29

أديني رجعتلك

أخيراً خلصت إمتحانات أخيراً بستمتع بالأجازة وزي ما بيقولوا أصعب من أنك تبدي شئ هو أنك تنهية أخر ميل هو أصعب ميل لأنك بتكون في قمة تعبك وزهقك وإرهاقك ومش بتتحرك غير بدافع أنك قربت تخلص.
كانت سنة صعبة ، صعبة في كل شئ وغير متوقعه يعني فعلاً متوقعتش كمية المشاكل اللي قابلتني فيها ولا نماذج الناس الحلوة والوحشة ولا اتوقعت اني اتغير اكتر من مرة في فترة قصيرة كدة أو اكتشف اللي اكتشفته أو اتعلم اللي اتعلمتة وده مش علي المستوي المعرفي بس والإنساني كمان ويمكن بصراحة تجربتي مع الدبلومة دي مكنتش ثرية معرفياً أكتر منها إنسانياً البداية دايماً هادية متفائلة مبشرة بالخير لكن لما تدخل في العمق اكتر بتشوف الصورة أوضح وتبان درجات الألوان الغامقة.
وده فعلا اللي حصل بعد بداية موفقة جداً مبشرة بكل خير وصحبة طيبة – علي الأقل كنت فاكرة كدة – أبتدت الحقايق تبان والأقنعة تنكشف وكعادتي لقيت نفسي في معركة طاحنة أستخدمت فيها كل الأساليب المباحة والغير مباحة وزي ما هيلين الجميلة كانت السبب في قيام حرب طروادة لعبت انا كمان دور مهم في قيام الحرب دي مش طبعاً لأني في جمال هيلين ولا في ملوك بيتخانقوا عليا بس لأن هوايتي هي الغوص في أعماق الناس وكشف حقيقتهم وبرضة مش علشان انا حشرية لكن لما بيكون في حد بيديني إحساس انه مدعي تلقائياً بسعي ورا القناع لحد مشيلة وده سبب إني حد علي حسب تعبير ماما بتاعة مشاكل لأني بتحول في لحظة خاطفة من صديق لعدو لدود.
وجت اللحظة دي علي حين غرة يعني اتاخدت خوانة ولقيت في لوبي معادي بيتكون ضدي وطبعاً بعد ما معسكر الأعداء ضرب الضربة الأولي قعدت مع خط الحماية بتاعي ( بابا وماما ) وشرحتلهم الموقف بكل أبعادة وأسبابه وكان قرارهم زي ما توقعت هاكمل للنهاية والحمد لله قدرت أقف لوحدي في المشكلة اللي وقعت نفسي فيها بسبب إني عرفت حاجات كتير مش المفروض اعرفها عن ناس كتير وبجد عاوزة اشكر كل الناس اللي وقفت جنبي وساعدتني وساندتي سواء معنوياً أو فعلياً وبجد هاخص بالشكر آبي كوكب آبي ومحمود رئيس جمهورية نفسي و دودو قوس قزح بجد وقفتكم جنبي لا تنسي وكفاية أنكم إديتولي جزء من مجهودكم ووقتكم وإهتمامكم في الفترة الصعبة دي.
طبعاً الكلام ده ممكن ناس كتير تشوف إن فيه مبالغة أو تضخيم بس الحقيقة أسواء شئ ممكن تعملة في حياتك أنك توقف أي حد قدام نفسة وتقولة شوف حقيقتك حتي لو كان الحد ده إنسان عادي جداً لأنك ساعتها ممكن تكون مهدد بأنك تشوف أسوأ ما فيه.
المهم إني أكتر شئ بيغري الناس لمحاربتي هو أنهم بينخدعوا في شكلي ، دي حقيقة فعلاً لأن شكلي عبيط خلقة ربنا أو بمعني أصح شكلي بيوحي للناس إني حد طيب زيادة عن اللزوم ومليش في أي حاجة وفي الحقيقة دة بيسهلي مهمتي جداً لأن المتوقع مني اني مش هافهم اللي قدامي ولا اقدر تصرفاتة بشكل سليم لكن الحقيقة إني والحمد لله عندي نفسية مقاتل وعنيدة لأقصي درجة والتهمة الكبيرة بقي اللي بقت عاملة زي الشتيمة إن مخي نضيف ودي مش ميزة فيا علي قد مهو عيب في اللي قدامي لأنه استهان بيا من الأول.
خلاصة التجربة الصعبة دي إني خرجت منها أقوي بكتير خروج المنتصر والحمد لله واني علي اخر السنة كنت فعلاً اتغيرت وابتديت بدل ما اكتفي بشكلي المسالم إني أظهر شئ من قوتي الداخلية.
كمان إني عرفت ان كل واحد جواه بني أدم شرير مستني فرصة , ودي كانت فرصة كويسة اتعرف علي أنا الشريرة وأكتشفها وأتخلص منها في الوقت المناسب.
طبعاً في حاجات أنا عملتها مش راضية عنها خالص لأني مش ملاك لكن وقتها فهمت الجملة اللي خيخة حطاها علي مدونتها اللي بتقول لا تجعل سفاله الآخرين تكشف عن مدي سفالتك في الحقيقة مش لازم تكون سافل علشان ترد علي سفالة حد تاني كفاية انك تكون أنبل منه علشان ينخرس أو يحس علي دمة وينكسف ويتراجع عن عمايلة.
بس المهم نعرف غلطنا وتكون عندنا شجاعه اننا نعترف بيه ونعتذر عنه ونندم علية بجد وده اللي انا عملته والحمد لله.
وفي ساعات النهاية الأخيرة أتأكدت في إني فعلا خرجت منتصره لما وصلتني أخر رسائل معسكر الأعداء واللي اعترف فيها اني كنت خصم جبار علي حد تعبيرهم وعندي مقدرة احسد عليها في تحمل المشاكل والتعامل معاها لفترات طويلة وانهم مكنوش متخيلين اني هاقدر اصمد بالعكس كان توقعهم رفع الراية البيضا من أول إعلان الحرب .
اعدائي اللدودين الشئ الوحيد اللي مش حاطتوه في حسابكم إني كنت صاحبة حق وأنتم حاولتم تحولوا الحق للباطل .
إني كنت أصرح وأوضح منكم وضايقتكم الصراحة والوضوح زي ما النور بيضايق الخفافيش.
اعدائي اللدودين أشكركم لأني بفضلكم أقوي مرات أجرأ أصرح .
أعدائي اللدودين أشكركم لأني بفضلكم خرجت أسواء ما في من جوايا واني بفضلكم إنسان أفضل.
شكراً لأنكم كنتم إضافة لخبراتي في الناس والحياة ، شكراً علي كل دقيقة قضيتها ضدكم لأنها كانت تستاهل.
مدونتي العزيزة اديني رجعتلك بكل شوقي وحبي وحنيني علشان احكيلك وتسمعيلي زي ماعودتيني.

29 قالوا رأيهم:

همس الاحباب

الف مبروك على الامتحانات
وحمد لله على السلامة رجوعك
والحمد لله خروجك من المعركة منتصرة
تحياتى

أحمد سعيد

ميرا الجميلة

الحمد لله على السلامة

نورتي هنا يا قمر

وعندك حق والله

أكبر مشكلة بتقابلنا هي الأقنعة

الناس تفضل لابساها

لكن عمرها ما بتفضل

لأنها بتسيح من الشمس مع مرور الوقت .

ربنا يسعدك يارب .

أخوكِ..نيجــر .

Empress appy

اعدلى اسمي يا بت انتى اسمها كوب ابى ولا كوكب ابى اللهي يوعدك بخروف احول ينطحك
شكرا على ايه يا ميرا هي الحياه كده ربنا يكفينا ويكفيكى شر البعيد والقريب

MaNoOoSh

عارفة انا اكتر حاجة عجبتنى انك مسكتيش الا لما اخدتى حقك.

والحمد لله ان الامتحانات خلصت على خير.. ونورتى المدونة تانى.

دعاء مواجهات

عود أحمد ياقمر حمدلله على سلامتك

تعرفى اجمل من كل دا اية انك تكونى على وعى كامل بية مش تمرى بكل حاجة ولا واخدة بالك ولا حاسة بشئ الاحساس والتخزين والتعبير عنه مهم اوى طبعا

===========
اعدائي اللدودين أشكركم لأني بفضلكم أقوي مرات أجرأ أصرح

رغم عدم حبى لكلمة اعدائى دى الا انى عجبنى انك بقيتى اقوى علشان تقدرى تواجهيهم

تحياتى وحبى ..

safa7_karmooz

مش فاهم اى حاجه فى اى حاجه...ههههههههههههههه

بس المهم يعنى حاولى مش تغوصى جوا كل الناس كده ...الا ناس معينة يعنى...عشان بتجيب مشاكل فعلا :D

وكويس انك خرجتى من المعركة غانمة سالمة ....^_^

وويلكم باك

romansy

حمد الله على السلامه نورتى مدونتك رجعتيلها الحياه تانى من جديد
الحمد لله انك خلصتى امتحانات ورجعتيلينا بالسلامه والله يكون ف عونك فى المشاكل الكتير اللى قابليتها بس الحمد لله لقتى ناس كتير جنبك علشان تعرفى ان برضه لسه الدنيا بخير

Unknown

حمدا لله على السلامة :)
التجارب الثرية انسانيا دي مفيدة اوي..
اي تجربة بتضيف لخبرتك و بتحميكي مما سيلي بعد .. يبقى تستحق التوقف و الاحترام ..
المهم انك ماتنسيهاش .

زى الهوا

هههههههههه

كل دى تجارب ؟

مبروك عليكى الاجازة

موناليزا

وحشتييينى ياجميلة وعودا احمدا
نورتى مدونتك وعالم المدونات كله:)

بجد سعيدة بالنهاية دى وباحساسك الجميل فى الانتصار والتغلب على اعدائك
وحقا لايضيع حق وراءه مطالب به
تمنياتى لكِ دائما بكل الخير والتوفيق

Kiara

حمد الله علي السلاامه

اخير العثل رجع


حمد الله علي السلاامه

اتي بوثه كبيييييييييييله

وحشتيني وربنا

romansy

مدونتى كلها تحت امرك
استلفى اللى حضرتك عاوزاه من غير استذان
انا تحت امرك

mira

اولا اجازة سعيدة ان شاء الله
ثانيا احيانا الظلم بيقوى الواحد ودة طبعا اللى حصلك
ثالثا فى جملتك بتاعة الواحد بيخرج سفالتة بسبب سفاله الناس دى احيانا بتنجح وتوقف الناس عند حدها
بس فى ناس سفلة اجارك اللة ما بيأثرش فيهم حاجة ربنا يبعدهم عنك وعنا
اتمنالك التوفيق
تحياتى

Ehab

مبروك يا ستي انك خلصتي ورجوعك نورنا وصدعتينا بالبوست الخمسميت صفحه ده
ههههههههههههههه
لا بضحك
بس ابقي سيبي سطر يا اختي هم مقالولكيش في الدراسات بتاعتك دي تسيبي سطر علشان عينينا متوجعناش

المهم زي ما قلتي كل حاجه في حياتنا بتعملنا حاجات كتير قوي مش بس علميا لكن تعاملنا مع الناس هو اللي بيعلمنا ومحدش بيتعمل بلاش طبعا
لازم نتعور ونتخبط ونتداوى برده ونخف
ربنا يعوضك خير ويوفقك يارب


تحياتي ليكي

سلااااااااااااااااااااام
اخوكي ايهاب

سبهللة

حمدا لله على سلامتك
ومبروك انك خلصتى من الامتحانات وزهقها

أنا حر

اتمنالك اجازة سعيدة يارب تكون اجازة من كل المشاكل اللي اتعرضتي ليها الفترة اللي فاتت وكمان تكون فترة نقاهه تستعيدي فيها قوتك وتوازنك
تحياتي

ميرا ( وومن )

همس الأحباب

الله يبارك فيك يا أبو همس ميرسي قوي منجيلكش في أي خناقة يارب


***********************************

أحمد سعيد

نيجر بجد والله انا زهقت من الإدعاء والأقنعة

هي فعلاً مبتفضلش مهما طال وقت إرتدائها

ميرا ( وومن )

Appy

علم يا فندم ونفذ بس برضة الشكر واجب يعني بجد لو مكنتيش شجعتيني مكنش عملت حاجة وفضلت مش طايقة نفسي

اللهم آآآمين يا قمر

-----------------------------------
MaNoOoSh

محدش لازم يسكت علي حقة اللي ليه حق وميسعاش وراه بيشجع الطرف التاني علي انه يستهبل اكتر

اه بجد الحمد لله إن الإمتحانات خلصت منوراني منوراني

ميرا ( وومن )

دعاء مواجهات

ازيك انتي وحشاني خالص ابقي تعالي علي الماسينجر شوية نرغي

تصدقي فعلاً عندك حق مهم قوي نرصد التغيرات اللي بتحصلنا وتأثر الناس علينا

انا كمان مش بحب كلمة أعداء بس مفيش كلمة تانية هاتوصفهم

-----------------------------------
safa7_karmooz

نفسي مرة تعلق عندي علي حاجة وتكون فاهمها

أنا فعلا بحاول بس في ناس بتستفزني كدة اعملها ايه

الحمد لله واهو كان تدريب كويس علي ضبط النفس اصلي من زمان اسمع عنه ومعرفوش

ميرا ( وومن )

romansy

ميرسي الله يسلمك ومنور المدونة

الحمد لله كلة بيعدي الحلو بيعدي والوحش بيعدي

الدنيا بخير طول ما في نا فيها خير يا رومانسي

-----------------------------------
قهوة بالفانيليا - شيماء علي

حمد الله علي سلامتك أنتي ورجوعك تنوري مدونتي

هي فعلاً تستحق الإحترام والتسجيل والإشادة كمان

ومأظنش اني سهل انساها

micheal

عود أحمد
أخييييييييييرا يا ميرا
ألف حمد الله علي سلامتك وكفارة يا شيخة من الامتحانات وسنينها وكويس أن ازمتك خلتك تعرفي عدوك من حبيبك
تحياتي يا ميرا

ابو صهيب ( الجمعاوي الاصيل)سابقاً

اولاً نهنئك على الانتهاء من فترة الانطحانات كما يقولها احد اصدقائي

ثانياً هذه هي الحياة نخرج من معارك لندخل في غيرها

وعلى راي الشاعر

وما الحياة الا معركة كبيرة

ومصاريين البطن بتتعارك

ميرا ( وومن )

زى الهوا

اه تصدقي انا حسيت اني فار تجارب

منورة المدونة

-----------------------------------

موناليزا

انتي وحشتيني أكتر ميرسي يا جميلة ده نورك

ميرا ( وومن )

كيــــــــــــارا

ميرسي خالث خالث وانتي كمان ليكي وحشة برضة

-----------------------------------

romansy

ميرسي يا رومانسي هو ده العشم انا هاستلفها وحقوق المليكة الفكرية محفوظة طبعا

ميرا ( وومن )

mira

هههههه بجد انا حاسة اني برد علي نفسي هو ميرا ده اسمك الحقيقي

ميرسي علي الزيارة منورة بجد

بس انا مختلفة معاكي مش معني ان الناس اللي حوالينا تبقي سافلة نبقي احنا كمان سافلين بالعكس مش لازم نخلي اللي حوالينا يطلعوا اسوأ ما فينا لازم نخليهم يطلعوا مننا احسن ما فينا
اومال فين أخلاق الفرسان يا مرمر

-----------------------------------
الشنكوتي الكبير

مه طبعا لازم أصدعكم شوف بقي بقالي قد ايه شايلة في قلبي وساكتة

والله يا إيهاب حكاية المسافات دي عيب في القالب بتاع المدونة حاولت كتير اغير المسافات علشان توسع ومفيش فايدة لو تعرف حد بيعرف لغة البرمجة بتاعه القوالب ابعتهولي ولك دعوتين

ثانياُ بقي عندك حق هي الدنيا كدة المهم اننا نتعلم ونبقي أحسن

بجد منورني منورني

ميرا ( وومن )

سبهللة

الله يسلمك ويبارك فيكي الحمد لله الواحد يرتاح بقي

-----------------------------------

أنا حر

بجد ميرسي ولو انها اجازة من الدراسة بس عقبال ما اخد اجازة من الشغل علشان اعرف بقي ابتدي فترة النقاهة دي

ميرسي علي الزيارة

ميرا ( وومن )

micheal

ميشو فعلا كفارة ياااااااااااه انا حاسة اني فعلا اخدت حريتي

فعلا وعلي رأي المثل تسلميلي ياشدة عرفتيني عدوي من حبيبي

وعجبي

-----------------------------------

ابو صهيب ( الجمعاوي الاصيل)سابقاً

نشكرك علي التهنئة الرقيقة هي فعلاً إنطحانات

وصدق قول الشاعر أكيد ساعتها كان عندة انتفاخ ومصارينة مقومة معركة طاحنة

غير معرف

السلام عليكم

ازيك يا ميرا يارب بخير دايما

وفى انتظار خبر النجاح بتفوق ان شاء الله

والحمد لله انك استفدى من تجربتك دى

ويارب دايما من أحسن لأحسن

مريت للسلام

رغم انى حزين للمشاكل اللى واجهتك

!!! عارفة ... مش عارف ليه

افتكر إن الامتحان مكانش امتحان في الدبلومة وبس

أفتكر أنه كان موقف وجود

وبالرغم من لحظات الضعف اللي ممكن تكوني مريتي بيها إلا أنك كنتي أد الوعد

وبترفعك عن الصغائر أعتليتي القمة وإن كان باقي عليها الكثير والكثير لكنك وضعتي خطواتك على درب النجاح بالفعل

وإن شاء الله إلى مزيد من التوفيق اليوم وغداً .. أيضاً ودائماً

إن شاء الله

وليد

Siguiente Anterior Inicio