31

العنب عنبي



كل سنة وانتم طيبين طبعاً انا بقالي كتير مش بكتب وقاعدة ساكتة اهو بس رمضان بقي جاي معايا بكوميديا ، تعرفوا ان رمضان ده فرصة للتهيس والنسيان والكلمة اللي علي لسان كل الناس صيييييييام بقي طيب

المهم بقي إن بونتي حبيبي ( اللي هو بابا يعني ) أول رمضان كدة خرج يجيب طلبات البيت وجه علي باله يجيبلنا عنب – عادي جداُ – اللي مش عادي بقي ان يظهر والله اعلم انه ملقاش مكان في التلاجة يحطة فيه فسابه جنبها وهو كان محطوط في كيس اسود ومكنش حد في البيت وبعد شوية صيام بقي فنسي وماما جت طنشت الكيس عاااااادي جداً وكلنا بقي رايحين جايين من قدام التلاجة والكيس دة مش عاملنا أي مشكلة – طالمة مش مطلع ريحة وحشة –

لحد كدة مكنش في أي مشكلة المشكلة حصلت تاني يوم الصبح لما بابا افتكر الكيس ولقي نص العنب باظ خلاص والباقي مش هايستني للفطار وطبعاً الصيام كانت حجة كويسة علشان كلنا نتنصل من المسئولية وكان السؤال الأهم هانعمل ايه في العنب الباقي ؟؟؟؟

انبرت ماما طبعا بأفكارها الجهنمية ونقت العنب عنبايةعنباية علشان تفرز السليم من اللي باظ وسلقت السليم وفردتة علي صاج لييييه بقي ؟؟؟؟؟؟؟؟ علشان هاتعمله زبيب – اصلا محدش بياكلة في البيت –

انا بقي معرفتش كل التفاصيل دي غير لما صحيت ولقيت ماما حاطة الصاج علي ترابيزة الأنترية فسألتها وحاكتلي حكاية العنب من طأطأ للصاج وهنا كان ليا وقفة

- طب ممكن أعرف انتي حاطة الصاج هنا ليه مش في البلكونة ؟

- علشان العصافير اللي علي الشجرة – اللي بابا زرعها – ممكن تاكل العنب عنبي ، والعصافير اللي في الأقفاص اللي بلكونة – بابا اللي بيربيهم – ممكن ريشها والرابش بتاعها يقع علي العنب عنبي

- ماشي يعني بونتي بقي حضرة المتهم أبي بتبويظ مشروع الزبيب بتاعك

- أيوة

- طيب مش ممكن تغطي مشروعك بالبلاستيك الشفاف اللي مخزناه تحت المرتبة واهو يبقي له فايدة

- انتي عاوزة العنب عنبي يعرق ومشورعي يبوظ ويشمااااته طنط ظاظا فيااااا

- لا ياستي ميرضنيش ويارتها بس طنط ظاظا اللي هاتشمت لوحدها أحم احم ما علينا ام هند يا مامتي هاتسيبي مشروعك يتجفف هنا يعني ويأنسنا في الليفنج كتير ولا إيه

- امممممممممم طيب انا هاتصرف

وكان تصرف مامتي كالأتي حطت الصاج في أوضة اخويا – اتجوز وسابها – وشغلت المروحة علي العنب الأوضة دي في ذات نفس الوقت هي اللي انا عملتها صومعة وقاعدة فيها ليل ونهار قدام الكبمروطر بتاعي وفي ذات نفس الوقت برضة بونتي حبييبي بيستغل الشيفونيرة اللي بقا ادراجها فاضية وبيحط فيها حاجات العصافير علشان هوذه الأوضة قريبة من البلكونة

انا بقي سيبت ماما تشغل المروحة علي العنب عنابها واديت المروحة ضهري ( أدي ضهرك للمروحة لاالبرد في جتتنا يرعي ) وبابا بقي داخل خارج عليا وفي الاخر سألني وقالي

- ممكن أفهم انتي لية مشغلة المروحة وموجهاها التاحية التانية ؟؟

- مش انا يا بونتي دي ماما مشغلاها علي العنب علشان يتجفف

- ها ليه بقي ؟

فشرحتله الأسباب المنطقية التي تجعلة بطريقة مباشرة وغير مباشرة متآمر علي مشروع ماما الكبير العنب عنبي وفي الحقيقة بونتي تقبل الأسباب دي بصدر رحب وروح رياضية ونادي علي ماما فحضرت لفورها وقالها بمنتهي العقل والحكمة في آن واحد

- انتي اللي مشغلة المروحة علي العنب صحيح

- أيوة

- ياسلام يعني علشان كيلو عنب بخمسة جنية ميبوظش تدفعيني 50 جنية كهربة زيادة

آن آن أأأأأأأأأأأأأأأأأأأأأأأ دشششششششش وأسقط في يد ماما – مش عارفة يعني ايه بس ماشية مع حالة ماما ساعتها – وطأطأت راسها في هزيمة نكرااااء وراحت طافية المروحة من سكات وخارجة من الأوضة وانا وبابا ماسكين روحنا من الضحك لحد ما تبعد وبعدها انطلقنا في القهقهة وخصوصاً بابا وهو فرحان فرحة اللعيب اللي دخل جون في شباك الخصم وجون وجون وجووووووووووووووووووووووووون يالعيب 1/ صفر يا بابا والجايات اكتر

طبعاً كان عقابنا اننا ناكل بعدها بيومين كنافة بالزبيب اللي نص زبيب ومحدش قدر يتكلم بس بصراحة الكنافة كانت بالكريمة وطعمها هايل علشان خاطرها ينبلع الزبيب نص سوا

هل لحد كدة خلصت حكاية العنب عنبي كلالالالا البطة أنتظروا الجزء التاني اللي أبتدي فيه المشروع علي كبير



31 قالوا رأيهم:

Appy

يا بنتى كنتى سالتينى
كنتى قولى لماما تحط حاجه خفيفه على الصاج زي الشاش كده ماما اصلها تخصص عنب عنبك ده بالا بالهنا والشفا

safa7_karmooz

هههههههههههههههههههه

كل ده

طب ما تباصى حبة كنافة كده ولا حاجه

ريمان

هههههههههه


منتظرين الحزء التانى


حلوه اوى موضوع العصافير اللى عايزه تاكل العنب ده


وربنا يخليلك بونتك يا قمر

adel

هههههههههه
بونتي ده شكله عثل قوي
عرفيني عليه
هههههههههههه
وكمان عصافير .....ههههههه
ياعيني علي ماماتك
وانا بحب الزبيب ابقي هاتيلي شوية

نور الدين
أزال المؤلف هذا التعليق.
micheal

ياااااااااااه ميرا..مش ممكن
يا للهول..رجعتي تكتببي تاني
لولولولولي
يا بنتي كتر خير ماما حبت تنقذكوا
:)
ابعتليلي بقي شوية كحك أو كيكة بزبيب
:)
تحياتي

نور الدين

طب هو كان كام كيلو يعنى عشان بس نعرف نقدر حجم المشكلة ؟؟؟؟
ثانيا انا اول مرة أعرف طريقة عمل الزبيب اشكريلى ماما على المعلومة الهايلة دى
ثالثا بقى مكانت اشترتلها ربع كيلو زبيب
وريحت نفسها من المؤامرات اللى عماله تعمليها عليها دى
رابعا بقى ودة الاهم كل سنة وانت طيبة
بس خلاص

قوس قزح

هههههههههههه
و ماله عصير العنب ؟
بقى كل الوقت و المجهود ده علشان كبشة زبيب ؟؟

و الله انا لو منها كنت سيبتها للعصافير و اخدت ثواب افطارها ..اقصد اطعمها

بس عجبنى جون بابا اوووى
جيه فى التمانيات ههههههههههههه

مستنين الجزء التانى .. واضح ان الموضوع كبر فى دماغها :))

صاحب المضيفة

المهم ان الكنافة كانت حلوة بالكريمة

وده اهم ما في الموضوع


كل سنة وانتي طيبة يارب وفي احلى حال


تحياتي

Sharm

بحب الفيمتو جدا او راوخ
احسن عصاير عنب

Mo7ammed

فى فكرة لزيزة اوى بدل كل ده
من عند اقرب عطار
وهاتو نص كيلو زبيب ^_^

تحياتى لخفة دمك ومدونتك اللزيزة

كل سنة وانتى طيبة
وفى انتظار الجزء التانى

عرفة فاروق عبد الله

السلام عليكم
انتى عارفة انا على قد ما انا زعلان على الزبيب اللى باظ على قد ما انا فرحان ان بونتى كسب نقطة

ههههههههههه

بس ليه مش بتاكلوا زبيب
ده زمان قالوا اكل الزبيب يقوى الذاكرة ويزيد الفهم
واكل الباذنجان _ رغم انى بحبه مقلى ومخلل _ يضعف الذاكرة

مفيش حلويات يتقال عليها حلويات من غير زبيب وسودانى

آه من قلبي

ايه دة بقى
انا عيزة اعرف الباقي
وبعدين يا بنتي انت تبعتيلي الزبيب في البيت اخواتي هيخلصوه ف خمس دقايق
وان شاء الله هتابع مدونتك
اتمنى اشوف تعليقك عندي في المدونة

سومه...مجنونه فى بلد عاقل

كل سنه وانتى طيبه يا سكره
مبحبش الكنافه ولا الحاجات المسكره:(

قوس قزح

كل سنة و انتى طيبة يا قطتى
عيد سعيد عليكى و على اسرتك الكريمة

mostafa rayan

ميررا
انت ازاي با بنت انت يابنت انت يابنت
تعلمو كنافه بالزبيب والمكسرات والكريمه كمان وماتبعتليش نص الصينيه .
امال يعنى الايميل بتاعي اللى معاكي ده لزمته ايه ماهو اساسا اساسا اساسا
( تلاته اساسا خدي بالك يعنى ) معمول علشان الحاجات دي خصوصي
اتفضلي بقى لما مامتك تعمل مثل هذه الصينيه مره تانيه لازم وحتما ولابد تبعتيلى
ههههههه
كل سنه وانت طيبه يا قمري وعيد سعيد عليك .. ايه ده مين سعيد ده ؟

الطائر المهاجر

كل عام وانت بخير ميراوعيد فطر مبارك إنشاء الله
أعاده الله علي الأمة الإسلامية بالخير وعليكي وعلي أسرتك
ولو المشكلة دي واقفة علي العنب نجيب سعد يحكم

الشنكوتي الكبير

ايه الناس دي كل ده علشان تعملوا زبيب
اولا مباكلش الزبيب
وكل لما حد يعزمني على رز بالخلطه اقعد احتاس هرمي الزبيب فين

انتوا لو كنتم ناصحين كنتم سيبتوهم كلهم يخمروا كويس وبعدين تعصريهم كويس
وتعبيهم في قزايز صغيره كده ومدوره ومعرفش هتجيبيهم منين الأزايز دي وبعدين تبيعيهم على انهم نبيذ معتق في القبو الملكي الفرنسي هيتباعوا في العيد زي الفل واهو تشتريلك بتمنهم جزمه تتفسحي بيها في العيد

هههههههههههههههه

كل سنه وانتي طيبه

سلااااااااااااااااام
اخوكي ايهاب

مواطن شووجااع

كل سنة وحضرتكـ بخير وتقبل الله منا ومنكم
وأسعد الله أيامكـ بفيض رضاه ونور هداه وباركـ بعمركـ إلي يوم تلقاه

micheal

كل سنة وأنتي طيبة يا ميرا
عاوزين الجزء الثاني بقى

كراكيب

يالهوي
ده كان اترمى اسهل
او بوظتوه كله وعصرتوه وبيعتوه لشركة خمور اكسب
ايه دااااااه
هع هع هع هااااااااااع

وومن يا وومن كل سنة وانتي طيبة وزي الفل

miro el niro kwaniroooo

Angel


السلام عليكم ورحمة الله وبركاته

ميرا..

كل سنة وأنتي طيبة
وأتمنى تكوني قضيتي عيد سعيد


Angel love

اقصوصه

كل عام وانتم بخير

!!! عارفة ... مش عارف ليه

طبعا أنا مع كل الناس اللي مستنية الجزء التاني

وبصراحه زعلان منك جدااااااااااااا

ازاي متبعتيش لمصطفى نص الصينية

وأنا النص التاااااااااااني

أصحاب أونطة احنا ولا أييييييييه

ماشي ميرا تنزل المرة دي

إنما يكون في علمك الصينية الجاية

لا ممكن ابداااااااااااااااااااا

نور الدين

ايه يبنتى هى ماما قتلتك ولا ايييه
بقال 3 سنين منزلتيش جديد
إنجاز شوية يماما لو سمحتى

الطائر المهاجر

صباح
الفل
والياسمين
جمعة مباركة ميرا
وأثابك الله وثقل فيه موازينك

الطائر المهاجر

صباح
الفل
والياسمين
جمعة مباركة ميرا
وأثابك الله وثقل فيه موازينك

رئـــــيسـة حزب الأحلام

ازيك ياميرا
اخبارك ايه يارب تكونى بخير
مشروع هايل بس لى ملحوظة هو ليه ماحدش اتبرع وشاف الكيس فيه ايه
وماحدش بيحب الذبييب دة انا بموت فيه
تحياتى لكى

فاتيما

ميرا يا اميرة
إيه السبب يا حبيبتى ف الغياب
لعل المانع خير يا رب
البرد واخد حده جامد ؟
سلامتك ألف سلامة كان باين على صوتك على فكرة
متغيبيش علينا قوى
هتوحشينى من دلوقتى أصلاً
بوسة ووحضونة كبيرة قوووووووووى
هبقى آجى اطمن تانى
خلى بالك من نفسك

مدينـة من النسـاء

ليه غيابك
ماااااااالك
؟

فاتيما

ميرااااااااا
انتى لسه تقلانة علينا ؟؟؟
موحشنكيش يا بت انتى ؟؟
اصلك وحشتينى
يا رب تكونى بخير
بوسة و حضوناااااااااات اد ما وحشتينى

Siguiente Anterior Inicio