1

إلي المجلس العسكري ... أنت بتدور في المكان الغلط



مشاركتي ضمن أسبوع التدوين ضد الحكم العسكري

أنهاردة أتصل بيا صديق قديم من الفلول الأصلية يعني وسألني ايه حكاية البنت اللي أسمها سميرة وكشوف العذرية دي ؟؟
حكيتلة الحكاية من الأول فسكت وقالي ربنا يستر علي مصر ... في اللحظة دي بس كانت فكرة معينة ابتدت تتبلور في راسي 

وهي نظرية المؤامرة والطرف التالت
نظريتي ببساطة ممكن تفسر تصرفات الجيش طول الفترة اللي فاتت دي الجيش متبني نظرية المؤامرة !!! وعلي ما يبدوا كدة أن المجلس العسكري بمشيرة بعنانة بلواءاته بشرطتة العسكرية بفرق صاعقتة عندهم قناعة واحدة وهو الطرف التالت
وأغلب ظني – وبعض الظن إثم – أنهم كانوا بيتابعوا الثورة من علي شاشات التليفزيون المصري وكفي 

ببساطة كدة أحنا قدام سلطة كاملة مش قادر تصدق ان الثورة حدثت كنتيجة طبيعة للحياة السياسية والإجتماعية المتعفنة واللي كانت من سئ لأسواء 

مش مقتنع أن دعوه من مجهول للخروج يوم 25 يناير علي الفيس بوك كان ممكن تلاقي الصدي ده ويبقي ليها النتائج دي 

المجلس العسكري طول الوقت مع الثورة إلي أن يثبت العكس وابتداها من أول يوم من كشوف العذرية اللي حب يثبت فيها أن اللي كانوا في التحرير بنات مش كويسة والتحرير كان عبارة عن غرزة كبيرة طول الـ 18 يوم والناس دي مدفوعه بجهات خارجية ولها أجندات وكشاكيل كمان !!!

كان عاوز يثبت العكس لما أخد جنب ناس زي أحمد أسبايدر ودعم قنوات زي الفراعين وإعلامين من أمثال عكاشة وخيري رمضان ولميس الحديدي والأخيرين دول في منتهي الخطورة لأن عندهم قدرات رهيبة علي السفسطة والتنظير والكلام بطريقة ممكن تبان مع وضد في نفس الوقت ووضع السم في العسل بحيث أنهم يبانوا مع الثورة وقت اللزوم وضدها وقت اللزوم برضة 

كان بيدور علي الطرف التالت لما خرجت من بعض أعضاء المجلس العسكري أتهامات صريحة لبعض الحركات الثورية وأهمها طبعاً 6 أبريل اللي كانت للأسف كبش فداء وبعد أتهامهم بالعمالة وانهم قابضين وفتح تحقيق في مصادر تمويلهم محدش سمع عن التحقيقات دي أي نتيجة غير معلومات مسربة عن الموضوع ده هايمس جهات كتير وتلميح أن بعض التمويل ده كان خليجي فتم التعتيم عليه!!!!

ونتفق مع 6 أبريل أو نختلف كلنا في النهاية بشر منا الطالح ومنا الصالح وعمر انتساب أي شخص غير سوي لأي فكرة أو جماعة أو ثورة مابيسئ أبداً لجمال الفكرة أو أهداف الجماعة أو الثورة 

المجلس العسكري حما الثورة فعلاً ودي حقيقة ... حماها من العملاء والمأجورين الجاري البحث عنهم طول الـ 11 شهر دول ... المجلس العسكري مع الثورة فعلاً بس لحد ما الثورة تثبت انها شريفة ومش مدفوعلها ولا مزقوقة علينا من حد فهو هايحقق ويعتقل ويتهم وينتهك حقوق الإنسان براحتة 

ومن مدونتي المتواضعة دي أحب أقول للمجلس العسكري أنت بتدور في المكان الغلط ... لو غيرت نظرتك للأمور واديت نفسك فرصة أنك تري الأمور من وجهه نظر الشباب الغلبان اللي وحياة اللي جمعنا من غير معاد ماخرج وتظاهر وعمل ثورة الا من عجزة ويأسة وقهره ورغبتة في أن بكرة يكون ليه فرصة 

سيادة المجلس العسكري أرجوك أمن بهذه الثورة وبدلاً من قتلنا وسحلنا وفقأ عيونا وتعريتنا وكشف عذريتنا ... أسمعنا .. بالله عليكم أسمعونا وبطلوا حجتكم بأن شباب الثورة ليس لهم قيادة ومش عارفين نتفاهم معاهم خدوا مني واتكلوا علي الله وأنا زي بنتكم بردك

يعني بدل ما تفتحوا ابوابكم مستنين دخلتنا عليكم متنزلوا أنتم لينا ؟ ما لما تحبوا تاخدوا رأينا في حاجة أو تتكلموا معانا أعملوا قوائم أستقصاء واسألونا نحن معشر الشباب عن طريق النت ... الشارع ... الجامعات ... المدارس ... نزلوا لجانكم الإليكترونية وغيروا توجههم مهم كدا كدة بيقبضوا ولا ايه ؟ او أي وسيلة تانية أنتم لو فكرتوا مش هاتغلبوا يعني ... أنتم مجلس عسكري وايدكم طايلة 

ولحد بقي ما الأيام تفصل بينا أحب أقولكم إن استمراركم في التدوير علي اللهو الخفي اللي مش لاقينة لحد دلوقتي بيخلي الفجوة بينا وبينكم توسع ... حاولوا وقف حمامات الدم دي بقي بينا وبينكم دم وعرض وشوية العيال المفاعيص دول مش هايسكتوا تاني ولا هايطنشوا تاني ولا هايطاطوا تاني 

وفي الآخر أحب أقولكم موعدنا لاهاي إن شاء الله .....

1 قالوا رأيهم:

ابراهيم رزق

اتفق معك فى الراى فى الحالات الاتية
اذا كان ما يفعله بنا بحسن نسة
او اذا كان يفتقد الى الخبرة السياسية
او ان مستشاروه هم من وروطوه
اما اذا كان متعمدا لاغراض اخرى فالموضوع مختلف تماما

احيكى على الطرح
تحياتى

Siguiente Anterior Inicio