واجب وأقل كمان من الواجب

دي أول مرة هاكتب عن تجمع من تجمعات المدونين ومش هافكر ولا ارتب هاكتبة زي مايجي علي بالي
امبارح حسب الدعوة اللي وجهتها إيناس نهر الحب وبنت خيخة وأي كلام كان معدنا الساعة 11 الصبح قدام باب الطوارئ في مسشتفي الهلال الأحمر علشان نزور الجرحي الفلسطنين هناك الحمد لله كان عددنا ما شاء الله كتير حاجة وعشرين اللي حضر وانا افتكرتة
أصحاب الدعوة
بنت خيخة وأي كلام
إيناس نهر الحب واختها بسمة
عرفة الأسيوطي المحارب المتيم

اللي علي طول متجمعين معانا
قوس قزح
خالد همس الأحباب
محمود الدوح
خالو أحمد الصباغ
شفقة وإحسان
ضياء بيوتفل مايند
متغاظة اند مفروسة
البت كيكي العسل
مها زين إنها الحياة
دعاء مواجهات
رودي بنوتة مصرية
الأزهري
أ/شريف

ومن الناس اللي اول مرة اقابلها
رضوي مش عارفة الدنيا وخداني علي فين
موني مذكرات زوجة شابة
إيمان سوبيا
شوية رغي
ربة السيف والقلم
شمس اليل
زهرة الجنة
لوحدي لكن ونسان

وفي ناس تانية كانت موجودة وانا مش فاكرها فياريت محدش يزعل مني وناس مش مدونين لكن عرفوا وجم يشاركوا
وكمان لازم بجد نشكر أحمد السواق اللي كان مع خيخة لانة بجد تعب معانا جداً وكان معانا في كل خطوة وفي النهاية أقولة هو وخيخة ميرسي علي التوصيلة لأني أكتشفت اني مكنتش هاقدر اروح لوحدي علشان انا ببساطة غلطت في شارعنا وبعد ما مشيت في الشارع حوالي دقيقة بحالها سألت نفسي هو بيتنا فين ؟؟؟ عزل ولا جراله ايه طبعا قبل ما استوعب ان ده مش شارعنا اصلا ودة نتيجة اني كنت متاثرة داخلياً اكتر مما كان ظاهر عليا وعلشان كمان بقالي كتير قوي مدخلتش شارعنا بالنهار فنسيت شكلة !!!!!

المهم ان اليوم ابتدي هناك وزورنا الجرحي اللي في مستشفي الهلال علشان مش كل الناس عارفة ان هناك في جرحي وبعدها قسمنا نفسنا نصين نص راح علي معهد ناصر وعدي علي لجنة الإغاثة اللي في نقابة الأطباء وسلموا التبرعات العينية والباقي راح علشان يتبرع بالدم بس للأسف مش لقينا حد في بنك الدم علشان كل الدكاترة خرجوا في حملات تبرع فرجعنا علي معهد ناصر وهناك شوفنا باقي الجرحي والأجمل بقي اننا شوفنا ناس مصريين عاديين جايين يزوروا الجرحي وأسر بأولادها جايبين مساعدات طبية وهدوم وهدايا او حتي ورد كل واحد علي حسب ربنا ما يقدرة حتي ولو بتواجدة المعنوي
مش هاحكي علي ظروف الجرحي ولا اللي حكوة عن اللي بيحصل هناك علشان احنا شايفينة كل يوم صوت وصورة بس هاقول انهم كانوا فرحانين بينا فرحانيين بالمصريين اخواتهم اللي دايما واقفين جنبهم زي ما هما كانوا بيقولوا ومش حاسين اننا مأثرين معاهم وكنت بقول فين الناس اللي بتتظاهر قدام سفاراتنا ولا اللي بيطلعوا علي الفضائيات يقولوا ويعيدوا المهم ما علينا الحالات اللي هناك كالآتي نقلا عن مدونة قوس قزح
عدد الحالات اللى فى الهلال الاحمر كانت 12 حالة و كلهم ذكور من سن 19 سنة لسن 60
و اغلب الاصابات بتكون نتيجة قذف صاروخى و بتكون فى الارجلين و الايدين
اما معهد ناصر ففى حوالى 28 حالة سيدة و طفل و الباقى ذكور
و اعمارهم مختلفة
اعتقد ان افضل المساعدات لهم هى المساعدات المادية او كروت الموبايل علشان يكلموا اهلهم فى غزة
و لو حد يحب يودى ملابس او غيارات فاغلب المقاسات تكون ميديم او لارج و اغلبهم ملابس رجالة من سنة 20 لسن 40
فى كمان مستشفى فلسطين اللى فى مصر الجديدة فيها حالات محتاجة مساعدات مادية

دة كل اللي حصل وفي النهاية بالرغم من اننا روحنا نأدي واجب أن الواجب دة زود احساسي بالعجز والضآلة لأني أكتشفت أنه أقل كتير من الواجب