8

قائمة أمنيات العام الجديد




إنهارد الساعه 12 صباحاً أعلنا ميلاد السنة الجديدة ... ألف حمد الله علي سلامتك وبما أنك الحمد لله شرفتي فأنا فتحت كشف الحساب ودققت فيه بند بند وشهر شهر وفي المجمل معجبتنيش السنة دي بإعتراف الكل كانت صعبة فقررت كدة إني أطبق الصفحة دي بحلوها بمرها وأفتح صفحة جديدة وأكتب فيها اللي أنا مستنياه مني في 2012 

-         مبدئياً كدة عاوزة أبتدي السنة علي نضيف فقررت أني أسامح كل الناس اللي أنا زعلانة منهم وبجد من قلبي مسمحاكم ومتنازلة عن حقي اللي في رقبتكم لأن كان في حد منهم دعيت عليه من قلبي وبصراحة مؤخراً وصلني عنه أخبار مش كويسة خالص زعلتني بجد أنا مش عاوزة أمر بالشعور ده تاني وأفضل اسأل نفسي هل ياتري دي دعوتي ؟... هل ده ذنبي ؟؟؟ لا خلاص عفا الله عما سلف وربنا يدي كل واحد علي قد نيتة.

-         تاني حاجة بقي حالة الأنتخة اللي أنا فيها علي كل المستويات دي ستنتهي اليوم بإذن الله وسأعلن هذا العام عام الإنجاز بالنوسبة ليا كل مشاريعي المعلقة آن الآوان أن تنتهي وأني ألتفت لدراستي اللي دخلتها في 2011 وأنا فاقدة الحماسة خالص وديماً بفتكر أني انتحرت في المذاكرة قبل كدة وجيت علي الآخر وربنا مقسمليش .... الكلام ده هاشيلة من دماغي وأتوكل علي الله وأفتكر أننا مطالبين بالسعي وخصوصاً أن دلوقتي مفيش شغل علشان اتحجج بيه واقول هو السبب.


-         ثالثاً السنة دي قررت أني استقر بقي ... أه والله انا فعلا شايفة أن ده الوقت المناسب إني أعمل بيت ليا ( علي طريقة الست ماجي فرح اللي كل أول سنة تيجي تقولك في البرج بتاعك ده العام المناسب للإرتباط ) وفي الوقت ده بفتكر حد قريب مني كان ديماً يقولي مش هاتتجوزي غير لما تحسي فعلاً أنك مستعدة للخطوة دي ووقتها أخدت كلامة بتريقة لكن أتضح أن صح مية في المية أنا فعلا عمري ما أخدت مسألة الإرتباط دي علي محمل جدي وديماً في كل محاولاتي كنت بخطط للفشل مقدماً ... وبوصل للفشل ... طبعاً انا عارفة أن كل شئ بإيد ربنا سبحانة وتعالي بس أنا عقدت النية وهاتوكل علي الله.

-         رابعاً هارجع تاني أحفظ قرآن وده قرار قررته أنهاردة ...ومش هاروح الجامع أو اتابع مع محفظة أنا هارجع أحفظ زي ما كان شيخي بيحفظني وأنا صغيرة – جازاك الله عنا خيراً يا شيخ كمال – وده لأني بحس إن الستات والبنات اللي بتروح للمحفظة في الجامع مش كلهم نواياهم مخلصة للحفظ وده بيأثر علي سير الحفظ نفسه وكمان مبحبش قاعدات الستات مبتفرقش معاهم جامع – عزا – فرح – جنازة لازم يلاقوا سبب علشان يحطوا راسهم في راس بعض وهاتك يارغي ونم

-         خامساً هادور علي أي كورس أتعلم فيه قواعد اللغة العربية لأن بجد عيب السنة دي إن شاء الله هاتم خمس سنين تدوين ... وبتوه في النحو كده وبرتكب جرائم لغوية من غير ما أحس بتأنيب ضمير وللسجل فقط دي مش محاولتي الأولي لكن برضة ناوية احاول بجد.

2012 كلنا متعشمين فيكي خير بالله عليكي ياشيخة ماتخيبي ظننا فيكي ... انا عن نفسي مستبشرة خير إن شاء الله وهحاول أبقي إيجابية ومعنوياتي مرتفعه محدش واخد من الزعل والنكد حاجة ولا ايه ؟ 

لكل الناس اللي بحبها كل سنة وأنتم طيبين بجد أنا غنية بوجودكم في حياتي ... يارب كل سنة متجمعين علي خير ... يارب كل سنه بنحب بعض ... يارب كل سنة ووجودكم فارق معايا 

بحبكم في الله

8 قالوا رأيهم:

Lobna Ahmed Nour

كل سنة وانتي طيبة يا ميرا
ويا رب تحققي أمنياتك وزيادة

safa7_karmooz

:)

shoshta_ joker

السلام عليكم...

كل سنة وانتى طيبة يا ميرا ...

عارفة انا مش ركزت على السنة الجديدة دى فى انى أكتب معنى متعودة ع كدة فى كل الحجات المهمة الى فى حياتى ع رغم متفألة بيها مستنية بأذن الله حجات كتير اوووى تحصل فيها ياررررررب تحقق

بس البوست دا خلانى عاوزة اركز واعد وعمل قايمة وافوق من التوهان والكسل الى انا فى دا


وفعلا الحجات الجديدة فرصة لأننا نبدأ من جديد ...وانا كمان كل شوية اقرر انى ارجع احفظ قران وبعدين ارجع فى كلامى تانى ....بس بجد حنوى المرة دى ان شاء الله وأفنذ نيتى وربنا يعنى كلنا يارب.


جزاكى الله خير
دومتى بخير
فى رعاية الله.

رؤى عليوة

كل عام وانتى بخير واكثر تفاؤل

تصدقى ان كل ما جاء فى قائمة أمنياتك نشترك فيه

ومعرفش ليه الكل متفائل السنادى يااااااااارب كل ما فيها يكون خير
السنة اللى فاتت كانت طويييييييله اوى

ان شاء الله يكون السنادى كل خير

تحياتى

مدونة عرفة فاروق

كل سنة وانتى طيبه

ان شاء الله ربنا يحققلك كل اللى بتتمنيه

safa7_karmooz

انا بطلت اتمنى

بقيت احتفظ بأمنياتى لنفسى ...حتى ااقرب الناس مبشاركهمش الا بأمنية او اتنين ...والباقى بحتفظ بيه
على أمل انه يتحقق لان العادى بقى انه مبيتحققش

يا بشتغل غلط يا بتمنى مع الناس الغلط !!1 مبقتش عارف !

Zawag alnaddy زواج النادى

امنيتى هذا العام ان ربنا يرزق كل شخص بزوج او زوجه حسب بقي الى هوا عاوزه
وربنا يكرمكم ان شاء الله

gmr14

عام سعيد ان شاء الله..
وكل سنة وانت طيبة..

Siguiente Anterior Inicio