العنب عنبي

كل سنة وانتم طيبين طبعاً انا بقالي كتير مش بكتب وقاعدة ساكتة اهو بس رمضان بقي جاي معايا بكوميديا ، تعرفوا ان رمضان ده فرصة للتهيس والنسيان والكلمة اللي علي لسان كل الناس صيييييييام بقي طيب

المهم بقي إن بونتي حبيبي ( اللي هو بابا يعني ) أول رمضان كدة خرج يجيب طلبات البيت وجه علي باله يجيبلنا عنب – عادي جداُ – اللي مش عادي بقي ان يظهر والله اعلم انه ملقاش مكان في التلاجة يحطة فيه فسابه جنبها وهو كان محطوط في كيس اسود ومكنش حد في البيت وبعد شوية صيام بقي فنسي وماما جت طنشت الكيس عاااااادي جداً وكلنا بقي رايحين جايين من قدام التلاجة والكيس دة مش عاملنا أي مشكلة – طالمة مش مطلع ريحة وحشة –

لحد كدة مكنش في أي مشكلة المشكلة حصلت تاني يوم الصبح لما بابا افتكر الكيس ولقي نص العنب باظ خلاص والباقي مش هايستني للفطار وطبعاً الصيام كانت حجة كويسة علشان كلنا نتنصل من المسئولية وكان السؤال الأهم هانعمل ايه في العنب الباقي ؟؟؟؟

انبرت ماما طبعا بأفكارها الجهنمية ونقت العنب عنبايةعنباية علشان تفرز السليم من اللي باظ وسلقت السليم وفردتة علي صاج لييييه بقي ؟؟؟؟؟؟؟؟ علشان هاتعمله زبيب – اصلا محدش بياكلة في البيت –

انا بقي معرفتش كل التفاصيل دي غير لما صحيت ولقيت ماما حاطة الصاج علي ترابيزة الأنترية فسألتها وحاكتلي حكاية العنب من طأطأ للصاج وهنا كان ليا وقفة

- طب ممكن أعرف انتي حاطة الصاج هنا ليه مش في البلكونة ؟

- علشان العصافير اللي علي الشجرة – اللي بابا زرعها – ممكن تاكل العنب عنبي ، والعصافير اللي في الأقفاص اللي بلكونة – بابا اللي بيربيهم – ممكن ريشها والرابش بتاعها يقع علي العنب عنبي

- ماشي يعني بونتي بقي حضرة المتهم أبي بتبويظ مشروع الزبيب بتاعك

- أيوة

- طيب مش ممكن تغطي مشروعك بالبلاستيك الشفاف اللي مخزناه تحت المرتبة واهو يبقي له فايدة

- انتي عاوزة العنب عنبي يعرق ومشورعي يبوظ ويشمااااته طنط ظاظا فيااااا

- لا ياستي ميرضنيش ويارتها بس طنط ظاظا اللي هاتشمت لوحدها أحم احم ما علينا ام هند يا مامتي هاتسيبي مشروعك يتجفف هنا يعني ويأنسنا في الليفنج كتير ولا إيه

- امممممممممم طيب انا هاتصرف

وكان تصرف مامتي كالأتي حطت الصاج في أوضة اخويا – اتجوز وسابها – وشغلت المروحة علي العنب الأوضة دي في ذات نفس الوقت هي اللي انا عملتها صومعة وقاعدة فيها ليل ونهار قدام الكبمروطر بتاعي وفي ذات نفس الوقت برضة بونتي حبييبي بيستغل الشيفونيرة اللي بقا ادراجها فاضية وبيحط فيها حاجات العصافير علشان هوذه الأوضة قريبة من البلكونة

انا بقي سيبت ماما تشغل المروحة علي العنب عنابها واديت المروحة ضهري ( أدي ضهرك للمروحة لاالبرد في جتتنا يرعي ) وبابا بقي داخل خارج عليا وفي الاخر سألني وقالي

- ممكن أفهم انتي لية مشغلة المروحة وموجهاها التاحية التانية ؟؟

- مش انا يا بونتي دي ماما مشغلاها علي العنب علشان يتجفف

- ها ليه بقي ؟

فشرحتله الأسباب المنطقية التي تجعلة بطريقة مباشرة وغير مباشرة متآمر علي مشروع ماما الكبير العنب عنبي وفي الحقيقة بونتي تقبل الأسباب دي بصدر رحب وروح رياضية ونادي علي ماما فحضرت لفورها وقالها بمنتهي العقل والحكمة في آن واحد

- انتي اللي مشغلة المروحة علي العنب صحيح

- أيوة

- ياسلام يعني علشان كيلو عنب بخمسة جنية ميبوظش تدفعيني 50 جنية كهربة زيادة

آن آن أأأأأأأأأأأأأأأأأأأأأأأ دشششششششش وأسقط في يد ماما – مش عارفة يعني ايه بس ماشية مع حالة ماما ساعتها – وطأطأت راسها في هزيمة نكرااااء وراحت طافية المروحة من سكات وخارجة من الأوضة وانا وبابا ماسكين روحنا من الضحك لحد ما تبعد وبعدها انطلقنا في القهقهة وخصوصاً بابا وهو فرحان فرحة اللعيب اللي دخل جون في شباك الخصم وجون وجون وجووووووووووووووووووووووووون يالعيب 1/ صفر يا بابا والجايات اكتر

طبعاً كان عقابنا اننا ناكل بعدها بيومين كنافة بالزبيب اللي نص زبيب ومحدش قدر يتكلم بس بصراحة الكنافة كانت بالكريمة وطعمها هايل علشان خاطرها ينبلع الزبيب نص سوا

هل لحد كدة خلصت حكاية العنب عنبي كلالالالا البطة أنتظروا الجزء التاني اللي أبتدي فيه المشروع علي كبير