53

أتهموني اني شرقية


جلست علي شاطئ مدينتي حزينة مكسورة أعاني غربة داخلية الجميع يتهموني بالجنون بالتحرر بالمجون أجريمتي أني اعترف بعقلي لا بنوعي أذنب احمله أني أريدكم أن تحترموا رأي لا أن تمجدوا جسدي نظرت في يأس علي مدينتي وآآآلمتني غربتي من أصدقائي وأهلي وعشيرتي غرقت في أحزاني وأسلمت لعيني الدموع فالوحدة علي هذا الشاطئ اخترت ولا رجوع.
وأفقت علي أصوات من بعيد آتية سفينة كبيرة تعبر بحرنا أضوائها متلألئة صاخب ركابها كتب عليها إلي أرض الحرية ذاهبة , وقفت علي المرسي وبداخلي أمنية أن أذهب إلي أرض الحرية حيث لا غربة ولا اغتراب .
ما هذا هل أنا احلم أم أنا مستيقظة هل لي أنا يلوحون ؟هل للركوب معهم يدعون ؟ يا إلهي أهذه أصواتهم تنادي :-
أنتي أيتها الغريبة بلا وطن هلمِ معنا حيث الوطن لكل الأغراب لكل من لا يعرفون الوطن.

علي السفينة صعدت وعن ارض الوطن ابتعدت وداخلها تجولت أناس من كل بقاع الأرض سمر وحمر وشقر وصفر بداخلهم حلم الوطن أنهم هؤلاء الذين نبذوا من أرضهم وهجرتهم بلادهم.
عبرت البحر وعلي شاطئ بلاد تعرف ببلاد الغرب رسيت تمجد الحرية علي مرساها تمثال ضخم سموه باسمها قطعوا علي أنفسهم عهد بجعلها غايتهم من اجلها يجيشون الجيوش ويعلنون الحروب يبيدون قبائل وعشائر يغيرون حدود البلاد ويكتبون التاريخ لاشئ يقف في طريق الحرية.
دخلت إلي أرضهم بعيون مندهشة تبدو بلادهم كجنة الله علي الأرض لا لغو فيها ولا حديث بل يعملون يجتهدون بأحوالهم عن أحوال الخلق هم مشغولون فالسائر سائر والجالس جالس والنائم نائم فدع الخلق للخالق.
من كل الألوان والأشكال كمهرجان بشر لا يعرف بداية ولا نهاية لا يشبهون أهلي عيونهم ملونه شعورهم صفراء أو بنيه أو صهباء وجوههم تري منها مجاري الدم مع أنهم فاقدون الحياء.
ابتسموا في وجهي الجميع يرحب الجميع يقول أهلا بكِ في أرض الحرية في عيونهم يتساءلون بشرة سمراء عيون سوداء لا تشبهه أهل يهوذا ولا أهل أرض الذهب والماس ولماذا هي بالملابس متدثرة من أعلي رأسها لأخمص قدميها ؟
تشجعت إحداهن وبابتسامه سألت من أي أرض قدمتِ
أجبتها بثقة من أرض يقال لها أرض الشرق
صمت الجميع وعلي وجوههم الوجوم واختفت الابتسامة حل محلها الغضب


- شرقية أأنتِ شرقية جاهلة متخلف عنصرية مدعية تعانين الازدواجية إرهابية بربرية تتحصنين بالخرافة جئتي من عصر الجاهلية منافقة مرائية كاذبة مخادعة غبية أرضك فيها كل عيوب البشرية لا تحكمون سوي بالحديد والنار والديكتاتورية من كان مثلك لا يعرف معني الحرية.
- اختزلتم الشرف في غرفات النوم وعلي ملاءات السرائر وجعلتموه وقفاً لكلمة العذرية , الفضيلة هي زيارة دور العبادة ولا صدق ولا أمانة ولا ضمير وفيما دون ذلك هي أفعال شيطانية لا فكر ولا رؤية ولا عقل تفكرون بأنصافكم التحتية।


شعرت بالخزي والضآله طأطات الرأس وفي حلقي غصه وارتفعت الدماء في عروقي وصرخت
- مهلا .... مهلا يا من تعيشون في ظل المساواة والحرية اتحاكموني بذنب ليس ذنبي اتحاكموني بعلة أهلي ما ادراكم أني اشبههم وبأي تهم تقذفوهم الم نهدي إليكم حضارتكم الا تعيشون الآن في ظل ما نقلتموه عنا ، ألم يكن أجدادي صناع حضارة وتاريخ ، ألم يهدوا إليكم النور بعد قرون من الظلمات أهكذا تردون إلينا الجميل ؟


- ها انتي قد بدأتي ولأمجاد مضت تذكرتي أين انتم الآن منا ومن اجدادكم ، أضعتم كل ما صنعوه وفرقتم بجهلكم كل ما جمعوه وما نحن عبيد إحسانكم بل وعينا الدرس فما أنتم إلا قوم لا تتستذكرون.
- لا داعي للمجادلة ففي النهاية انتم محقون نحن من رضينا بأن نكون في ذيل القائمة ان نكون تابعين لا فاعلين والآن ما الذي ينتظرني علي أرضكم الأبية عاشقة الحرية ؟


- هذا كلام العقل والعاقلون سندخلك مختباراتنا العلمية ونضعك علي جهاز تحليل الفردية إن كنتي من فئة البشر العادية فستكونين كما نريدك أن تكوني سنمنحك العمل والمأوي وفرصة للحياة بحرية لكنك لن تكوني علي قدم المساواة مثلنا عليكي أن تثبتي ولاءك لنا أن تنزعي عنكِ ثوب الشرقية أن تكوني واحدة منا تعيشين في سبيل الحرية .
- إما إذا كنتي ممن لديهم الألمعية وتملكين الذكاء والموهبه والعبقرية فستكونين أميرة في بلاط مملكتنا علي رأس بلادنا تفتح لكي كل الأبواب وتملكين المجد والشهرة ونقيم لكي في مياديننا تمثلاً وتدخلين التاريخ من أوسع الأبواب ماذا تقولين فيما نعرض ؟


- أي إدعاء للحرية إذا كنتم ستنزعون مني الهوية ستصبغوني بصبغتكم الغربية لأكون مسخاً لا أدمية ، وإذا وجدتم في دمائي العبقرية أي مجد توعدونٍِِ ماذا لو طورت سلاحاً ؟ فضد أهلي ستستخدمون أو إلي أعدائهم تبيعون لتبيدوا أهلي وترتكبوا المذابح والجرائم ولدمائهم تستحلون، ماذا لو طورت دواءً يشفي من سرطان أو طاعون عن أهلي ستمنعون والمرض فقط إليهم ستصدرون، أي خدعة للعالم تخدعون وأي كذبه تسوقون وأي خراب بأسم الحرية تبيعون بأس لكم من قومٍ في ملك العالم تطمعون أتهمتموني أني شرقية فكفاني فخراً بها فطمس هويتي وشرقيتي هو ما إليه تتطلعون .
- سأعود إلي قومي واصرخ بهم هذا هو ما علمت منهم كفانا نوم فإنهم آتون .... كفانا نوم فإنهم آتون .... كفانا نوم فإنهم آتون.

53 قالوا رأيهم:

ريمان

انما بس جايه احجز

على فكره

انا كنت والله لسه داخله على مدونتك من شويه وبقول ليه انتى منزلتيش بوست جديد

هقرا البوست واجيلك يا قمر

ريمان

ميرا


بجد عجبتنى اوى الحته دى

أي إدعاء للحرية إذا كنتم ستنزعون مني الهوية ستصبغوني بصبغتكم الغربية لأكون مسخاً لا أدمية ، وإذا وجدتم في دمائي العبقرية أي مجد توعدونٍِِ ماذا لو طورت سلاحاً ؟ فضد أهلي ستستخدمون أو إلي أعدائهم تبيعون لتبيدوا أهلي وترتكبوا المذابح والجرائم ولدمائهم تستحلون، ماذا لو طورت دواءً يشفي من سرطان أو طاعون عن أهلي ستمنعون والمرض فقط إليهم ستصدرون، أي خدعة للعالم تخدعون وأي كذبه تسوقون وأي خراب بأسم الحرية تبيعون بأس لكم من قومٍ في ملك العالم تطمعون أتهمتموني أني شرقية فكفاني فخراً بها فطمس هويتي وشرقيتي هو ما إليه تتطلعون .
- سأعود إلي قومي واصرخ بهم هذا هو ما علمت منهم كفانا نوم فإنهم آتون .... كفانا نوم فإنهم آتون .... كفانا نوم فإنهم آتون.


بجد برافو عليكى

احييكى على اسلوبك الجميل الجذاب ده

بجد يا ميرا اسلوبك فى عرض الفكره او القصه جميل اوى وبيشد اى حد انه يقرا

وعجبنى كمان الوصف اللى انتى وصفتيه بلسانهم للشرقيين

هما فعلا شايفينا كده

بوست جميل يا قمر
ويا ريت مش تتاخر علينا تانى

ها

امواااااااااه

Empress appy

بما انى اول مرة اقراها احم احم
ههههههههههههههههه
فبجد يسلم دماغك هو ده النظره لينا وده للاسف احنا عملنا اكتر من كده فى نفسنا وشم عارفه ليه بقى صعب اننا كمان حصرنا مفاهيم كتير فى حاجه واحد واختزلناها كمان يا رب الكل يفهم ويستوعب

ahmed_k

حقا فنحن من أرتضينا أن نكون بذيل القائمه
ونحن من أصبحنا نخدم مصالحهم ونزود عنها
وطالما الضعف فينا فسنظل هكذا
فالضعيف لا يحترم
أنظري لأسلوب تعاملهم مع إيران لأنهم يعلمون مدى قوتها
أما نحن فلنا الله
ما شاء الله عليكي فعلا إسلوبك رائع
وسردك ممتع
أديبه بصدق والله

دمتي متألقة مبدعه

رئيس جمهوريه نفسى

احم احم على راى بتنجانى يوم السبت لما سالت بتنجانى دى ميرا قلت فى بالى مش ممكن بس ما علينا
المهم افصاح عن رغبة داخلية لقطاع عريض من الشرقيين فى الابحار للجانب الاخر نظرة الغرب لكل ما هو شرقي يليها كشف لحقيقة الغرب اللى بيتناسها الجميع ترتيب منطقي جدا للسرد اسلوبك باسم اللة ما شاء اللة اكثر من رائع فى اختيار الكلمات والموسيقى فى كثير من المناطق

غير معرف

سلام الله عليكي ميرا
بجد يداي تورمت من التصفيق لهذا الكلام الرائع وبالطبع هذه كنايه عن شدة إعجابي بإدراجك
فكلماتك سهام موجهة لهولاء مدعون الحريه وسيف بتار علي رقاب مدعون الشرقيه فكلاهما سواء جعلوا منا أضحوكة او مجرد كلمه علي جدران المتاحف أو أسطوره ملحميه
فسأضم صرختي إلي صرختك واقول معك لقومي
هذا هو ما علمت منهم كفانا نوم فإنهم آتون .... كفانا نوم فإنهم آتون .... كفانا نوم فإنهم آتون.
سلمت يداك ودام قلمك
تحياتي وتقديري وإحترامي لشخصك وعقلك

ojg

والله وانتي كمان واحشاني
وبعدين ازاي بتقولي اني مختفيه؟؟
دانا لسه منزله موضوع اول امبارح
:(
ثواني بقى أقرأ وأجي أعلق
:)

ojg

ايه يا قمر الكلام الكبير ده؟؟
هو الفكرة تحفة والأسلوب رائع ومكتوب بحرفية شديدة
اكتر جزء عجبني طبعا المقطع الأخير
واضح طبعا ليه
بس سؤال على جنب
خدتي كورسات العربي دي فين يا عفريته؟؟

nona

كلامك صحيح وكل الاى قولتية بينطبق على الطرفين احنا و هما
احنا راضينا ياخدوا مننا كل حاجة بدون تمن و يوم مادفعوا التمن كان خراب و دمار ومرض لينا وقبلنا اننا نكون ديما بنجرى وراهم بس هما اية
هم وهم كل كلامهم وهم بما يدعون انها الحرية لانهم بيفرقوا مابين البشر حسب الجنسية و شكلهم
بدل الحرية لغاية دلوقتى فيها تفرقة عنصرية حتى فى انتخاباتهم
بلد الحرية بترفض حرية البنت الشرقية هناك انها تبقا محتشمة وتتعلم دينا فاى حرية بيتكلموا عليها
فلو كانت هى تلك الجنة المزعومة التى يقولون عنها فاهلا بنار بلدنا فهى ارحم من تلك الجنة المسمومة

م/ الحسيني لزومي

شارك في الحملة الشعبية للقيد بالحداول الانتخابية وادعو غيرك
ضع بنر الحملة علي مدونتك
البنر موجود علي مدونتي

غير معرف

:d

اختى ايه الحاجات دى

:d

يمكن اخد الفكره دى كمان ولا هيبقا منظرها بايخ

:d

بجد الجهاز كان بايظ ومش باعلق من جهازى :((

Unknown

ميرا عدت الى مدونتك بعد انقطاع تام عن عالم التدوين
والحمد لله ان العودة جاءت على هذا البوست الرائع
وكأن مشرط جراح ماهر بيدك تشرحين الأمة وتكشفين عوراتها وسوءاتها قد تكون الكلمات مؤلمة ولكنها الواقع المرير

لقد جسدتى الام الامة وادوائها فى شخص فتاة بسيطة وهكذا هى فعلا

وما اصدق صرخة النهاية انهم فعلا قادومن الينا لا لينقذونا ولكن ليذبحوا الرجال ويستبيحوا الحرمات وينهبوا الخيرات

فلنصرخ جميعا انهم قادمون لعل صرخاتنا تصل يوما الى اذن حاكم او قائد او شعب فيستفيق وينقذ ما بقى منا

سمـــــــــا

دى اول زيارة لمدونتك والحقيقة انا عجبنى شكل البلوج ومحتواه وطريقة طرحك للمواضيع

اسمحيلى اسجل اعجابى بعقليتك وموضوعاتك ، ولو ان جميع النساء يتميزن بعقلك فهنيئا لهذا المجتمع

تحياتى

ميرا ( وومن )

ريمان

نورتي يا قمر روحي بسرعة مستنياكي


**********************************

ريمان تاني

ربنا يخليكي يا قمر علي الكلام الحلو دة

بس احنا كمان شايفنهم غلط وفاكرين انهم فوق الناس

ميرا ( وومن )

~*§¦§ Appy §¦§*~

أيوة ايوة اول مرة مفاجأة مش كدة

تسلمي يا قمر , وعلا احنا اختذلنا حاجات كتير وضيعنا حاجات اكتر بس مين يحس ومين يفهم


***********************************

ahmed_K

يا اهلا يا اهلا

احنا لنا الله بس وبعدين هانستني لما نصحي ونلاقينا عبيد مربوطين بسلاسلهم
ربنا يستر

ميرا ( وومن )

رئيس جمهورية نفسي

هههههههههههههههههههههه

ايوة انا ميرا وبالثلث كمان تحب تشوف الآي بي

انا عارفة ان شكلي بيصدم ناس كتير بس دي حكمة ربنا هانعترض بقي ولا ايه ؟

ميرسي قوي علي تشجيعك بس انا برضة هاجي ايه فيك
ولا ايه يا ريس

تحياتي

ابو على

يا خرابى على الكلام

بجد انا دماغى لفت واانا بقرا البوست دا اكتر من مره عشان افهمه فييه كلام صعب عليا اوى افهمه

بس انتى بتتكلمى عن حرب العراق صح

او يمكن ازمه فلسطين

ميرا ( وومن )

sherif
وعليكم السلام ورحمة الله وبركاته

سلامة ايديك وبعدين بلاش الحركات دي بعدين الاقيك باعتلي فاتورة العلاج علي المدونة ولا حاجة - هاشيل كمان مصايب التأمين الصحي

ههههههههههههههههههههههههه

نتكلم جد بقي - هي محاولة للتفكير بصوت عالي مفيش مانع اننا نواجه نفسنا بحقيقتنا يمكن نقدر نصلحنا

خالص تحياتي

ميرا ( وومن )

وزة

نورتي يا قمر معلش بقي العتب علي النضارة

ههههههههه مستنياكي


وزة تاني
---------

ربنا يكرمك يارب يا مشجعاني ومقدراني ودافعاني لأمام كاك كاك

إجابة علي جنب

اخدت الكورسات عند اونكلك الشمخشري ( وش بيغمز )

ميرا ( وومن )

nona

فعلا يا نونة نار بلدنا ارحم من جنتهم المزيفة علي الأقل دي بلدنا واحنا اولي بيها وهي اولي بينا


***********************************

حسام يحي

اخويا فينك اختفيت فين الأيام دي ابقي طمني عليم

وانت اصلا مش محتاج تستأذن المدونة مدونتك تاخد اللي يعجبك

والف بعد الشر علي الجهاز ان شاء الله يقوم بالسلامة قريب

ميرا ( وومن )

د / عبد الخالق زهران

حمد الله علي السلامة كنا مفتقدين حضرتك

أستاذي كلنا نعلم عيوبنا ولكننا لا نحاول اصلاحها نكتفي فقط بإستعراضها والتحسر علي ما وصل إلية حالنا من تردي وضعف

ولماذا ننتظر ان يستمع لنا حاكم بل أظن ان علينا ان ندفع حمانا لسماعنا فإراجة الشعوب هي ما تحرك الحكام

خالص تحياتي

ميرا ( وومن )

سما

نورتيني وشرفتي مدونتي المتواضعه

طبعا اسمحلك ولو ان الكلام دة كتير عليا وبلاش لو دي الحمد لله مجتمعنا فيه نماذج كتير لبنات ماشاء الله عليهم حاجة تفرح وبجد بس لسة برضة قدامنا كتير

تقبلي مودتي وتحياتي

ميرا ( وومن )

أبو علي

ماله الكلام بس تلاقيك لسه صاحي من النوم ولا حاجة روح اشرب مج نسكافية ولا كوباية شاي وتعالي هاتلاقية طبيعي ومفهوم

وفي الحقيقة انا مش بتكلم لا عن العراق ولا عن فلسطين لآن ببساطة الحكاية بقت اكبر من كدة بكتير

شرفتني بالزيارة

همس الاحباب

ارفع القبعة تحية واحترام اولا
ثانيا تسلم ايديكى بجد جميلة جدا
وفعلا نقلتى الصورة بعبقرية شديدة
الصورة بين الشرق والغرب
ي إدعاء للحرية إذا كنتم ستنزعون مني الهوية ستصبغوني بصبغتكم الغربية لأكون مسخاً لا أدمية ، وإذا وجدتم في دمائي العبقرية أي مجد توعدونٍِِ ماذا لو طورت سلاحاً ؟ فضد أهلي ستستخدمون أو إلي أعدائهم تبيعون لتبيدوا أهلي وترتكبوا المذابح والجرائم ولدمائهم تستحلون، ماذا لو طورت دواءً يشفي من سرطان أو طاعون عن أهلي ستمنعون والمرض فقط إليهم ستصدرون، أي خدعة للعالم تخدعون وأي كذبه تسوقون وأي خراب بأسم الحرية تبيعون بأس لكم من قومٍ في ملك العالم تطمعون أتهمتموني أني شرقية فكفاني فخراً بها فطمس هويتي وشرقيتي هو ما إليه تتطلعون .
- سأعود إلي قومي واصرخ بهم هذا هو ما علمت منهم كفانا نوم فإنهم آتون .... كفانا نوم فإنهم آتون .... كفانا نوم فإنهم آتون.
النهاية عجبتنى قوى قوى
كلمات جامدة ومعبرة
تحياتى

محمد مارو

ايه ده ؟
بجد نوووووووووو تعليق
مفيش غير رااااااااااعه بجد

اما عن حاجات تغيظ فانا اعتقد انه او انها تريد منكى وضع صوره لملابس محجبه منها ايمان بقضيتك و منها نشر للحجاب فى اى مكان او زمان

حمادة زيدان

ميرااااااااااااااااا

يا بنتي نضجتي بشكل فظيع ... القصة جميلة جداً وجمعتي فيها كل أسباب فشلنا كشرقيين , نسينا أصول الدين ومسكنا في قشورة , نسينا عادتنا وتقاليدنا ومسكنا في القشور , أصبحنا مجرد قشور لا تستطيع أن تفعل شيء ... وعلى رأي البت لقاء الخميسي في "راجل وست ستات"
بقينا رد فعل ومش فعل

ربنا يرحمنا

على فكرة انتي رائعة في القصة دي والله

Unknown

كفانا نوم فانهم آتون

نهاية رائعة لافضل مقارنة مبسطة ماين الغرب والشرق وعذرا فلست اراها سوى مقارنة من اروع ان لم تكن بالفعل هى الاروع فى وصف الحياة غربا وشرقا ماذا كنا والى اين ذهبنا

تحياتى ميرا للقلم الذى سطر ذلك الابداع

غير معرف

ميرا

بدايه أحب أقول ان اسلوبك جميل ومتزن

وقوى ومرن وحاجات حلوة كتير

وعن الافكر أنا موافقك فى أغلبها بس مش شايف أى امل فى العرب ليومين دول وفى الشرق وعذرينى للغرب حق فيما يفعل فينا فنحن ما جنيناه بأيدينا وصدق من قال لا تسأل الظالم لم ظلم ولكن أسأل لمظلوم لم رضى بلظلم
نيجى قى على التقيل
قصة قصيرة هذه

لا أظن ذلك
فألادب عموما يحاول قدر لمستطاع تجنب الخطابية والاهتمام بالتصوير والسرد والحدث
وان كان ولابد من الخطابية فأنها تأتى بقدر الحاجة دون اسراف
الاسلوب فنى حقا ولكن لا يناسب القصة خصيصا لغتة أقرب الى الشعرية وان لم تماثلها
أما الحدث والتسلسل فيمكن أان يصاغ بصورة أفضل
ولاحظى ساد نمط من الكتابة قريب من هذا لنمط فى بدايات القصة القصيرة الحديثة فى مصر عند ابراهيم ناجى والرافعى والمنفلوطى نماذج منه وتبرأت منه القصة لقصيرة لحديثة تماما وان بقيت ظلال سريالية له
الصور بقدر الحاجة وان ابعدت بنا فى فضاءات الخيال الرحب
أما السرد فغائب أو مغيب عن قصد منك
كفى الآن
ولتعلمى أن ما قلته رأى الشخصى النابع من توجهى النقدى الخاص فإن شئت قبلتيه وإن شئت لم تفعلى وذلك لا ينقص من قيمتك كقاصة مبدعة

تحيتى

ملاحظة اخيرة
أؤمن بأن كل نص له ظروفة وله سلطته الخاصة التى يقرضها على الكاتب فيخرج بصورة معينه لا تنقص من قدرة ولكنها تضيف له الكثير وفى هذا النص رأيت ذلك ولكننى أعترضت على اعتباره قصة لا غير
ويمكن أن ينتمى الى الخاطرة أو االمقالة أو النثر الفنى
ويمكن مع بعض التعديلات الطفيفة عليه أن يكون قصة مع لحفاظ على شكله العام ولغته ولكن افردى مساحة أوسع للحدث والحركة السردية وضاعفى من المشهد وبنفس الاسلوب يكون قصة كبيرة تنتمى لأمثال كتابات ناجى والرافعى

تحيتى ثانية

tarek alghnam

ايه يابنتى الجمال دة
بجد تسلم ايدك
ماشاء الله عليكى
بدخل اقرا هنا مش ببقى عاوز اخرج
تحياتى ليكى

تلميحاتى - يوسف الشافعى

من اجمل ماقرات
ليس تملا ولا رياء فانتى كما انتى تعرفين كيف تعبرين وتمتلكين الادوات لما تريدين وتسخرين قلمك لافكارك بزكاء
اعجبنى حقا المشاهد التى صورتيها بقلمك ورؤيتك لسفينه مملوءه باولاد العم سام
لكن الحقيقه هم افضل منا بكثير
هم يعملون
وتفانون فى العمل
لديهم تقديس للحريه الفرديه مدامت لاتضر احد
انتى فيكى الكثير منهم تمتلكين ادواتك وتستطيعى تطويعها كما تشائين
مالم يعجبنى انهم يوجهون الينا المرض والسلاح
اذا كان كذلك فبالله عليكى من اين الدواء الموجود لدينا ومن اين مالدينا من اسلحه للدفاع عن انفسنا
هم لهم الحق ان يفعلوا مايشاءوووون
مدام يمتلكون الادوات التى يطوعوها لمصلحتهم اما نحن نائموووووووووووووون
ولن نستيقظ لاننا فى سكرتنا عاهمون

mohamed

لا لجلد الطبيب المصرى بالسعوديه 1500جلده

Abd-Alrahman

كلامك جميل اوي يا ميرا
بجد
انا قريت البوست اكتر من مرة
بالرغم من اني بقالي اكتر من شهر ماجيت ع النت
ولكن مدونتك برضة هيا اكتر جاجة متعتني
كتاباتك هايلة
وربنا معاكي

بصي اي حد بيكون فيه لو حاجة واحدة بس غريبة عن المجتمع
المجتمع كله بيتهمه بانه مختلف وانه وانه وانه
ومهما عمل مش هيعرف يرضي كلالاراء ولا كل الاطراف

المهم يرضي ربنا وبعد ربنا يرضي نفسه ويكون عنده ثقة ويكون مقتنع بيها

حاولي وربنا معاكي
وبجد شخصيتك من اجمل واروع واعقل الشخصيات الي قابلتها في عالم التدوين

عسي الحزن ما يعرف دربك
متنظر زيارتك لمدونتي المتواضعة
بيدو

اقصوصه

جميل ما خط قلمك

اسجل اعجابي بما قرأت

محمد فاروق الشاذلى

أؤيدك بشدة فيما ذهبتى إليه، يجب أن نتمسك بهويتنا ونعمل ونجد لتطوير عالمنا وتعديل واقعنا، يجب أن نعمل بجدة لتسترد موقعنا فى الصدارة.
أحييك على البوست.

ميرا ( وومن )

همس الأحباب

ترفع القبعه مش خايف بعدين تاخد برد

هههههههههههههه بهنزر نتكلم جد بقي

والله يا خالد اخجلتم تواضعنا ميرسي علي التشجيع

خالص تحياتي ومودتي

ميرا ( وومن )

محمد مارو

نو تعليق ازاي امال ده يبقي ايه ؟

ميرسي يا مارو علي كلامك

بخصوص حاجات تغيظ حتي لو ده هدفها أو نيتها فأسلوب الطلب مستفز ساعات طريقتنا بتضيعنا حتي لو كنا علي حق

تحياتي

ميرا ( وومن )

حمادة زيدان

حلوة نضجت دي يا حمادة تفتكر ممكن اقدم ساخنة مع السلطة

هههههههههههههههههههههههههه

بهزر طبعا بس بجد يا حمادة دي شهاده اعتز بيها منك

وفعلا احنا بقينا رد فعل مش فعل

شرفتني بتعليقك تحياتي

ميرا ( وومن )

المحارب المتيم

عرفة

ولا انا كمان عندي اي امل في العرب ربنا يعافينا يارب

نيجي بقي للتقيل

اولا انا موافقة علي كل اللي انت قولته ومش ممكن ازعل من كلامك خالص لآني مع النقد البناء وبفرح بية جداً خاصة لما يكون من صديق عزيز

انا فعلا لما كتبتها كنت عارفة انها مش قصة لكن كمان مكنتش عارفه هي ممكن تكون ايه واديني عرفت

اشكرك علي المعلومات القيمة جدا اللي بتقدمهالي

بالنسبه للتعديلات ممكن قدام شوية ان شاء الله ابقي اعيد صياغتها

خالص تحياتي واحترامي ومودتي

ميرا ( وومن )

طارق الغنام

اشكرك علي كلماتك المشجعة وعلي زيارتك التي دائما تسعدني

تحياتي

ميرا ( وومن )

تلميحاتي

حاش لله يا استاذنا مين يقدر يقول عن حضرتك مرائي اعوذ بالله

واشكرك علي مجاملتك الجميلة

سيدي نحن من اوقعنا انفسنا في شباكهم بإتكالنا عليهم وإنتظار معوناتهم وفضل اختراعاتهم ياليتنا نعي الدرس و نتغير

تحياتي

ميرا ( وومن )

mohamad

كان من الأولي قبل ان تعرض قضيتك ان تقول رأيك فيما كتب فكيف استمع لك وانت لم تكلف نفسك مشقة الإستماع إلي ؟؟!!!!!!!

ميرا ( وومن )

عبد الرحمن

أشكرك علي اهتمام بمدونتي المتواضعة

وأشكرك علي أنك الوحيد اللي أخد باله من نقطة الإختلاف مع اني لم اقصد شخصي بشكل خاص لكنك محق فيما تقول

أشكرك مرة ثالثة علي رأيك في

تحياتي

ميرا ( وومن )

اقصوصة

تحياتي لكي واشكرك علي زيارتك الكريمة


***********************************

قلب مصري

معك في اننا يجب أن نتمسك بهويتنا

لكن قبل ذلك إين هويتنا هي الآن ؟

سؤال لابد من الإجابه عنه اولا

تحياتي

حسن مدني

نعم إنهم قادمون إلينا، ليمسحوا هويتنا بزعم التحرير، وينزعوا بقية فضائلنا بدعوى التنوير، ويسرقوا خيراتنا بحجة التطوير.
ويساعدهم على ذلك، إحساسنا بالانكسار والهزيمة والاغتراب في أوطاننا.
فمتى يصحوا قومي من سباتهم؟ وينفضوا عنهم الكسل؟
لعل ذلك قريبا.

تحياتي

غير معرف

اكيييييييد طبعا ان مش هازيد حاجه عن ال 44 اللي سبقوني

بس فعلا اسلوبك اكتر من رائع

و مستني المزيد من توبيكاتك

شفـقــة و إحســــان

حلوة اوى اوى يا ميرا
والاحلى منها انتى طبعا
انتى فين يا بنتى وحشتينا خالص
شفقة

شفـقــة و إحســــان

حلوة اوى اوى يا ميرا
والاحلى منها انتى طبعا
انتى فين يا بنتى وحشتينا خالص
شفقة

ميرا ( وومن )

حسن مدني

المصيبة اننا نعلم انهم قادمون ولا نحرك ساكناً

إلي متي هذا الموت الإكلينيكي وثُبات اهل الكهف

تحياتي

ميرا ( وومن )

شوكت

اشكرك علي زيارتك وشكرا علي تشجيعك

ميرا ( وومن )

شفقه هانم وإحسان بيه

تسلمي يا قمر

وانتم كمان وحشتوني بس انا موجودة وبتابعه الدور والباقي علي اللي مش بيجوا غير كل فين وفين

غير معرف

فين خيالك يا ميرا

مقدرش أقول عليها قصة

دي مقالة ،

يعني عرضتي الفكرة بشكل مباشر جدا

كمان في بعض الكلمات تحسي أنك بتحاول

تعملي قافية للكلمات ، زي يعني محسنات

بديعية وده بيقطع انسيابية النص .

طبعاً الحماس كان جميل

وفكرة أننا دايما في ذيل القائمة

وأننا والغرب خطين متوازين لن يلتقوا

والفخر أننا شرقيين .

بس ساعات الواحد بيتخنق أنه شرقي

مجتمع ذكوري غبي

يعني والنبي المرأة واخدة حقها

ولا الراجل واخد حقه .

جميل أن نحاول أن نوقظ أنفسنا من السبات العميق..

بصراحة يا ميرا دي أقل حاجة قرتهالك .

لأن عندك حاجات جميلة جدا .


أتمنى لكِ دوام التوفيق .


أخوكِ نيجــر .

ميرا ( وومن )

نيجر

عندك حق انا معاك بس بلاش اقل حاجة دي

لكن الفكرة جاتلي كدة في الحقيقة انا صممت اكملها كدة

عموما هاعوضهالك المره الجاية

تحياتي

!!! عارفة ... مش عارف ليه

طبعاً واضح الجهد الجهيد المبذول

واعتقد إنه أرهقك جداً
إلى أن رضيتي عنه بهذا الشكل

والفكرة نفسها جميلة جدا إنك تاخدينا لحوار الحضارات ده في رحلة أشبه بالحلم

وبمنتهى النعومة والسلاسة دون أن نشعر أن هناك مشكلة بين المقدمة ولُب الموضوع وصولاً للحوار الدائر بين الشرق والغرب

وتناولك وجهة نظر كل طرف موضوعي جداااا
وده على الرغم شرقيتك إلا أنك تكلمتي عن الشرقيين بمنتهى الحيادية ما لهم وما عليهم

ولم تتجني في الهجوم على الآخر بل أعطيته حقه وأن الخطأ ليس خطئه



-------------
على جنب كده
شكلك نجحتي في اللي
فشل فيه وحيد حامد
---------------

بجد الموضوع تقيييييييييل

ويتحط في الـ CV بتاعك

الممتن لكل إبداعاتك
وليد

Siguiente Anterior Inicio