكنتش تقصد الفهم دا
الله .. ايه دا كنت هقول الله في حد بيحب حد وبيخاف عليه اوي كدا .. بصراحه ال بيحب حد بيفاجئه بمكالماته في اي وقت بيصحيه من نومه عشان يقوله وحشتني
لكن انتي بتقولي حل عن سمايا بصراحه مش فاهم دا حد انتي راضيه بيه وبمكالمته ولا حد مش طايقاه وزود النكد عليكي
انا كمان في حاجه عاوز اعملها بس عاوزه 4 سنين مش سنتين بقالي سنتين في اول سنه ومع ذلك متفائل جداً ان نتايجها مضمونه كفايه ان عاوزها و عندي يقين ان هاخدها .. ماتفهميش غلط دي الشهادة المصونه .. ربنا يوفقك وتنجزي في السنتين دول حاجات كتيره اوي مكنتيش تتوقعيها و متحسيش بمشاعر نكد ابداً فيها .. وتطلي علينا من وحي الالهام و من وحي الامتنان و من وحي السعاده ومن وحي الابتسامه ومن وحي الحياه
-------------------------------
برغم اني كان نفسي اعلق في مود احسن من كدا الا اني مبسوط مبسوط مبسوط اووووووي علشان حظي حلو وكنت واحد وسط نجوم كلمات .. جروب كلمات اللي بيفكرني بجيفن 0 جيفنز بيت العيله 9 المنتيد بتاعنا زمان اللي كنا بنتلاقي فيه كلنا ولا كان في فيسس بوك ولا حد يهددنا بريموف ولا حد فينا بينسي ابدا يسال عن التاني .. كنا محدودين بس بنحب بعض وبنسال عن بعض ..
كل ما بشوف حاجه جميله في حياتي بحمد ربنا اوي و بفتكر ان مقصر في شكري لله سبحانه وتعالي لنه منحني اجمل معرفة بأجمل ناس .. وانتي منهم نجمة من نجوم كلمات .. وصفك رائع هما فعلا اخوة اجتمعوا وتحابوا في الله فبارك الله في جمعهم و قربهم لبعض برقي .. و طاب يومهم بذكره .. انا عاوز اوصفهم كلهم بس مش هقدر اوصفهم هنا هما عاوزين نوت لوحدهم .. خليه عليا انا .. هتلاقيهم منورين في كل بوست بكتبه من قلبي وانتي معاهم .. بتضيفي احاسيس جميله بتخرجنا من الخنقة .. بدعيلك من قلبي ربنا يحفظك ويقويكي و ينجحك في الخطوات ال ناويه عليها .. وماتفهميش حد بيحبك غلط ويبارك في وقتك وتشوفي السنتين سنين فرحه و سعادة يارب
:))
أحبك الذي أحببتينا فيه ..

Ehab

مش هقولك غير كل سنه وانتي طيبه
سيبك من اكتئاب الأعياد ده وروقي دمك
ده رمضان خلاص بيودع الحقي ادعي فيه بكل اللي انتي عايزاه ربنا يسعدك

سلاااااااااااااااااااام

mrmr

فضفضى يا اوختى فضفضى
ريحى قلبك وطلعى الكبت اللى جوا
كل سنه ومصر كلها بخير
عيد سعيد

Siguiente Anterior Inicio