43

يا تليفزيون يا

مش فاهمة بفتكرني وأنا صغيرة الأيام دي كتير ليه اربطوا الحزام وها نرجع لورا شوية أيام طفولتي الأولي في عمري كله وقعت في غرام 3 اختراعات علي التوالي التليفزيون , السينما , الكمبيوتر وكان التليفزيون ده بقي حجر الزاوية لأني كنت مبهورة بيه جدا والناس اللي عايشه جواه وكل الناس بتشوفها وعارفاها كان نفسي أوي ادخل أعيش معاهم جوه ومرة والدي ظبتني وأنا بحاول أدور علي الباب اللي الناس دول بيدخولوا منه علي غرار باب الفنانين اللي بيبقي في الأفلام الاستعراضية وحاول كتير يفهمني طريقة شغله بس أنا مفيش فايدة مصممة علي اللي في دماغي وعاوزة اروح ازورهم وطبعا كنت أقعد قدام التليفزيون كده متنحة ومسبهله وفاتحة بقي وهارية ماما وبابا أسئلة من عينة
- بابا هو مش التليفزيون ده ألوان
- اه يا حبيبتي
- طب هو ليه الفيلم ده ابيض واسود
- علشان الفيلم ده قديم
- ايوة يعني هما مكنتش عندهم هدوم ملونة
- ابويا وهو ابتدي يتخنق لا يابنتي هما طبعا ساعتها كانوا لابسين هدوم ملونة بس الكاميرات القديمة كانت بتصور ابيض واسود بس
- طب ليه التليفزيون مش بيلونه
- ابويا وهو بيقول لنفسه الله مطولك ياروح يا بنتي التليفزيون ملوش دعوه التليفزيون بيستقبل الإرسال ويعرضة زي ما هو لو اتصور ابيض واسود بيعرضة ابيض واسود لو اتصور ألوان بيعرضة ألوان
- طب هو ليـ ..........
- لا بقي كلمة كمان وهاقوم احطك في السرير تنامي جوه لوحدك ماهم اخواتك قاعدين اهم محدش سمع لهم حسهم
دي كانت طبيعة الحوارات اللي بيني وبين بابا وطبعا كنت يستبعد ماما لأنها كانت عصبية وبتشخط
أيامها بقي كان أجمل يومين في الأسبوع هما الخميس والجمعة ليه بقي علشان يوم الخميس عندي 6 حصص مش 8 يعني هاروح بدري والحق اليوم المفتوح وأتفرج علي الفيلم بتاع الضهر وها تفرج علي ماما نجوى مساء الخير وبقلظ وبكرة أجازة يعني هاسهر وأتفرج علي فيلم السهرة وكمان يوم الجمعة في فيلم بيتعرض بعد الصلاة ,3 أفلام في يومين هي دي الأجازات ولا بلاش ولا بقي أيام أجازة الصيف كنت بصحي بدري علشان أتفرج علي برامج الأطفال وأفلام الكرتون وكنت خريطة تلفزيونية متحركة الحق المذيعة الصبح وهي لسه طالعة بتقرا برامج انهاردة وخلاص بقي اتسجلت ولأن التلت قنوات اللي مكنش حيلتنا غيرهم كانوا بيفتحوا ورا بعض فكنت بلحقهم كلهم وكل واحد في البيت مستني فيلم ولا برنامج يجي يسألني وأنا ايه معسكرة قدامه مكنش في حاجة بتخليني اتزحزح من قدامه غير نداء الطبيعة بعد ما وصي أخواتي والنبي والنبي ابقوا احكولي علي اللي حصل والأندال مكنوش بيرضوا يحكولي - أخواتي - كان غرامي للتليفزيون حاجة غريبة وفي نفس الوقت مضايقة بابا وماما لأني كنت بركز قوي مع التليفزيون زى الناس بتوع روتانا سينما والأنقح بقي أن لما حد فيهم يكلمني مبردش علية زى ما كون نايمة وبيصحوني
مامتي بقي من ناحيتها حاولت كتير تبطلني إدمان التليفزيون ده وجربت كل حاجة معايا وكان منهم انها تخليني احب القراءة فأكتشفت اني بحبها أصلا وبقت مشكلتها مشكلتين ازاي تشيلني من قدام التليفزيون ولما تشيلني من قدام التليفزيون ازاي تخليني اسيب الكتاب اللي في ايدي كانت شايله هم ازاي هاتقعنني ادخل المطبخ واتعلم الطبخ زي باقي البنات والله ماما دي عذبتها معايا كتير والحمد لله ان شيمو اختي مولودة ست بيت أصلا فماما ركزت معاها وعلشان ربنا كبير فعوضها برضوا بالمزغودة الصغيرة ومرت الأيام لأنتقل من غرام لغرام وانتهي بالكمبيوتر والتكنولوجيا اللي هما السبب في إني بكتب الكلام ده انهارده بس برضه انما الحب للحبيب الأولي .

43 قالوا رأيهم:

ريمان

اول تعليق

انا بس بحجز

راجعه تانى يا ميراااااااا

سلام مؤقت يا عسل

AHMED SAMIR

لا حول ولا قوة الا بالله
انا بيتهيأ لي انك خلتيهم يفكروا يبيعوا التليفزيون ويكتفوا بالراديو بس اكيد برضة كنتي هتهريهم اسئلة
هم الناس اللي في الراديو قاعدين جوة ازاي يا بابا؟
طب هم مستخبيين علشان كدة مش بنشوفهم؟؟
انتي كان احسن حاجة ليكي هي الاستغماية
تحياااتي

ريمان

هههههههههه انا الحب للحبيب الاولى

والله يا ميرا فكرتينى بالذى مضى

ههههههههههه

بس مش كنت زيك كده بسأل الاسئله اللى باباكى زهق منها دى

انا كنت متفتحه من صغرى

ههههههههه

تصدقى يا ميرا

انا بقالى اربع سنين ماتفرجتش ع التليفزيون

تصدقى؟

من يوم ما مشيت مع السلفيين وانا بطلته

بس حايا بشوف كارتون ع الكمبيوتر

انا بعشق الكارتون يا ميرا اوى

بس ايه البوست العسل ده

انا بحبك فى خفه الدم والله يا مير

البوست المرة دى انتى كاتباه بطريقه دمها خفيف اوى

تحياتى ليكى يا عسل

ريمان

مدحت محمد

ياخسارة ملحقتش اول تعليق


عارفة انتى سبعين سنة ورا
ههههههههههههههههههههه

والله بجد انتى فكرتينى باايام زمان يااااااااا كانت ايام جميلة فعلا

وفى رمضان بوجى وطمطم وعمو فؤاد كنت بموت فيهم جدااااااا

انتى بجد عاملة زى بالظبط
انا كنت بعمل زيك كدة وكنت بحب يوم الخميس بس عشان انزل العب كورة مع زمايلى
يااااا كنت حريف اوى والله
كنا لما نيجى نلاعب اى فريق برة منطقتنا
والله يقولو امسكو ده اهم واحد فيهم
ايام بقى
بس موضوع التلفزيون ده انا كنت برضه مدمنه جدا وكنت بعمل عليه خناقات يابنى قوم ذاكر الله يحرق التلفزيون مش عارف مصلحتك
وانا اقلهم صدقونى بالكوسهههههه
مش بالشهادات
وصدقت والله يادوحة

انا طولت اووووووووى

سلام بقى

مدحت محمد

اه صح

يا تلفزيون يا

انتى فكرتينى ببرنامج

كان بيجى فى رمضان

بتاع الراجل المسيحى ده مش عارف مات ده ولا ايه


بس كان برنامج تحفة كان بيعمل كاركاتيرات رهيبة

على العموم انا دلوقتى بتفرج على الكمبيوتر بس

ومش بتفرج غير قليل اوى على التلفزيون

وربنا يخليلنا الكوسة

حمادة زيدان

ميرا

هههههههههههههههه رجعتينيي ليام كانت أتمسحت بأستيكة ... سياتي كنت أحد مجانين التلفزيون وياما قعد قصاده ... كنت في رمضان "هههههههههههههههههههههههههه" أعتكف في الجامع لغاية المغرب "هههه" مكسوف اكمل بس كنت عيل يعني كنت بقعد في الجامع للمغرب وبعد الصلاة أجري ع البيت ومصليش حتى العشاء والقيام من قعدة التلفزيون "أوعى حد يعرف السر ده وخليه في بير

سلاموز بقي

محمد مارو

ههههههههههههههه
دمك شربااااااااااااااااااااااااات

عجبتنى اوى و انتى بتدرى على باب التلفزيون
طيب مسالتيش نفسك هما دخلوا عندكم ازاى اصلا على شان يدخلوا من عندكم للتلفزيون
و لا حكايه ابيض و اسود على شان مكنش فى هدود الوااااااااان


هههههههههههههه

دمك عسل

إنسان || Human

ياااااه ..هو انتي من ايام بقلظ وماما نجوى ...ياااه بجد فكرتيني بحاجات حلوة كتير
...
أنا مدمن تلفزيون على فكرة وكمبيوتر كمان ..ودي على فكره مشكله مستمتع بيها جدا ومش عايز اسيبها ابدا

Empress appy

يا تليفزيون يا حلو الاسم اولا
ثانيا حركه افتح التليفزيون وادخل جوه عاوزة اقولك ان سيادتى كانت بتعملها هههههههههه ومش فى التليفزيون بس لا فى اللعب كنت بمسك المفك واشوفها بتمشى ازاى ههههههههههههههه وخربت الدنيا

mohammed alsha3r

ايه دا

انتى كمان

نفس اللى كان بيحصل معانا واحنا صغيرين

بس انا كنت مدمن تليفزيون

لكن القرأه لع

اسلوب جميل ودمه خفيف

دمتى بخير ياميرا

Unknown

الشاشة الصغيرة اه منها
تصدقى وحشتنى قوى بقالى تقريبا 8 سنين مشوفتش تليفزيون
هو الاساس بس مع التطور والتقدم اندثر وقرب يختفى مع وجود الكمبروتر
وبعدين مفيش تطور فى فكر ولاد بلدنا فى التليفزيون المحلى

تقبلى تحياتى

المنسى

ههههههههههههه

طب والنهاردة لسهبتحبى التلفزيون برضو

ولا بقى مش حلو زى كل حاجة فى زمننا


ولا بقيتى تحسى إن إللى فى التلفزيون دوووووووول بيحووا عليكى


تحياتى

Unknown

اهلا ميرا
كتير سبقونى اتكلموا عن خفة دمك فى البوست ودا خلاص امر منتى منه
انا بس تعليقى معهش هيكون بايخ لانى نظرت للموضوع من زاوية تانية
الواقع ان كلنا ننبهر جدا بكل ما هو جديد خاصة فى مجال التكنولوجيا وللاسف ان هذه النقطة اصبحط احدى وسائل اعداءنا فى هدم قيمنا ونشر قيمهم لان حكوماتنا الموقرة وخاصة الاعلام والتعليم لم يحاولوا الاستفادة من هذا الانبهار فى اكساب الافراد من عمر الطفولة مهارات وافكار وقيم ولكن تركونا فريسة لاستغلال اصحاب الهوى والخلاعة يا ريت نبدا نفكر لنفسنا واولادنا ازاى فعلا نستغل الانبهار دا فى خدمة نفسنا و مجتمعنا وبلدنا اسف لتقل دم التعليق بس اهو شىء من التغيير تحياتى ميرا

غير معرف

يكفيني أنك نورتيني وشرفتيني بالزياره
وشكرا ولك خالص تحياتي

snohe

فكرتينى بايام زمان
انا كنت بحب الراديو واسمعه بالليل مع المذاكره
كان الراديو افضل من التليفزيون
تحياتى

tota

اولا البوست حلو اوي ودي حاجة عودتينا عليها يا اجمد وومن
تعرفي فكرتيني بحاجة شبه الي قلتيه
زمان كنت بتحرك دايما كأني علي مسرح وكأن فيه كامريات بتصورني واما يكون محدش موجود كنت بجري ع التليفيزيون افتحه اشوف الي انا بعمله ده اتذاع ولا لسه في مرحلة المونتاج
اصلي كنت بفهم شوية فالشغل ده
(اعلام بقي ومن صغر سني ..هههههههه)
ثانيا
تصدقي انا ليا حوالي 6سنين مش تابعت مسلسل واحد ولا كملت فيلم للاخر
بس هو عندي استفسار
ليه برغم ان التليفيزيون كان مبهر لناس كتير وخصوصا الاطفال
ليه ما احتفظش بالصدارة دي مع العلم ان سحر التليفيزيون لا يضاهيه اي سحر حتي الكمبيوتر والاتنرنت
طولت عليكم وهتقولو رغاية بس مش مشكلة باي بقي

tota

تعرفي ميرا برغم اني بستعمل التكنلوجيا كتير زي الكمبيوتر والنت بس عاوزة اعمل توازن بين استخدامي ليهم وبين القراءة وده الي لازم كلنا نعمله لأن الحاجات دي التهمت وقت القراءة وغير كدة استحوذت علينا بشكل ادماني
ايه ده مين ادماني ده
البوست حلو اوى يا وومن ومنتظرين المزيد والاجمل

Soooo

هههههههههههههههه

والله انتي عسل قوي
طب فاكره سينما الاطفال اللي كان بيجي الصبح يوم الجمعه
فاكره البرلمان الصغير اللي ماكانش في حد بيتفرج عليه اصلا

فاكره فيلم الاسعه سبعه على القناة التالته يوم الجمعه
فاكره برنامج حياتي بتاع فايزه واصف
فاكره فكر ثواني واكسب دقايق والحلقه اللي واحد قال انه نفسه يشوف الريس وساعتها نجوى ابراهيم جالها شلل

يالهوووووووووووي

والله فكرتيني بايام حلوه قوي

يلا نبقى نكمل حوارتنا بعدين
ده انتي اتاريكي مشكله وانا مش واخد بالي والله

بس مشكله دمها خفيف وزي العسل والله
ربنا يسعدك ويكرمك ويوفقك ويبسطك ويرضيكي دنيا وآخره


اه صحيح .. مبروك عالريدر ياعم



سلاموووووووووز

غير معرف

هما مكنش عندهم هدوم ملونة ؟

هههههههههههههههههههههههههه

جامدة دي

من يومك يا بنت يا ميرا وانتِ ذكية

جميل بقلظ أوي

كنت بتعلم منه أزاي آكل من غير ما أفتح بقي

ههههههههههههههههه

تسلمي يا قمر

نيجوووووووووور

Hosam Yahia حسام يحيى

معلش على التاخر فى التعليق

بس طبعا عاذرانى لانك عارفه السبب

بس ماشاء الله بوست جميل اوووى

احسن من اللى فات كمان

:d

مع انى كنت متوقعه

بس بوست هااااااااااااااااااايل

دمتى مبدعه

ميرا ( وومن )

ريمان

أول رد بس بحجز بس

***********************************
أحمد سمير

أستغماية أنا اصلا كنت بستخبي في أماكن محدش ممكن يدور عليا فيها مرة استخبيت في ضرفة الشفونيرة ومرة تانية جوة الغسالة
ماما بقي منعت الأستغماية في البيت هي اللي بتاخد الخضة لما ميلقونيش

ميرا ( وومن )

ريمان

هما السلفيين مبيتفرحوش علي التليفزيون أمال شيوخهم ليه بيطلعوا فية ؟

عموماً يا ريمو نشرات الأخبار والبرامج الدينية والكارتون مش بيتهيئلي فيهم شبهه

تحياتي يا قمر

ميرا ( وومن )

مدحت محمد

ماشي يا عم الحريف عموماً احنا ايامنا كان فيها حاجات حلوة كتير وكان ليها معني
مش عارفة الأجيال اللي طالعة اللي مش بتتفرج غير علي مسوخ مدبلجة وحاجات تجيب تخلف عقلي هايفتكروها أزاي

واحب اطمنك علي أونكلك رمسيس حي يرزق بس انا كنت بستتأل دمة موت عموما دي أزواق

ميرا ( وومن )

حمادة زيدان

الظاهر كدة أن التلفزيون كان خارب عقولنا كلنا
والبركة في الكمبيوتر اللي خرب الباقي

***********************************
مارو

لا انت مش واخد بالك انا أصلا كنت فاكراهم عايشين جوه التلفزيون زي ما احنا عايشين في بيتنا مش لما بيجيلنا ضيوف بيخبطوا واحنا بندخلهم انا كمان كنت هاخبط عليهم ضيف بقي . كان عقل عيال بصحيح

ميرا ( وومن )

human

شكلي كدة صحيت لنفسي بالبوست دة وطلعت قديمة

وواضح ان الإدمان ده صفة جيلنا ومشلكتنا كلنا انا عن نفسي ارفض وبشدة احلها

***********************************
آبي

هي العباقرة كدة بيبقوا شبه بعضهم
ههههههههههههههههههه
بس موضوع اللعب ده كان تخصص اخويا الكبير مكنش في لعبية بيعدي عليها 24 ساعه سليمة مه كل واحد فينا كان ليه تخصص

ميرا ( وومن )

الشاعر

هو اظاهر ماما كانت عارفة ان القراءة دي حاجة كويسة وأفيد من التلفزيون علشان كدة حاولت معانا كلنا بس انا اللي مسكت في الموضوع قو وهي اللي ندمت بعدين
أصل صحباتها قالولها أن القرايه هاتبوظ دماغي
قال يعني مكنتش بايظة من الأول
ههههههههههههههه
***********************************
هيثم الدهشان

أنا مقدرش اعيش من غير تلفزيون ,كمبيوتر , موبايل ممكن يجرالي حاجة لو مكنش معايا واحدة منهم

أما مسألة فكر أولاد بلدنا دي فلو تابعت الفضائيات هاتحس اننا معندناش تلفزيون أصلا

ميرا ( وومن )

المنسي

لسة بحبة وبموت فية كمان بس بيني وبينك بتفرج علي برامج ومسلسلات أجنبية أكتر بحس بالمقارنة بينها وبين الهربي أننا بجد عندنا هطل وراثي

***********************************
د / عبد الخالق زهران

تعليق حضرتك مش بايخ ولا حاجة حضرتك شوفت الموضوع من وجه نظر تانية وانا مع حضرتك في كل ما ذكرت

ميرا ( وومن )

شريف
لك مني خالص تحياتي
بس برضة مكنش فية مانع انك تعلق علي الموضوع

***********************************
snohe
أنا كمان كنت بحب الراديو كنت بسمع أبلة فضيلة الصبح وألف ليلة وليلة بالليل

يااااااااااااه فين أيام الراديو

ميرا ( وومن )

توتة

ماشي يا ست إعلام انتي بتعملي إعلان وظائف خالية علي المدونة بتاعتي ولا إية

هههههههههههههههههههههههههههه

بصي يا توتة هو اللي حصل للتليفزيون نفس اللي حصل للراديو في حاجة جديدة جت أخدت مكانة في الصدارة بس برضة هو لية مكانتة وأهميتة
هو ده اللي بقولوا علية التطور

وحاولي تقري كتير لأن بجد مفيش أمتع من كتاب حلو

ميرا ( وومن )

سوووو

الله يبارك فيك ياعم

بس هو انت لازم تصيحلي وتعرف الناس أني عجوزة زيك ما انت عارف الستات مبيحبوش يقولوا علي سنهم

بس مش مشكلة عجوزة عجوزة برضة هافضل عندي 18 سنة ونص
ههههههههههههههههههههه

ميرا ( وومن )

نيجر

طبعا جينيس من يومي

انا بقي اتعلمن من بقلظ اغير فرشة السنان كل 3 شهور

تحياتي

ميرا ( وومن )

حسام

انا عارفة الظروف ومقدرة وربنا ياخد بإيد الجهاز بتاعك ويقومة بالسلامة

ومتقلقش البوست اللي كلمتك عنة في الطريق

Soooo

على فكره .. العجز مش بالسن
وانتي بسم الله ماشاء الله عليكي .. اللي يشوفك مايديكيش اكتر من ستاشر سنه


انتي طلعتي بطاقه صحيح؟؟؟




سلامووووووووووز

ميرا ( وومن )

سوووو

بطاقة يعني ايه بطاقة اه قصدك آي دي

نو لسه مطلعتهاش ولا اتكود كود قومي قال يعني فارقة

كود من غير كود البلد اصلا خربانة من الكود هو اللي هايعدل المايله

!!! عارفة ... مش عارف ليه

دايماً بتروحي لمواضيع جميلة وبتشدي الناس وراكي

عارفة

في ميزة جميلة اوووي في موضوع التلفزيون دا وهو ان خيالك بقى خصب اوووي وبعد كده القراية جت وكملت عليكي والدليل التعليقات

قصدي يعني خيالك بقى شوارع وميادين
والحمد لله ان دا حصل

وكسبنا قلم معبر
زي قلمك


تحياتي

تلميحاتى - يوسف الشافعى

كويس اوى ان ماما وجهت اهتمامك للقراءه عشان نشوف ونقرأ البوستات الجميله ولا كنتى عاوزه تحرمينه من قلمك؟

زفته وقطران

سلامو عليكم
انا عاجبني اوي اسم
امراه بعقل رجل لاني لسه قايله الجمله دي من شويه

انا بقي كنت بحب بؤلظ جدا
زاليزم المفتوح
لاتقولي روتانا ولا مولودي
ولا اي حاجه

حسام يحى

انا حليت الواجب

عمر احمد

:d

ميرا ( وومن )

مش عارف ليه

حلوة قوي جملة خيالك بقي شوارع وميادين تعرف انا بجد حسيت الكلمة دي قوي

طول عمري حاسة ان دماغي زحمة فعلا زي الميدان

خالص تحياتي وشكري
***********************************
تلميحاتي

هو بالنوسبة ليا كويس جداً بالنسبة لماما هي حاسة ان دي غلطة عمرها

ميرا ( وومن )

زفت وقطران

اهلا وسهلا بيكوا نورتوني ولو اني معترضة علي الاسم بس عندك حق ايام زمان دي متتعوضش

***********************************
عمر

شوفت الواجب وصححته واخدت صفر من عشرة حكحكة فحلؤي

Ahmed Al-Sabbagh

اسلوبك جميل ورائع دائما
دمتى بخير

احمد

Abd-Alrahman

ههههههههه
اية يا بنتي دة
انتي مش كنتي مدمنة بس
عجبني اسالتك دي بتاعت الفيلم الابيض والاسود

انا بقي وانا صغير كنت فاكر الناس الي جوة التليفزيون دول بيكونوا جوة الحيطة الي احنا بنحط فيها الفيشة بتاعت التليفزيون
ههههههههههههههه

كنت لسة ما روحتش المدرسة
ولكن عمري ما حبيت التليفزيون ابدا ولا عمرة كان اداه جذب ليا ابدا

بوست جميل يا ميرا


الصيدلي المطحون

tarek alghnam

ميرا
ماشاء الله كلما دخلت عندك استمتعت بما كتبتى
فعلا الحب للحبيب الاول
يارب دائما تمتعينا بجديدك وبوستاتك الرائعة
تقبلى تحياتى يارائعة

Siguiente Anterior Inicio