19

مساكن شعبية



انهارده ، انهاردة عيد ميلاد المدونة

أنهاردة وومن بقالها سنتين وسطيكم ياما فرحت معاكم وياما برضة حزنت معاكم وشافت كتير وعرفت أكتر يارب بس أكون طول السنتين دول ضيف خفيف ظريف

ياتري يا ميراااااااا عملتي ايه بعد 69 بوست ..........

حصاد السنتين دول كان ناس عرفتهم وقابلتهم وحبيتهم ويارب اقدر أفتكرهم كلهم يارب

2008


بطة بكر : صاحبة أول تعليق في المدونة , وأجدع بنوتة  بطوط مش ممكن انسي اول يوم قابلتك فيه ولا ممكن أنسي المنصورة وحشتيني قوي قوي يا بطوط

محمد مارو : المدون الجميل والصديق العزيز يارب ترجع بالسلامة يارب أول مدون أقابله في حياتي

حسام يحي : أخويا الصغير اللي زعلانه منه علشان بطل يسأل علي أختة :(

د. زهران ، عبد الرحمن الصيدلي المطحون ، توتة بنوتة شقية ، حبايب قلبي ريمان وجيلان ،محمد عطية مدونة الشاعر ، سهام شوادة، مدحت محمد 

كل الناس الجميلة مدونين الدلتا اللي كانوا أول مدونين أشوفهم وقابلهم ربنا يبارك فيكم كلكم

آبي هانم : كنت هاموت واقابلها وكنت أروح الشغل الصبح ادور عليها اون لاين واصبح وأرغي معاها بجد حد يتحب من غير ماتشوفة ومش محتاجة بقي أتكلم عن جدعنتها ولا قلبها الأبيض ربنا يهنيكي ويسعدك ويبارك فيكي يا آبي يارب

أحمد الصباغ : بجد يا أحمد أنت أخ كبير وبجد سعيدة إني أعرف حد زيك قلبه كبير وبيساع الكل مبروك علي الكتاب وإن شاء الله من نجاح لنجاح

داليا قوس قزح : بجد مش عارفة أقول ايه ولا ايه مش عارفة غير إني بحبك قوي ومش متخيلة حياتي من غيرك ، ولو بتمني حاجة من قلبي يبقي بتمني أن عمرك ماتبعدي عني ربنا يقبلها مني يارب

شريف : أ.شريف عمدة التدوين كله باشا بجد وجنتلمان في زمن قلت فيه الجنتله لما بقعد مع حضرتك وأكلمك بلاقي روحي بتقولي ياااااااااه لسه كتير يا ميرا  

موناليزا : الجميلة والرقيقة صحيح مشوفتكيش ولا قابلتك بس حساكي طيبة قوي وحنينة قوي لو في حد أحب ابقي زية في قربه لربنا هايبقي أنتي

منمن ساعات ساعات : أنتي بجد وش الخير عليا ومدونتك كانت سبب أني عرفت ناس كتير حلوة ربنا يكتبلي نصيب واشوفك

وليد عارفة مش عارف ليه : في ناس كدة لما تتكلم عنهم تبقي مش عارف تقول ايه لما أتقابلنا يوم الفطار كنت زي ما توقعتك بالظبط هادي ورزين ودمااااغ وديماً بستني تعليقاتك بفارغ الصبر

فاتيما : انتي بقي بجد مش عارفة حبيتك أزاي وأمتي وفين كلبشتي في قلبي ، أختي الكبيرة ولو تعرفي معزتك في قلبي بجد بحسك أخت ليا ومفيش يوم بيعدي مش بتيجي في بالي وابعتلك سلام من قلبي

محمود رئيس جمهورية نفسي : الصعايدة الجدعان والصديق العزيز والأخ كمان بس لو مكنتش بتدخل في إكتئاب تخرج من إكتئاب :) الكلام فيك يطول يا محمود بس بجد أنت إضافة لأي حد يعرفك

أحمد سعيد ( نيجر ) : القاص والشاعر واللي ديماً رافع من روحي المعنوية ومطلعني سابع سما :)) صديق عزيز بجد ومن أجمل الناس اللي عرفتهم في حياتي 

ليساندرا : الرائعه والجميلة الأتنين في واحد مش عارفة ليه قفلتي المدونة بس خير وإن شاء الله ترجعي قريب :))

كيارا: العثل والثكر بنوتة طيبوبه خالث خالث ربنا يسعد أيامك ويحقق لك كل اللي بتحلمي بيه يارب

خالد همس الأحباب : صحيح كل ماتشوفني في حتة تقطمني ويبقي مش فاضل غير أنك تكروشني بس عارفة انك بتعزني وانا كمان بعزك قوي يا خالد وربنا ما يحرمني من أخويا مه خلاص بقيت أخويا رسمي وشبطت فيك

بت خيخة وأي كلام : صحيح يا خوخة أحنا مش أصحاب بس بحبك لله في لله كدة

بدرية طه : اتقابلنا صدفة وعرفتك صدفة وحبيتك برضة صدفة بجد حد طيب قوي وجميل قوي قوي من جواه ويستاهل كل خير

       
Uknown عمرو : صحيح مش بنتقابل كتير ويادوب كومنتات بس بجد سعيدة جدا بمعرفتك  

عرفة الأسيوطي : وبرضة الصعيد وجدعنه الصعيد والناقد الجميل والصديق العزيز ربنا يفك أسرك وتخلص فترة التجنيد علي خير وترجع تنور المدونة

نهر الحب : إيناس الجميلة والرقيقة ونوارة التدوين وحشاني يا بنوتة وانا من هوذا المكان بقترح انك تنقلي القاهرة وتخليكي جنبنا :))

أحمد سعيد ( نادي الأدب ) : الشاعر والقاص والمصحح الجامد إن شاء الله من نجاح لنجاح

فاروق ومحمود الدوح : أخواتي الصغيرين اللي ديماً ممشوراهم ومشحططاهم

الشاب الشنكوتي : العريس اللي اتجوز ونسينا وحرمنا من تعليقاته اللي بتبقي عاوزة بوست لوحدها ، ربنا يباركلك في عروستك القمر دي ويسعدك يارب

أحمد سكر ورودي بنوتة مصرية  اللي اختفوا ووحشونا قوي قوي مستنين رجوعكم متتأخرووووووش :)))  

استرها يارب ، محمد حمدي ، تامر نبيل ، رومانسي ، أنا ودماغي ، سفااااااااح كرموز ، ويسبر ومملكتها الخاصة ، شريف وكراسة أفكاره ، مدينة من النساء ، علا بركات ، هيثم الدهشان ، ماجنوليا ، طوبة فضة وطوبة دهب ، يوسف ويوسفياته ،           

حصاد 2009

وأول الناس الحلوه

مصطفي ريان : علي رأي صفاء أخر طفل برئ وبجد قلبة أبيض قوي صحيح علي طول بينكشني وبيجنني وبخليني أشد في شعري بس برضة هو نفس الشئ

صفاء جلال : اتقابلنا أول مرة في رمضان وعمري ماتوقعت اني هاشوفك ولا هاكلمك تاني بس شوفي تدابير القدر أكتشف حد جميل بجد ويبقي قريب مني بجد وبسرعه كده ربنا مايحرمك مني قولي يارب :)))

مينا : منامينو بجد حد طيب وجدع ومن الأخر محدش بيسلف حد لاب توب في الأيام دي خاااااااالص وكمان يديله الباس وورد علي اخر لحظة مفيش كده والله دلوقتي خاااااالص

عادل : أبن أختي وانا خالتك غصبن عنك وهو كده بقي ومتنساش تجبلي مصاصتي وشوكلاتي المرة الجاية

شمس النهار : كان ليا مدير ديماً يقولي مثل تقريباً كان إنجليزي الليدي تري ولا تسمع أهو أنا بقي فهمت قصدة لما قابلت ليدي ليدي يعني رقة وشياكة وحاجات كتير كدة الواحد يقول ايه ولا ايه         

وكل الناس الحلوة اللي عرفتهم في السنة المبروكة دي وندا الجميلة , منوش اللي ملحقتش اقعد معاها اخرمرة ، بسكوتة اللي هي بسكوتة بجد ، سومة مجنونة في بلد عاقل ، حلم لسه بيعافر ، شفقة وإحسان ، أحمد_ك ، كيمو صوت من مصر
في الآخر لو أتعلمت حاجة عن نفسي من وومن اتعلمت إن قلبي مساكن شعبية يسااااااع من الحبايب ألف بحبكم كلكم بجد لو نسيت حد محدش يزعل مقدرش علي زعل حد بس الذاكرة بقي        

       

  
 

19 قالوا رأيهم:

دعاء مواجهات

كل سنة والمدونة وصحبتها الرقيقه المجنونه بكل خير
وعقبال عيد ميلادها المليوون وتفرحى بعيالها ياارب ..

بحبك
وحشانى اوى..

بطوط حبوب

كل سنه وانتى طيبه يا ميرا

والسنه الجايه تكونى برضه وسطينا ومنوره التدوين علينا

والله يجى منى برضه بعرف اقول شعر :D

Wanda

هابى فالنتين للمدونة
يوووه لا مش جيه
عيد سعيد للمدونة
ايوه كده

ايه ده
انا اسمى مكتوب
انا معملتش حاجة عااااااااااااااااااااااااااااااء
:-)

وممن القلب يساع ماتسعه الروح
شوفى بقى روحك كبيييييييييييييييييييرة ازى
ياه اوعى تعمللها رجيم
:-)

karim

ربنا يدوم عليكى السعادة و زيد من التعلم المفيد,تحياتى

صيدلانيه طالعه نازله

انتى كمان يا جميله من الناس اللى انبسطت انى اتعرفت عليهم فى 2009 وقابلتك كمان الاسبوع اللى فات
صحيح متكلمناش كتير بس باين عليكى انك حد جميل و افكاره حلوه

كل سنه و انتى و المدونه طيبين وبخير

موناليزا

تعرفى انا كنت لسه جاية اهنيكِ بعيد ميلاد مدونتك لانى عارفة ان مدونتى اكبر منها بيوم:)
وكنت هلومك لو ملقتكيش نوهتى عن ده
لان مدونتك ليها حق عليكِ انها تفرح وتشوف كل اللى بيحبوها وهما بيتمنوا لها تقدم دائم

بجد مش عارفة اقولك حاجة غير انى بحبك جدا فى الله
وربنا يعزك ويسعدك وتكونى بينا دايما
وماتبعديش عن مدونتك مهما حصل
لاننا بنبقى عايزينك دايما تمتعينا بكتاباتك المميزة
كل سنة وانتِ ومدونتك بخير
ويارب من سنة لسنة وانتِ فى خير وهنا:)

ملحوظة:بالوناتى تحت امرك لو عايزة تعملى جو عيد الميلاد:)

صفــــــاء

الف الف الف مبروك يا ميرا
وكل سنه ومدونتك جميله زيك ومنورة
ومساكن شعبيه سايعه كل كل حبايبك

انا كمان سعيدة بمعرفتك وبصداقتك
انت بنوته زى العسل وقلبك جمييييل وتتحبى

كل سنه وانت بكل خير

شمس النهار

كل سنة وانتي طيبه ومدونتك طيبه

وشكرا علي مجاملتك اللطيفه
انتي كمان بنوته لطيفه

وبعقل بنوته صحيح ::))

ربنا يسعدك وتحققي كل احلامك

سلامي

الطائر المهاجر

كل مدونة وانت طيبة ياميرا
وعقبال 100 سنة
تدوين إنشاء الله
ووتمتعينا بكتاباتك
وارائك

adel

ايه ده ياخالتي بس :)
بتحرجيني
بس خالتي ايه دي اللي ااقصر مني
P:P:P:
:):):)
يلا مش مهم
وحاضر الشوكولاتات و المصاصات تؤمري يا خالة :)

كل سنة و المدونة طيبة

mostafa rayan

كل سنه وانت طيبه ياميرا
الحمد لله انك اخيرا شهدتِ بالحق انك بردو بتطلعى عينى معاكِ
بس يا ميرا طبعا انت عارفه ان نكشك بالنسبة لي مهمه وطنيه وقوميه وتتدخل في الاقتصاد القومي لمصر يعنى لو انا ماقمتش بالمهمه مين يقوم بيها نجيب منكاش صينى هي البلد ناقصه بضاعه صينى
اه على فكرة شيكولاته عادل بالنص فاتيما اختى انا كمان و اقولك على فكرة تانيه هاتى الشيكولاته وخدي المصاصه مش عايزها
بس يا ميرا رغم النكش اللي بينا انت اكيد عارفه انك عزيزة وغاليه عندي قوى وانك من افضل الاصدقاء اللي اتعرفت عليهم في الفترة السابقه
كل سنه وانت طيبه وبخير يا ميرا يا جميله
ودايما منورة ومبدعه

mostafa rayan

على فكره لو ماكنتش اول تعليق قي البوست الاستثنائي ده هزعل قوي

mostafa rayan

على فكره لو ماكنتش اول تعليق قي البوست الاستثنائي ده هزعل قوي

sookra

;كل سنه والمدونه طيبه وعقبال مائه سنه
وانا زعلانه
بس عادى
هابى فالنتين داى

صوت من مصر

ياه
ههههههههههههه
اخيرا اكتشفت انا ليه دايما بقعد فى اخر الفصل
يا ميرا يدمها عليبكى نعمه

فاتيما

إيه دا ؟؟
انا داخلة ف البوست دا بتلات تنفار

انا و عادل و بسكوتة
عيالى حضرتك

و عندى اخوااااااات كتير ف الأسامى دى برضو زى خالد و داليا و وليد و انتى و عمرو و ... يوووووه دنا كدا هاخد البوست كله

طب بما ان سعادتك قلبك مساكن شعبية انا عاوزة اكبر عمارة وسط المساكن ى عشان تقضى حبايبك و حبايبى


كل سنة و انتى منورة وسطنا يا ميرا
انتى كمان حبيبتى و أختى الصغننة الحلوة

ربنا يفرحنى بيك و اشوفك ست البنات كلهم و العيد الجاى لمدونتك تكونى زى ما بتتمنى و احسن و افرح بيكى و توقعاتى الفلكية تتحققلك ان شاء الله

و ادينا خلصنا من آبى
و يلا الدور عليكى

كل سنة و انتى طيبة
و عيد حب سعيد عليكى يا ميرا
يا اميرة
يا ست البنات

بوسة و حضونة أااااد البحر

حصان المرجيحة

انا ماعرفش ان كان فاتني الجاتو و للا لسة
علي العموم كل سنة و المدونة طيبة ههههه
تقبلي مروري

!!! عارفة ... مش عارف ليه

كل سنة وأنت طيبة ميرا

وإن شاء الله السنة الجاية

تكون مدونتك متألقة أكتر وأكتر


لأنها تستحق منك إهتمام ورعاية

أكتر من كده بكتير


وليد

بنت الاسلام

يااااااااه ياميرا انتي كمان وحشتيني جداااااااااااا مر سنتين زي الهوا لسة فاكرة اول مرة لاقتك فيها علي احدي جروبات الياهو ولسة فكرة اول بوست قريته ليكي انتي كمان وحشتيني جداااااااا سامحيني ان كنت مقصرة في حقك غصب عني لكن عمري مانسيتك ولا هنساكي ابدااااا وكل سنة ومدونتك طيبة ودايما يارب في افضل صحة واحسن حال

تحياتي

Siguiente Anterior Inicio