50

حلم أخر الليل

حلمت أمبارح خير الله اما اجعله خير إني مسكت مشروع خاص بإعادة تجديد حديقة الحيوان ومع إني عارفة إن من ساعة مخلصت امتحانات وأنا كل أحلامي إسقاطات نفسية بس بجد مكنتش فاهمة الحلم ده خالص الغريبة بقي إن جاتلي في الحلم ده أفكار حلوة جدا علشان نرجع للحديقة دي بريقها ومكانتها وقضيت معظم الحلم مع الحيوانات وانا بدورلها علي بيوت جديدة وبحاول احسن مستوي معيشتها واحطها في أماكن قريبة من بيئتها الطبيعية ومع شباب كده واعي ومتحمس وأفكاره هايله ومع إني ما اتفرجتش علي فيلم أفريكانوا قبل ما أنام ولا حاجة صحيت من النوم مستغربة جدا ايه اللي جاب حديقة الحيوان في الحلم ؟
قعدت كده أفكر مش لاقيه علاقة يمكن علشان انأ أصلا جيزاوية عادي طب ما في بتاع اكتر من أتنين مليون جيزاوي مفتكرش أن في حد منهم بيحلم بحديقة الحيوانات
المهم أن الحلم ده فكرني بحاجات كتير بما إني طبعا من سكان الجيزة الأصليين فكان اقرب مكان لينا هو الجونينة زى ما كنا بنقول عليها ومن كتر ما روحتها وتهت فيها بقيت حافظاها صم يااااه فين أيام اللعب والتنطيط وفين أيام الزعامة - آه زعامة كنت زعيمة العصابة اللي هي أخواتي وقرايبي وكده - بس كل ما افتكر نفسي وأنا صغير كنت سوسة أعمل المصيبة وهما اللي ينضربوا - هههههههههههههه - وفضلت سوسة كده لحد ثانوي برضة أنا اخطط المصيبة ويمسكوا البنات صحباتي يدولهم أسبوع رفد وأنا يرجعوني الفصل ومديرة الدور تقولي يا وومن يا بنتي ملكيش دعوة بالبنات الوحشة دي أحنا بنضرب بيكي أنتي وفلانة وفلانة المثل .
- طبعا يوم الكبسة اللي من النوع ده كنت بتحصن بالباك أب بتاعي - زعيمة العصابة المنافسة اللي هي برضة جارتي مه الزعما لبعضيهم - وأروح علي البيت جري قبل ما يتفقوا عليا ويعملوا انقلاب وعلي بال مآثار العلقة اللي بيخدوها في البيت تروح يبقي الأسبوع خلص وهما نسيوا ولما يرجعوا ابقي خطط للمصيبة التانية - يخرب بيت عقلي كنت مصيبة بجد -
أخر مرة بقي روحت الجونينة كنت في أخر سنة في الجامعة وكان يوم يوم يعني كل اللي شغالين في الجونينة كانوا بيعاملوني علي أني مرشدة سياحية وطبعا مش غريبة لما يبقي في أيدي اليمن سنين التونسية الأصل بعيونها الخضرا وشعرها الذهبي - هو كان صحيح صبغة بس دهبي - وبجوارها انتيمتي شيرويت بجمال الخليجيات ببشرتهم السمراء وعيونهم السوداء وعلي شمالي حميد الأفغاني بلونه الأسمر المائل للصفرة وشعرة الشديد السواد وأخيرا محمد اللي ورث صفات والدته الإنجليزية ببشرة منمشة وشعر احمر غامق كانت الشلة الدولية دي نتاج ورشة عمل أقامها اتحاد الطلبة للأسر في الكليات المختلفة وطبعا لأني جاية في أي مصيبة فاشتراكي في الورشة كان عقاب القدر أو هما ( أصحابي ) افتكروا كده .
- ليه بقي الموضوع يرجع أصلا لما بكل حماسي وقوتي طلعت في دماغ العيال أصحابي أننا نعمل أسرة وجينا بقي لحد التوقيعات والمناصب الرسمية واتحاد الطلبة وقلت أنا يا فكيك كالعادة يعني واستغليت مقر الأسرة ده بعد كده كمكتب خاص ومقر رسمي ليا فلما طلبوا يرشحوا حد لحضور الورشة كنت أنا المرشح الأول والأخير علي أساس إني عضو عامل وأنا أصلا مكنتش بعمل حاجة غير إني اطلع عينهم وأجي الصبح أقولهم ها في حد سال عليا - بس بجد كانت أيام حلوة وأنا كنت بشترك في كل حاجة بس بعيد عن الرسميات -
المهم فشلت كل محاولاتي في الفكاك من الحضور وروحت لقيتهم عاملين كوكتيل من كل الكليات وجنسيات مختلفة وطبعا كان واضح من الأول العيال بتوع كليات القمة اللي طالعين فيها دول واخدين موقف من الكليات النظرية والعكس بس مع الوقت كل واحد ابتدي يكتشف أن التاني طالب برضة زيه وعنده نفس المشاكل وكلنا بيهددنا شبح البطالة بعد التخرج .
المهم اتفقنا بقي بعد إزاحة الخلافات الشخصية جانباً علي أننا نكرم ضيفنا حميد طالب الاقتصاد والعلوم السياسية ونفرجه علي مصر وده بقي كان يوم الجونينة وقد سبقتها زيارة للأهرامات عاوزه بوست تاني تتحكي فيه .
طبعا بقي كان عندي صدمة كبيرة قوي لما شوفت الإهمال اللي فكل حته وعدم النظام والنظافة وكله كوم والناس اللي شغالين هناك كوم تاني طبعا المعاملة علي أننا سواح وأجانب كانت بتختلف وتمن الحاجة علي طول بينضرب في اربعة وكانت بتبقي كابسة كبيرة قوي لما يعرفوا أننا مصرين واني مش الست المرشدة وتقدر تقول خيبة أمل في أنهم مش هايعرفوا يقلبوا الزبون بقيت أصحابي بقي كانوا مضايقين قوي أنهم جم كلهم كانت أول زيارة ليهم أنا بس اللي كنت زعلانة علي المكان اللي كان فعلا غاية في الجمال وشاف أجمل ذكريات طفولتي وكانت له مكانة دولية وبقي مثل حي للإهمال والفساد اللي طال كل حاجة جميلة هنا .
مهما كان الحلم ده غريب وملوش مناسبة بس بجد أحسن حاجة انه رجعني لحاجات كنت قربت أنساها يمكن دي حيلة من حيل العقل الباطن اللي بيرجعنا لحاجات حلوة علشان يهون علينا قسوة الواقع يمكن .

50 قالوا رأيهم:

أحمد سعيد

لما حديقة الحيوان التي كانت دولية

تصبح فوضي وحيوانتها تموت .

أكيد أكيد أنت بمصر المحروسة .

يا ميرا ده مش حلم ده كابوس

كابوس كل المصريين

الحكومة بتاعتنا الله يكرمها

وينورلها طريقها

ويبشبش الطوبة اللى تحط دماغها


بكل مهارة ادارية ومرونة لا يقدر عليها إلا الحمار الوحشي (( الحمار المخطط )

بتفسد في كل شيء

ومن ثم ترفع عنقها كالزرافة معلنة

عن نجاحها في الفساد والدمار .

الله يعمر بيوتهم .


يا ميرا هذه البلد هي مصر .

تقبلي تحيتي


أخوكِ دائماً نيجــر .

Soooo

هيييييييييييه
اول تعليق
---
وكتاب الله انتي لسعتي خلاص
يعني الناس تحلم احلام رومانتيكيه .. لو بنت تحلم براغب علامه ولا وائل كافوري ولا شرحبيل احمد - مين شرحبيل ده؟؟؟
وانتي تحلمي بحيوانات .. ومش اي حيوانات .. دي حيوانات جنينة حيوانات مصر
ده انتي لسعتي رسمي خلاص

وبالنوسبه لانك كنتي زعيمة عصابه .. ولا يهمنا
احنا كمان كنا مجرمين ولينا سابقة اجرامات .. وياما جرينا في خناقات .. عادي يعني

وبرضه كان لينا انشطه خدميه .. زي يوم ما عملنا مشروع الجامع ولفيت انا وواحد صاحبي على طلبة الكليه وخدنا منهم تبرع لبناء مسجد ولما الفلوس كترت في ايدنا قلنا الاعمال بالنيات واحنا كده فعلا كأننا عملنا عمل خير والجامع اتبنى وخدنا ثوابه بالنيه .. وضربنا الفلوس وطلعنا على شرم الشيخ .. انشطه خيريه دي ولا مش خيريه؟؟؟

بس برضه هنالك تساؤل
حال جنينة حيوانات مصر .. هيتصلح ازاي؟؟؟

ملحوظه
ماتفسريش جملة (جنينة حيوانات مصر) اي تفسير سياسي الله يكرمك




سلامووووووووووووووز

هيثم الدهشان

بالذمة فى بنوتة تحلم بجنينةالحيوانات انتى كنتى نايمة فى البلكونة جنب العصافير ولا ايه

تصدقى الجونينة دى اول مرة اروحها فى حياتى كانت من شهر ونص واتصدمت من مستوى الزبالة والاهمال الهائل هناك الناس اللى بتشتغل عليها تستحق جايزة المركز الاول فى اعدام البيئة

بوست كويس بس ياريت متناميش جنب العصافير تانى احسن تحلمى بأسد طالع عليكى المرة اللى جاية

تقبلى تحياتى

sherif

انا بقي ولعت عودين بخور وقلت افسرلك الحلم ده زي عادتي مع اصحابي وخير ان حدية الحيوانات ده هي ايه بلدناوالحيوانات إحنا الغلابه الشعب المسكين ياه
مش توصلي الحلم ده وتفسيره لبابا حسني
اما الذكريات فأنت أستعدتي الحياه الجميله الي كانت في الصغر عشان تهربي من امعاناه اللي في الكبر
بجد مش أنفع افسر أحلام
ههههههههه
اشكرك علي زيارتك بيتي وهي طبعا مدونتي أما بخصوص رأي عن المرأه فهي ده الحقيقه لأن المرأه كنزها عقلها وده وجه نظري ممكن الناس تشوفني غريب بس أنا مبسوط كده
اشكرك مره أخري ولما تحلمي ابقي أولع عودين بخور وأفسرلك الحلم

تلميحاتى - يوسف الشافعى

الحلم ده مش جديد الجديد انك ألتى علينا المواجع لازم يعنى تفكرينا ان حتى الفساد وصل للحيوانات ( اشمعنى همه يعنى )هو احنا احسن منهم فى ايه

ريمان

هههههههههههههه


يا احلامك يا ميراااااااااا

ايه العسل ده

انا نفسى احلم احلام حلوة زيك كده يا بت

يلا كل حلم وانتى طيبه يا قمر

تحياتى

ريمان

Hosam Yahia حسام يحى

ماشاء الله يا
Marry

دمتى مبدعه دااائما

وعقبال احلامك ما تتصادر

عشان الاحلام ممنوع فى الجيزه

عزلى وابقى احلمى براحتك

د/عبد الخالق زهران

ايه يا ميرا دا توهتينى والله بين الحلم والواقع والخيال
امتزاج رهيب يابنتى ربنايحفظك ويحفظ عقلك

مش هاتكلم لى تفاصيل الموضوع لانى وصلت متاخر وناس كتيير سبقتنى لكن دايما مع ميرا مش بتقدر تغمض عنيك

أمل فتحى عزت

اسعدنى المرور بمدونتك وأتمنى لك التقدم والمزيد من الاهداف النبيلة


كما أدعوك لزيارة مدونتى والتى محتواها


تعالوا نسافر المسافات الى زمن من المحبة لاينتهى


كما أدعوك لقرأة قصتى


(بكل لغات العالم أحبك)

Dr-Abd-Alrahman

اولا يا ميرا انا مش عارف اقولك اية الصراحة
اذا كان الاهمال موجود بين الناس في الشارع وفي الاماكن العامة وحتي في المستشفيات
يبقي اكيد الاهمال لازم يوصل برضة لاماكن الترفيه في كل مكان
علي العموم يا ميرا الحلم الي حلمتيه وراكي الفرق الشاسع بين زمان وبين دلوقتي وكان بمكانه مقارنة
كمان كان بمثابة شاهد علي العصر
وعلي زيادة الفساد في كل مكان في ارض مصر

وللاسف محدش يقدر يتكلم عشان الشعب مقهور بالحديد والنار وللاسف برضة
مفيش اي تطوير بيحصل

ياريت تحتفظي بذكراياتك الجميلة دي في ملف بعيد عن التلوث
الموجود في كل مكان لانها للاسف مش هتتكر

يالهوووووووووووووووووووي
حاجة تغيييييييييييظ


عبدالرحمن

Mado Man

ازيك ميرا
انا اول مرة ادخل المدنة بتاعتك
ادهالي الصيدلي المطحون ولمح لي عليها تلميح جميل الي خلاني ادخلها
واقرا كل كلمة فيها
بصراحة انتي كلامك جميل
وطريقت في عرض الموضوع جميلة وسلسه
اما موضوع الحلم دة
فهو مؤلم شوية ومتعب تقدري تسميه كابوس مش حلم
علي العموم مش الجيزاوية بس الي ممكن يحلموا بالجونينة الحلم دة بس جالك عشان مرتبط بمثير نفسي جواكي

علي العموم ربنا معاكي
بصراحة حلم يفقع المرارة بعد ما شوفتي الفرق

اوعدك اني هزورك تاني

مادو مان

!!! عارفة ... مش عارف ليه

على رأي محمود ياسين لما كان بيفرج مديحة كامل على مصر من الطيارة في فيلم الصعود إلى الهاوية

---------------------

هي دي مصر يا عبلة


تحياتي

وومن

نيجر
مه طبعا أنا أكيد في مصر بس مصر بقت مره قوي وتوجع القلب بجد

تحياتي

وومن

سوووو
ههههههههههههههههههههه
تعمل أيه بقي في واحدة بتحلم بمصر وبالنوسبة لسؤالك فهاضطر اقولك الحلول اللي حلمت بيها وحق النشر محفوظ
1- كونا فريق عمل من مهندسين زراعين تخصص تخطيط حدائق ومهندسين ديكور وأطباء بيطريين ومجموعة إداريين

2- عملنا مسح شامل للجونينة من حيث طبيعه أرضها والمزروعات اللي فيها واللي ممكن كمان تكون موجودة وحصر بالحيوانات الموجودة واللي كانت موجودة

3- عملنا مخطط لإعادة تخطيط وتجديد الجونينة وعمل اقفاص محاكية للبيئة الطبيعية للحيوانات

4- خاطبنا حدائق الحيوانات الدولية ومنظمات حقوق الحيوان لمناقشة إمكانية جلب مجموعة حيوانات جديدة

5- خاطبنا الجهه الدولية المسئولة عن تصنيف الجونينة عالمياً علشان نعرف الأشتراطات المفروض تطبيقها لإعادة تصنيف الحديقة

6- أنشانا جمعية محبي حديقة الحيوانات

7- كل الشباب والبنات اللي كانوا معايا في الحلم متطوعين علشان بيحبوا الجونينة وبيحبوا مصر

وومن

هيثم الدهشان
ابدا والله كنت نايمة في سريري وبعيد عن العاصافير بس تعمل ايه بقي في العقل الباطن

**********************************
شريف
كح كح كح ايه ده ياعم البخور ده شكلة صينة ومضروب
هههههههههههههههه
ليك عليا تفسري كل احلامي واحلام اصحابي كمان وعمولتي محفوظة بس خلي البخور بعيد احس تحصل حريقة
تحياتي

وومن

تلميحاتي
انا كمان والله الحلم قلب عليا المواجع مش عارفة بجد انا بعمل ايه في 2008 كان المفروض ابقي في 1908 بس هي الظروف

**********************************
ريمان
بسيطة خالص نامي من غير غطا وشغلي المروحة فوقي بالظبط علشان تعمل تيار هوا
وانتي هاتلاقي احلي شغل في الأحلام تحياتي

وومن

حسام
حتي الحلم هايتصادر ماشي يصادروه عندي غيرة كتير
بس اعزل ده اللي مش ممكن يحصل ابدا

**********************************
د / عبد الخالق
دايما كدة اجي لحد تعليق حضرتك واقف وأبقي مش عارفة ارد
بس تفتكر ممكن يبقي ده شعار المدونة الجديد
تحياتي

وومن

امل فتحي
أسعدني مرورك اكثر ويشرفني أن ألبي دعوتك الكريمة

***********************************
عبد الرحمن
مش بالذمة حاجة تموت من الغيظ
وكمان فكرة الملف دي هايلة قوي هابقي ابتدي اطبقها واسمية بعيدا عن التلوث

وومن

مادو مان
يا اهلا وسهلا شرفتنا بالزيارة وميسي قوي علي الكلام الجميل ده
عاوزة أقولك حاجة مهمة جدا الحلم ده كان من اجمل الأحلام واستمتعت بكل ثانية فية جدا
صحيح الواقع ألمني لما صحيت بس كويس أن لسة في حلم ممكن يسعدنا
تحياتي

بنت الاسلام

حلم وذكري

بس ياريت ياميرا الحلم يتحقق

الحديقة اكيد هيبقي لها شكل تاني

وهيبقي في فرصة لاجيال جاية يكون لها

ذكريات جميلة زيك برده

تحياتي

كاتب مصري

لا عجب حلم لو عرفتو الحكومة يبقى ايه..
تحيتي ويشرفني أن أراك بالمدونة المتواضعة الخاصة بي
تحيتي لك
مدونتي هنا
http://kanyatklam.blogspot.com/

حقى اهرتل

انا ما زرتش الحديقه من سنين بس انا كنت عمال احلم انى اخد ابنى واوديه انتى خوفتينى ربنا يستر

mohammed alsha3r

كويس والله
في مدونين بتعرف تحلم

جميل

المهم

أحب اقول لك ان الدوله بتدرس انها تبيع حديقه الحيوانات

ايه راي؟؟

amal

شكلك مهمته بموضوع تجديد الحديقه
عشان كدا حلمتى الحلم ده

يمكن الامر يهمك
ومن حكاياتك انك بتروحى كتير وليكى زكريات هناك

انا مش قاهريه اساسا وعمرى ما زرتها
بس مكنتش اعرف ان حالها بقى صعب كدا وفى حيوانات بتموت

ان شاء الله يكون حلمك خير ويجددوها

سعدت بزيارة مدونتك :)

هيثم الدهشان

ميرا انا مررتلك تاج الاحلام منتظر اجابتك عليه

ايه رأيك فى التدبيسة دى

تقبلى تحياتى

وومن

بنت الإسلام
أهي الأجيال الجاية دي هي اللي واجعه قلبي بجد طب الواد كركر أبن أختي هافسحه فين دلوقتي وهابتعفرت فين دلوقتي

**********************************
كاتب مصري
زيارتك طبعا شرفتني جدا وزيارة مدونتك أسعدتني
تحياتي

وومن

حقي أهرتل
حقك برضة تاخد أبنك تودية الجونينة بس متقولش أنك هاتشوف هناك الأسد والزرافة والحاجات دي علشان مممكن ميلقهاش ويحبط انت ودية واللي تلاقية هناك تفرجهوله واللي متليقهوش تفرجة علية في كتب الأطفال بتاعة الحيوانات

وومن

الشاعر
الحمد لله علي نعمة الحلم
وأنا عرفت موضوع أنهم بيفكروا يخصخصوها او يبيعةها علشان تتعمل أبراج سكنية وإدارية ومولات ويذودا الخنقة خنقة والثلوث تلوث والزحمة زحمة
بس مش لاقية كلام أعلق

***********************************
أمل

هو أنا وسط حاجات كتير الموضوع ده مش من أولوياتي ولا شاغل دماغي بس بجد كان حلم قصاده علامة استفهام

وومن

هيثم الدهشان

ألف شكر علي التاج والتدبيسه الأتنين سوا بس انا مليش في موضوع التيجان ده
ممكن اخد بدالة بنس شعر

خالص تحياتي

حمادة زيدان

ميرا

والنعمة انتى بنت جدعة لما تحلمي تحلمي بالوحوش
هههههههههههههههههههههههههههههههه

انا ذكريات كتيرة برشا بالحديقة دي خاصة انه بابا الله يرحمه كان دايماً معانا في الجنينة

ربنا يرجعها تانى زى ما كانت

سلاموز بقي

سارة

ياااه يا ميرا
ياسلام لو الريس فكر فى تحسين معيشة الناس
زى مااتنتى فكرتى فى تحسين معيشة الحيوانات
يظهر المصرى قيمته اقل ولا ايه

كمان فى خبر بقى بيتنفى كتير من المسئولين
وده طبعا بيأكد انه هيتنفذ
الخبر ان حديقة الحيوان هتتخصخص
واحتمال السفارة الاسرائيلية تشتريها
عشان دايما بتشتكى من الروائح المنبعثة من الحديقة

يلا ربنا يجعله خير

قلب أبيــض

بسم الله
السلام عليكم


اولا ..بجد انا فى الاول بدات اقرا فى الحلم

وشوية انتقل الحلم الى الماضى ..والعصابات

وشوية
انتقل الموضوع الى الجامعه
والشلة ..والانتيييم


مش عارف اقول ايه ولا ايه


بس انا تعليقى هيكون على الحلم


يمكن انتى هتبداى تحلمى كتييير بالجونيينة ..
مش كنتى بتقولى عليها كدا وانتى زعيمة العصابة


اهى هتبدئى تحصدى من كل اللى عملتييية وانتى صغيرة

بس وانتى كبيرة



يلا
خييير

وعلى راى اخويا محمد الشاعر

الحكومة بتفكر تبيع الجونينة
وكدا كدا ..هتتظبط


يلا
تحيا جمهورية مصر العالمية

وومن

حمادة زيدان

الجونينة دي رمز لطفولتنا كل واحد فينا جواه حتة منها هانفضل نفتكرها بالزاف
سلام منجا بقي

***********************************
سارة

يا أهلا يا أهلا المدونة نورت
بس أقولك حاجة بصراحة هو ليه أحنا مستنين الريس هو اللي يفكر ويقرر طب مايحلملنا بالمرة ويحققلنا احلامنا
احنا مسئولين عن اللي وصلناله زي اي مسئول يالظبط احنا اللي ساكتين
ياريت كل واحد يحاول يفكر ازاي يبقي احسن هو واللي حوالية ويفكر فكرة لبكرة
مش آن الآوان بقي نحلم لنفسنا ونعمل لنفسنا

وومن

قلب أبيض
طب ما بدل ما احلم بالجونينة أفكر أن احقق الحلم دة أحسن
وطبعا فكرة بيع الجونينة وخصخصتها الكلام عليها كتير وممكن يحصل جدا وطبعا محدش هايعمل حاجة غير انه يقول حسبي الله ونعم الوكيل
مه اصل العباقرة اللي بيديروا البلد مش فاهمين أن مشكلتنا انهم مبيعرفوش يديروا اصلا
تحياتي

bar2ash

السلام عليكم

ازيك

دي اول زياره لمدونتك وبأذن الله همتكونش الاخيره


حلو اوي انك تفضفضي وتكتبي حتي احلامك خصوصا لو كنتي تملكي اسلوب رائع كده

بجد هايله


تحياتي وتقبلي مروري


برقش

smsm

ملقتيش غير حديقة الحيوانات
المهم انا نفسي اتعرق بيكي
دا اميلي
yasoo_2022@yahoo.com

وومن

برقش

بجد بجد زيارتك أسعدتني جدا وميرسي قوي لتشجيعك
وعاوزين نبقي نشوفك هنا كتيرررررر

appy

تعرفى انها من اكتر الاماكن اللى بحبها بجد بس مبقتش عارفه اروح كل حاجه قلت قوى فيها بقولك ايه هعينك رئيستها ونظفيها ونقعد عندك بدل البورصه

إسلام

اليومين دول حدائق الحيوان أصبحت بدون حيوانات اللهم الا القطط الضالة..
يعني ناس بيتفرجوا على بعض..

وأنا لي راي غريب بيقول ان الدنيا حديقة حيوان كبيرة

تحياتي

arsenalwy

وومن

كلامك جميل اوى واحلامك اجمل لو كل احلامك كدة ياريت تحلمى كل يوم وتنزيللتا بوست بحلمك

وبالنسبة لحديقة الحيوان انا اسمع انها دلوقتى اسوء واسوء

والاهرام وكل حاجة فى بلدنا وفرحانين بعدد السياح فى مصر انه وصل 9 مليون جاتهم خيبة

يروحوا يشوفوا السياح اللى بيزوروا برج ايفل اللى على الاقل بيوصل ل18 مليون فى الستة ودة معلم واحد

وومن

سمسم

سوري علي الرد المتأخر بس اهلا وسهلا بيكي

***********************************
آبي

فينك من زمان وحشاااااااااني
بس انتي عينيني رئستها بس وشوفي هاعمللك فيها أيه أحتمال اعمل كشك للمدونين زي كشك الموسيقي اللي هناك
ويبقي بالمشاريب كمان

وومن

اسلام

يمكن يكون رأيك صح بس برضة مفيش مانع ناخد بالنا من الحديقة الصغننة

**********************************
أرسلناوي

هو الحلم عجبك قوي وعموما انا موافقة احلم كل يوم وأكتبلكم الحلم بس تضمن منين انها متنقلبش مدونة تفسير أحلام

شرفتنا بالزيارة

tota

هههههههههههههه
جميل جدا بجد رجعتيني انا كمان لايام شبابي ويام مصايب ثانوي
بس تعرفي هو انا مش هقول اكتر من الي قاله سعيد
مدام كان ده حلم
يبقي اكيد في مصر

tota

تعرفي انتي نبهتيني لمشكلة جامدة جدااااااااا
ان في ازمة بطاطين
مممممممم
كدة الحكومة هتضطر توزع بطاطين زيادة لممارسة دورها الرقابي علي الاحلام
ومن ثم بتغطيهم كويس عشان مايحلموش
ابقي احلمي ان الازمة دي اتحلت بقي

مدحت محمد

على راى سوووو

البنات بتحلم براغب علامةوتامر حسنى ودى بتحلم بحديقة الحيوانات

انتى برج العقرب يابنتى ولا ايه

هههههههههههههههه

طبعا انا كمان والله كنت بتكلم من كام شهر فى الموضوع ده
انى فعلا الحديقة دى بقت مهملة
ومش هى لوحدها صدقينى
ربنا يرحمنا
ده فى حاجات كتير فى مصر بقت مهملة

وومن

توتة

أيام شبابك دي علي أساس انك عجزتي ولا ايه اطلعي من دول يا بكاشة
وبالنوسبه لموضوع البطاطين مين عارف يمكن ربنا جعلني سبب للفقرا اللي مش لاقين غطا وهايتغطوا ببركة الرقابة
هههههههههههههههههههه
نورتيني يا قمر

**********************************
مدحت محمد

اه انا برج العقرب هو باين عليا قوي كدة ؟

tota

هما فعلا غلابة لانهم مجبرين يتغطو حتي في الحر بس نعمل ايه بقي احنا في مصر

Hosam Yahia حسام يحى

عايزين البوست بتاع السياسه والحب

:d

الم

ميرا
صباح الاشطه ياسكر
تحياتي
ادعييييييييييييلي انا بنطحن ع الاخر
جيلي كاستر
مش هتقدر تغمض عنيك

وومن

توتة

انتي ملقتيش غير مدونتي تتشاقي عليها
هانقعد نرد علي بعض في التعليقات ولا ايه ( وش مكشر )

مستنية الأفتتاحية بتاعتك

***********************************
حسام

هو انا علشان قولتلك علية هاتصيحلي ولا ايه عموما هو انكتب بس بيتراجع وانشاء الله قريبا علي مدونتيييييييي

********************************
ألم

وصلتني الأوف لاين ماسيج ودعيتلك ولا ليكي عليا حلفان
بس ابقي اعملي حسابي في واحد جيلي كاستر زيادة

Siguiente Anterior Inicio