30

همهمات

لليوم الثالث علي التوالي افشل في الحصول علي قسط كاف من النوم أصبح الأمر واضحاً علي وجهي المتعب بشدة لم يعد حمام الصباح الدافئ أو أقداح القهوة تجدي عاد القلق من جديد وعاد عقلي يدور في هذه الدائرة علي الآن أن اجبر عقلي علي ترك جسدي ليرتاح اخشي ما أخشاه أن افشل في ذلك اشعر أن السقطة القادمة قريبة وكم أكره أن اقضي ليلة أخري علي سرير في مشفى أن يسجل في ملفي الطبي تاريخ آخر مكتوب بجواره التشخيص إرهاق زائد أدي لانهيار .
**********************************************************************
انتظرت اتصالك لماذا لم تعد تتصل بي عند الفجر لنتحدث حتى الصباح كنت تحب أن يكون صوتك هو أول ما أسمعه أن توقظني من نومي لتكون أنت بداية يومي الآن أظل حتى الصباح في انتظارك وعندما يتملكني اليأس أسرع للحاق بما تبقي من ساعات الراحة .
*********************************************************************
ترددت علي عدد من المحال مازلت ابحث عن ما أبتغي عندما وجدته كانت هناك فرصة لركوب مواصلة لكني وجدتني أسير علي هذا الطريق اعلم انه لم يعد مظلا ولا ينتظرني علية سوي شمس منتصف النهار الملتهبة لكني سرت فيه أيها الطريق هل تعرفني هل تذكر أولي خطواتي عليك منذ أعوام وأعوام كنت أودع طفولتي وكنت أنت في وسط هذه المدينة كواحة في وسط الصحراء أين شجرة التوت ؟ وأين سور الأزهار ؟ أين حقول الخضرة علي جانبيك ؟ أين جداول الماء وصوت الساقية ؟ كنت وقتها تتحدي زحف المدنية وكنت أنا اتحدي زحف السنوات الآن كلانا تغير لم تعد طريقي ولم أعد أعرفك .

30 قالوا رأيهم:

د/عبد الخالق زهران

ميرااااااااا
اول تعليق اخيرا بس بواسطة هههههههههه
بجد الاقصوصة القصيرة نوع جديد من كتاباتك التى تمزج كثيير من الواقع بقليل من الخيال
كدا ميرا بتعيشنا بين الواقع والخيال فى امتزاج رائع
تحياتى ميرا

حمادة زيدان

ميرا

أبدعتي ... لقد شعرت بتلك الفتاة شعرت بألمها ووجعها ... والله عملتي فيا مود كأبة مش عارف ليه

برافوا يا ميرا

حسام يحى ....عمر احمد ....السبح

ماشاء الله تعبيرات ومعانى رائعه

لا اعلم هل تقصدى المعنى الحقيقى ولا المعنى المجازى

بس ماشاء الله فكرتك وصلت بالكامل

وسببت زى ماقال حماده زياده فى المود اللى انا فيه اصلا

مش هانقد المره دى السبح مات

هيثم الدهشان

ميرا

همهمات بإحساس عالى بس نفسى افهم حاجة هو كله ليه اليويمن دول مفتقد لماضى تاه منه من زمان

sherif

اولا اقول السلام عليكم
بعدين احييك علي همهماتك
وكمان علي مدي براعتك في تصوير إحساس لحظي حقيقي متغير يصيب المرء واقصد بمتغير ولحظي اي شعور بموقف عابر او إحساس بموقف جديدقد يطرا علي الإنسان في يومه قد بشغل عقله لفتره وقد يجعله بفكر فيه كثيرا بجانب الإحساس
ولك خالص حياتي

Soooo

معلش اتأخرت ومالحقتش اعلق اول ماشفت الموضوع .. بس ظروف بقى .. وانا احب اعلق عندك بمزاج لانك دمااااغ

بصي ياستي .. الهمهمات اللي عندك دي عند ناس كتير .. ان ماكانتش عند كل الناس

حياتنا كلها بقت عباره عن مجموعة تساؤلات وتفكيرات .. ونحلة ودبور زي بتوع اابي هانم بتنجاني بتاعة الخرفان

اقولك تضيعي الحاجات دي من مخك ازاي
خدي اجازة يومين تلاته تسعه .. وانتخي في البيت .. او سافري وغيري جو وشيلي اي حاجه من بالك
اضحكي على قد ماتقدري
الضحك بيشيل هموم كتيييييييييييير
بس اهم حاجه .. ان الضحك يكون طالع من القلب

وربنا يسعدك ويبسطك ويكرمك ويوفقك ويرضيكي دنيا وآخره


ملحوظه
كل مايجي عليكي الفجر .. اوعي تفتكري انك لوحدك .. انتي معاكي اقرب الاقربين .. معاكي رب الكون .. استنهزي الفرصه دي وقولي يارب



سلامووووووووووز

وومن

د/ عبد الخالق

دائما ما يحمل تعليقك الكثير من التشجيع

خالص تحياتي

***********************************
حماده زيدان

تعاطفك لوحده مش كفايه اتبرع ولو بكارت شحن
هههههههههههههه
سوري بقي علي مود الكآبة ده بس بجد واضح اني محتاجة اغير جو

وومن

حسام ...عمر... السبح

البقية في حياتك علي السبح بس هو انت اشتغلت سفاح كل شوية تموت واحد

ما علينا كدة كدة انا كنت عاوزة اخنق السبح وانت قمت بالواجب

بالنوسبه للمود بقي اغلب ظني اني اتعديت منك

هههههههههههههههههههههه
تحياتي

وومن

هيثم

مش عارفه بس يمكن علشان كلنا مش لاقين في الحاضر حاجة تهون علينا

يمكن

***********************************

شريف

يعني والله مش عارفه اقولك ايه انت شوفت في القصة دي اللي مشفتهوش انا

اظن التحيه دي تبقي ليك انت

وومن

سوووو

هو انا باين عليا قوي كدة اني محتاجة اجازه

تصدق بقالي 5 سنين مش عارفه اخد اجازة ولو اخدتها بتبقي مرضي

وبقالي سنتين عاوزه اروح اي ملاهي لو حتي الكوكي بارك اللي بقت مهجورة اصلا مش لاقية وقت

هو انا علي طول مش بفكر اني لوحدي خالص بس لو صحيت ساعه الفجر اول حاجة هافكر اعملها اني اصلي

الصلاة في الوقت ده غير اي وقت تاني

تحياتي

طارق الغنام

الرائعه ميرا
مش عارف اقولك ايه
غير انى احسست بأحساسك لروعه كلماتك
واحسست انى معك بمشاعرى
فعلا رائعه
لا ادرى اهى خاطرة ام قصة مخوطرة
ولكن مشاعرك وكلماتك اكثر من رائعة
تقبلى تحياتى
ودمتى متالقه

صيحة حق

السلام عليكم ميرا
ما احلى كلماتك ووما اجمل هذا الاسلوب
الرائع والجميل
واجمل من ذلك كله احساسك الجميل

طبعا اانا اول مرة ازور مدونتك الجميلة ولن تكون الاخيرة بل ستكون لى عودة وعودة ان شاء الله

مع تحياتى وتقديرى
صلاح شنان

المنسى

ميرا
بجد بحييكى على إحساسك العالى
وحلاوة إنتقائك للكلمات

صح هو موضوعالمستشفى والسرير ده بجد

ألف سلامة عليكى

بس أحب أقولك

متخليش الحزن والإكتئاب يتملكوا منك تحت اى حال من الأحوال

لا تحزن
كتاب لعئض القرنى
أكثر من رائع

أنصحك بقرائته كفيل بخروجك من حالة الحزن العميق دى

وأحب أقولك فى الأخر
لا تحزنى من أى شىء

أحمد سعيد ( نيجـر )

ميرا

من أفضل ما قرأت لكِ

كلمات قليلة لكن قالت كل شيء

أسلوبك يخترق القلب

سلاسة الأسلوب

وقوة المشاعر

أمتزجتا لتكونا سمفونية بديعة

أتمنى لكِ مزيد من التوفيق

أخوكِ دائماً نيجــر .

appy

يا حبيبتى دى تقلبات مزاجيه مع عوامل التعريه الارضيه والحر والحركات الغبيه مننا فى الشغل فعادى تعالى نسافر انا وانتى وخرفانى وانتى هتبقى جامده بجد
وعموما جامده زى كل مرة والله يا ميرا بس ساعات بحسها مرتبطه بشخصيه ناس كتير الحركات دى
وبرضه بتحصل

appy

معلش يا ميرا يا اوختى بس هستاذنك فى حاجه والنبى ارد على الواد سوووووووو ده معلش سيبينى


سووووووو

انت ايه يا بنى ماشى ورايا انت الدكتور قالك قول اسم آبى تلات مرات قبل الاكل وبعد الاكل
يا بانى ابعد عنى يا ابنى
يا ابنى انا بتنجانى ومش هتهمد غير لما اوديك عند اونكل الظابط ويطلع عينك وتعرف ان الله حق

معلش يا ميرا بقى اوف كده اترحت هاتى خرفانى بقى باى انا ماشيه

Soooo

معلش بقى يا ميرا .. انا هاخد المساحه دي في التعليق عشان ارد على ام خرفان وقلل .. المدعوة اابي هانم بتنجاني
------------
علمك علمك علمك .. انا مش بخاف من اونكل الظابط ده خالص يابنتي
انا والحمدلله وبلا فخرنه .. ما اخافش غير من لواء اركان حرب فما فوق .. انما ظابط عادي لا يابنتي .. لست انا هذا المجرم

وبعدين انا قلت ايه عشان كل التهديد والتوعيد ده .. مش انتي اللي بتنجاني اصلا ودماغك متاكله ونحلة ودبور هاريين الجمجمه زن متواصل
ده انتي من كتر زننهم اتجهتي لتربية الخرفان والقلل .. ولو اني مش عارف بتربي قلل ازاي .. بس شكلك بتربيهم على سور البلكونه

وانا باحنذرك يا اببي
باحنذرك
لو اتريقتي عالداكتور المعالج لحالتي النفسيه .. هتلاقيني عامل بلوج مخصوص اشنع فيه على خرفانك واقول انهم بيبصبصو على خرفان الجيران .. واقول ان قللك عماله تنقط ميه عالناس في الشوارع

وقد اذعر من فذعر


والله ولي التوفيق



سلامووووووووووز

وومن

طارق غنام

أنا اللي مش عارفة بصراحة أرد وأقولك ايه دايما تعليقك مميز

خالص تحياتي

***********************************

صلاح شنان

أهلا وسهلا بحضرتك نورتني وميرسي علي الكلام الجميل ده

وومن

المنسي

بجد ميرسي قوي علي شعورك ده

بس انت نسيت حاجة اني بكتب قصص قصيرة ودي واحدة منهم

خالص تحياتي

***********************************

أحمد سعيد

ميرسي قوي علي كلامك وتشجيعك ده بس انا هاروح فين جنبك

خالص تحياتي

وومن

آبي أول مرة

أسافر انا وانتي اوك خرفانك نوووو انا عندي حساسية من الوبر يا ماما يرضيكي يعني اسافر علي نقاله

نورتيني يا قمر

***********************************

آبي تاني مره

خدي راحتك يا حبيبيتي المدونة مدونتك بسد عدي خرفانك كويس شكلك نسيتي الأورانج عندي

هههههههههههههههههههههههه

وومن

سوووو

ولية معلش مهخد راحتك انت كمان مه مدونتي بقت مكتب تلغراف ولا ايه

( وش مش عارف يقول حاجة )

عموما خد الدكتور بتاعك زي ما آبي خدت خرفانها وكل واحد علي مدونته احسن اجيبلك اونكل اركان حرب واللي طالع كمان

هو مين اللي طالع ده ؟

محمد مارو

ايه ده ؟

اقول ايه ؟


مش عارف

بس المقطع الاول اثر فيه اووووووووووووى

مواطن زهقان

[b]بجد همهمات رائعه
عجزت عن التعبير بمدى ابداعك[b]

Hosam Yahia حسام يحى

:(

خدى باقى المود عشان تتعدى بجد

انا مش اديتك ا حاجه

بس انا عندى الان كميه كبييييره منه

هابعتلك شويه او تاخديها كده سيند فى الهوا

لان الياهو بتاعى مش بيبعت ملفات

وومن

مارو

معقول مفيش تعليق ولا نقد ولا اي حاجة خالص كدة

عموما ميرسي

***********************************

مواطن زهقان

اهلا وسهلا بحضرتك ميرسي جدا علي كلام حضرتك

وومن

حسام

كفاية عليا الجرعه اللي أخدتها لما تقرب تخلص هاقولك تبعتلي شوية

حسن حنفى

شكرا علي المدونه الجميله والموضوع المؤثر
تقبلي مروري

حسن حنفى
أزال المؤلف هذا التعليق.
Soooo

هي حصلت تقوليلي خد الدكتور بتاعك وامشي زي ما ابي خدت الخرفان والقلل ومشيت

طب علمك علمك علمك .. الدكتور افتكرك بتشبهيه بالخروف القله
وخد على خاطره قوي
وشكلي انا اللي هعالجه

وبعدين لو انتي عندك علاقات وتعرفي لواء اركان حرب .. انا خالي الله يرحمه كان صول في البحريه
يعني احنا ناس واصلين احنا كمان

وش واحد لابس نضاره سمس .. وماسك جرنان .. وقاعد على قهوة
!!
ده شكله مخبر خالص





سلامووووووووووز

sendrlla


تحياتى لمهمهاتك
احساس عالى حقا
عندما تعبتى من قلة النوم فعبرت فعلا ووصلنا الاحساس بالتعب
عندما عبرتى عن انتظارك للتليفون عبرتى عن الحرمان حقا
واجدتى وصف الطريق
تحياتى
......................
سندريلا

Siguiente Anterior Inicio