4

هل فعلا الإقتصاد أتدمر ؟؟!!!

انا أكتر حاجة تعبت أعصابي إن الناس عمالة تصوت وتقولك البلد خربت والإقتصاد وقع والبورصة باظت والمستثمرين خدوا ديلهم في سنانهم وهربوا
الكلام ده محاولة للفهم وقابل للنقاش والتعديل لو أنا غلط في حاجة ياريت حد يصلح لي علشان نشوف الصورة صح ودة بناءاً علي إني درست تجارة وتخصصت في إدارة الأعمال ولا أدعي إطلاقاً الفهم المطلق بس ده بناءاً علي اللي درستة واتمققت عنيا وانا بعمل فيه أبحاث ومشاريع تخرج
أولا : هو الإقتصاد بتاعنا بورصة وبس لا الإقتصاد مقسم قطاعات في قطاعات تضررت بشدة قطعات لم ولن تتضرر قطاعات ضررها مؤقت
أولا : القطاع الصناعي
القطاع ده مقسم إلي قطاعات تانية زي الصناعات التقيلة اللي هي الحديد والأسمنت ودي ليها علاقة بالبورصة وهانشوف موضوع البورصة ده بعدين
قطاع الصناعات الغذائية والدوائية والمنسوجات ودول برضة في منهم ليه علاقة وطيدة بالبورصة ومنهم لا
وبناء عليه برضه في قطاعات في الصناعه هاتضرر وقطاعات تضررها جزئي وقطاعات مش هاتتضر تماماً زي أيه كدة
زي قطاع الغزل والنسيج في مصر وصناعة الملابس الجاهزة . السؤال ليه ؟
لأن المصانع بتشتغل بنظام الربع سنوي برضة يعني ايه ؟ يعني واخدة أوامر شغل وماضية تعاقدات لتلت شهور عدي منهم شهر يعني عندهم شغل شهرين قدام ودليلي علي كدة لما حصلت الأزمة العالمية سألت ناس بتشتغل في القطاع ده قالولي مش هايبان تأثيرها علينا غير لما عقودنا تنتهي
حد يرد علينا ويقولي وإيه ضمانك انه ميتأثرش كمان شهرين لإن القطاع ده معتمد علي التصدير ولا المواني قفلت ولا حركة التصدير والإستيراد لها علاقة بتغير نظام الحكم اصلا. يعني عندنا قطاع أمن
الصناعات الغذائية نفس الشئ بالنسبة للتصدير تمام وبالنسبة للإنتاج المحلي الخطر اللي هاتواجهه إنخفاض القوة الشرائية للمستهلك ودة ممكن برضة ميحصلش وهاقول أزاي
والخطر التاني هو غرامات تأخير نتيجة توقف الإنتاج بسبب حظر التجول اللي النظم بتاعك فرضة ومشاكل تانية ليها علاقة بصعوبات النقل وارتفاع تكلفتها في الوقت الحالي وده برضة مؤقت وممكن حله
الصناعات الدوائية نفس الشئ وحتي لو انخفضت القوة الشرائية محدش بيوفر حق الدوا تأثرها مش بالإنتاج تأثرها هايكون له علاقة بالبورصة
ثانياً : القطاعات الخدمية والإتصالات
الإتصالات قطاع أمن لأنه محوري محدش هايرمي موبايلة ولا هايشيل وصلة النت ممكن علي أسواء الإحتمالات نموه يقف لكن لن يتراجع لأنه البنية الأساسية بتاعته موجودة وأصولة موجوده والإتصالات ( المحموله بالذات) كلها شركات متعددة الجنسيات وده ميزة مهمة . مهمة ليه بقي؟
لأن الشركات متعددة الجنسيات رأس مالها عالمي يعني بتحسب أرباحها بإجمالي شركاتها اللي موجودة في كذا بلد فلما تخسر في بلد وتكسب في أربعة تانين ( مثلاً ) يبقي في المجمل هي كسبانة
غير إن في الأصل قطاع الإتصالات قطاع عالي النمو يعني لما تستحمل توقفة لفترة قصاد انها بعد كدة تستغل كل الفرص المتاحة ده علي المدي البعيد مصالح ليها والناس دي مش بتلعب
قطاع البنوك
تأثرة جزئي لأنه له علاقات بالبورصة لكن في الوقت نفسة البنوك ليها فلوس كتير بره في شكل قروض وإستثمارات في قطاعات تانية علي اسوأ الإحتمالات البنك المركزي ممكن يقلل سعر الفايدة ويعيد جدوله القروض دي وانا عارفة ان البنوك العالمية لسة مافقتش من الأزمة العالمية لكن من حسن حظنا إن تأثرنا بيها كان محدود للغاية ومخصصاتها موجودة وممكن والحمد لله تتحمل خسائر مؤقتة لكن مش هاتنهار
قطاع الصحة
وهنا بتكلم عن قطاع الصحة الخاص الحكومة كلها تمام وهايتصرف ليهم تعويض بطالة عن الإيام اللي قعدوها ( ده مش كلامي ده كلام وزيرة القوي العاملة )
الصحة قطاع أمن لأن اصلا مش عامة الشعب بيتعالج خاص والفئة اللي بتتعامل معاها مش هاتوقف تعاملها حد هايقولي مهو في ناس هاتفقد وظايفها وسياحة انضربت ومش عارفة ايه... هاقوله استني عليا وانا هاكملك
قطاع التعليم
معروفة الحكومة مش هاتسرح مدرسينها ولا المدارس الخاصة ولا العيال هاتبطل تتعلم ولا الجامعات الخاصة هاتصفي عمالتها لأنة برضة متأثرش بالأزمة العالمية ولا الناس بتبطل تتعلم

حلو الكلام كل دي قطاعات آمنه طيب والمستثمرين اللي سحبوا فلوسهم من البنوك وهربوا ؟؟؟
محدش هرب المستثمر ده ليه إستثمارات عبارة عن اصول وبيمشيها بسيولة لما سمع إن إحتمال نظام الحكم يتقلب أول حاجة هاتيجي في دماغه التأميم ومصادرة الأموال ( حصلت في بلاد كتير مش بس في مصر ) فسحب سيولتة كإجراء إحترازي لكن لسه عنده اصول في مصر ومش منطقي أبدا ان واحد يبقي علي سبيل المثال عنده مصنع قيمتة خمسة مليون بيشغله بسيوله 2 مليون سحبهم من البنك وهايسيب أصولة وده اللي خلاهم يخدوا قرار بغلق البنوك ووقف التحويلات وده هايوصلنا لنقطة تانية جاية بس ركزوا معايا.
نيجي بقي للقطاعين اللي عمالين نعيط عليهم اللي هما السياحة والبورصة
السياحة: اصيبت بالشلل نعم لكن لم تنهار ايه معني الكلام ده ؟
من أول 25 و26 و 27 مكنش في حظر تجول ولا سياح بيمشوا ولا بلاد بتجلي رعايها بالألوف ومصر كان فيها مظاهرات اه لكن السايح عارف ان المظاهرات مظهر حضاري مش حاجة تخوف الأزمة حصلت بعد الإنفلات الأمني وحظر التجول يعني النظام هو اللي شل السياحة وبمجرد ما الأوضاع إن شاء الله هاتستقر السياحة هاترجع ده من ناحية من ناحية تانية الناس اللي في السياحة بتبقي عاملة حسابها لسيناريوهات منيلة نظراً لأن أقل حاجة ممكن تهدد شغلهم، وحتي لو السياح اللي بره مرجعوش افتكروا لما حصلت مذبحة الأقصر في97 الحكومة بادرت بتنشيط السياحة الداخلية وفعلا المبادرة جابت نتيجة
حد هايقولي بنتكلم في إقتصاد واقع وأنتي تقوليلي سياحة داخلية هاقولك راجع اللي فوق وانت تعرف ان في قطاعات بحكم أنها مش هاتتأثر ممكن تسد جزء من العجز ده مش بطال لحد ما الدنيا تمشي واهي فرصة المصري ياخد نفسة شوية ويتفسح في بلدة وقارن انت بين اسبوع في شارم والغردقة بيقف عليك انت بكام في حين انه بيقف مثلا علي السايح الإنجليزي ارخص من انه يشتري بدلة !!!!
نيجي بقي للمصيبة الكبيرة البورصة
البورصة بتاعتنا أنهارت ليه ؟
طول عمرهم بيقلولنا في الكلية إن البورصة بتاعتنا بورصة مضاربة مش إستثمار يعني ايه بقي؟
يعني شغالة علي ان ناس تدخل تشتري وتبيع وتبيع وتشتري وتحقق أرباح من فروق الأسعار علي المدي القصير ودي في اي بورصة كويسة لازم تبقي لعبه صغار المستثمرين اللي هما بيلعبوا في مبالغ من 5000 لحد نص مليون لكن البورصة بتاعتنا كلها مضاربين حتي كبار المستثمرين والصغيرين هما اللي بيتفروموا
في حين إن بورصة الإستثمار قايمة علي ناس تقيلة وشركات بتعمل محفظة إستثمارية وتديرها وتستفيد بتوزيعات الأرباح والإستثمارت التابعه وكلام كتير كدة مكانة مش هنا
طيب ايه الفرق ؟ الفرق في الإستثمار البورصة بتاعتنا اصلا قايمة علي الشائعات وإشاعه تقومها وإشاعه تفلسها افتكروا ان إشاعة هروب رامي لكح ( قبل ما يهرب فعلا ) كانت السبب في إنهيار شركاتة
وبرضة علشان نعرف الفرق لما حصل إنهيار في قطاع العقاري في الأزمة العالمية باقي القطاعات انهارت بنظرية الأواني المستطرقة لأنها استثمارت متداخلة والحكومات اضطرت تتدخل وتضخ فلوس وتأمم في أحيان أخري علشان تنقذ الموقف
وده هايخدنا للكلام عن قطاع العقارات اللي كان السبب في محدودية تأثير الأزمة العالمية علينا ليه بقي؟
لإن القطاع العقاري عندنا تمويل أفراد مش بنوك ... برضة يعني ايه ؟ يعني هنا لما بيكون في مشروع عقاري بيعلن عنه ويلم مقدمات حجز ويبني بيها وبعدين دفعات تعاقد يكمل بيها وهكذا ولحد ما بتسلم الشقة بتبقي دفعت نص تمنها تقريباً علي دفعات
في باقي الدول المشاريع العقارية بتتمول بقروض من البنوك ودة السبب ان البنوك انهارت مع القطاع العقاري انهيار مروع
طيب خلاص كدة البورصه راحت ومليارتنا راحت وهتاخد في وشها قطاعات تانية
لا والحمد لله لأن زي ما قولنا هي بورصة مضاربة والناس خافت وجريت وكل ماناس تخرج الأسعار بتنزل وناس اكتر بتخاف والموضوع معدي وهنا يجي دور طرفين مهمين جداً
1-    الحكومة
2-    رجال الأعمال الوطنين

-         الحكومة
ابتدت فعلا تاخد مكانها وأعلنت عن صندوق بقيمة 5 مليار تعويضاً للمتضررين . طب ده هايفيد في ايه ؟
في إن الناس اللي تضررت هاتاخد فلوس وتبتدي تعيد بناء ماتهدم وتشتري بضاعة وتشغل صناعية وكهربائية وعمال اليومية اللي فجأة كل الناس افتكرتهم وناسيين اننا كلنا شغالين باليومية حتي موظفين الحكومة والدليل علي كدة ان القوي العاملة هاتصرف للموظفين تعويض بطالة عن الأيام اللي قعدوها من غير شغل وكدة تبقي بتضخ فلوس في السوق علشان العجلة تمشي والقوة الشرائية متنخفضش ودي فايدة مخصصات البنك المركزي بتاعنا
من ناحية تانية في ناس فعلا مأمنة علي محلاتها وهاتصرف التأمينات وكان في حد قالي ان ده هايعمل أزمة سيولة لشركات التأمين بس رجعت فكرت إن شركات التأمين اصلا المفروض ان عندها سيناريوهات للتصرف في حالة الكوارث ده من ناحية ومن ناحية تانية في شركات كتير متعدده الجنسيات ( راجع ميزه الشركات المتعدده الجنسيات فوق )

-         رجال الأعمال الوطنيين
ودول دورهم مهم جداً دلوقتي وخصوصا في البورصة . أزاي بقي ؟
الحل ده مش من عندي ده من عند نجيب ساويرس اللي قال انه هايشتري أوراق مالية في البورصة بملايين ولما أكتر من رجل أعمال هايعمل كدة اللي بيشترية انهارد بجنية ممكن في اسبوع يبقي بـ 20 يعني أرباح خيالية ومن ناحية تانية هايرفع البورصة ويدعم قطاعات كتير
انا بقول الكلام ده علشان الناس اللي مسوداها ومتخيلة إن الأسواء لم يأتي بعد ، أنا بطمنكم وبطمن نفسي ممكن نقع وتقوم تاني ونبقي أحسن




4 قالوا رأيهم:

حَـبآيـۃْ.بـטּـدۉڷ

مش عـآرفه ليه فرحت جداً بعد ما قريت البوست ده ..

يمكن لإني أدركت إن الوضع مش مُتأزم للدرجه .. وكله هيهـون ..بإذن الله :)

ربنـا يطمنك دايماً كده .. ]يـآرب[

ahmed_k

فعلا يا ميرا بالضبط زي ما قلتي
فسيناريوا إنهيار البلد ما هو إلا صنيعة إعلامنا لكي يرهب العب ويحولهم عن تأييد الثوره ويحجم عدد المعتصمين حاليا بالتحرير ولكن لعبهم مكشوف
بعدما تم إطلاق المساجين وحرق بعض أقسام الشرطه في المدن التي لم تشهد توترات بأيدي ضباط ومخبرين المباحث لكي يشعر الناس بأن الفوضى عمت وان الأمان مع بقاء النظام الحالي وهي لعبة سياسيه قديمه ومعروفه
ولكنا والحمد لله أكبر من ان ينضحك علينا بمثل تلك التوافه
فعلا قد تحدث بلبله خصوصا أن البلطجيه هم مواطنون ولا يعرف وقت ومكان فعلتهم وضربتهم ولكنها أمور وقتيه مرتبطه بفترة المظاهرات فقط وبعد إستقرار الأمور تعود الأمور إلى طبيعتها
أحييكي على مقالك الرائع
دمتي بخير

صيدلانيه طالعه نازله

الكلام اللى قلتيه طبعا مطمئن جدا
و كتير من الناس المتعقله من الخبراء الاقتصاديين قالوه
كل اللى بيتقال تهويل عشان يحسسونا ان الثوره خربت البلد
لكن المفاجاه انى قريت مقال فى جريده الفجر بيأكد ان مصر على اعتاب ثوره اقتصاديه هائله بعد الثوره دى و الكاتب شرحها بس بما انى مش على درايه كبيره باسرار الاقتصاد و معانيها اخدت الموضوع فى مجمله و خلاص
يارب يبقى كلامه حقيقى ان شاء الله

فولتاا

بعيدا عن الظروف

انتى حسستينى ان كلية تجارة مهمة فعلا
ههههههه
انا بقالى تلات سنين فيها وكنت يأست

Siguiente Anterior Inicio