26

عمرو أبن خالتي

عمرو أبن خالتي أصغر مني ب 6 سنين وجرت العادة في بيوت العيلة أن الأطفال الكبار بياخدو بالهم من اللي أصغر منهم .

كان عمري وقتها حوالي 9 سنين وعمرو مكملش 3 سنين كان عندنا في البيت مناسبة أو عزومة مش فاكرة بالظبط بس البيت كان مشغول وطلعونا كلنا نلعب فوق السطوح علشان يخلصوا من دوشتنا ، المهم بعد شوية أخدت عمرو في إيدي ونزلت ومش فاكرة ليه برضة يمكن هو عيط وكان عاوز مامتة ، يمكن كان عاوز الحمام ، يمكن ساعتها جاع أيا كان السبب فأنا اللي اتطوعت اني أنزل معاه 

وخدتة في ايدي ونزلت وعلي السلم اكتشفت ان في حد ساب باب الشارع مفتوح علي مصراعيه جري عمرو علي الباب وهو بيشدني نخرج الشارع فشيدتة انا وقولتة لا مفيش خروج وسيبت ايده علشان اقفل الباب فحاول يزوغ مني شمال يمين لا مش هاتخرج المهم هو وقتها كان فاكر اني بلعب معاه فخدها جد وهوب راح مزوغ وطالع يجري وانا وراه خرج وقفت انا علي الباب اندهه عمرو... يا عمرو مرضيش يقف وطالع يجري زي الطلقة انا بقي اترعبت مش بس بيجري في الشارع لاء كمان طالع علي شارع البحر - شارع البحر طول عمره طريق سريع حتي قبل الدائري - من كتر خوفي طلعت اجري وراه وانا حافية ومهمنيش ان ماما تزعلقي أو اتعور وطبعاً علشان أتاخرت كان سبقني بكتير طلعت اجري وعمالة انادي عليه عمرو .. اقف يا عمرو وهو عمال يجري وفاكرها لعبة وبيضحك ومش قادرة الحقة بمد إيدي علشان امسكة مش طايلاه وعمال يقرب علي أول الشارع 

طب أعمل ايه اتصرف أزاي ؟؟؟ كنت هاموت من الرعب العربيات رايحة جاية قدامي وهو مش بيقف ومش قادرة امسكه فكرت وقتها في حاجة واحدة 

رميت نفسي عليه بكل قوتي علشان يقع علي الأرض وبسبب ان وزني ساعتها كان قدة مرتين ونص ومع سرعه الجري اتخبطت أنا وهو جامد الناس اتلمت ولقيت حد بيمسكني ويقومني وحد تاني بيقوم عمرو واول موقفت علي رجلي فلت من الناس ومسكت عمرو لقيت وشة مليان دم أتخضيت ومش عارفة اتعور منين الناس بسرعه غسلت وشه واكتشفت ان في إزازة دخلت جنب عينية بمفيش وعمال يعيط المهم حد حطلة منديل عليها واخدتة وروحت بسرعه 

لقتيهم بيدورا علينا وعلي ماروحت المنديل بقي كلة دم ماما أول واحدة شافتني واتخضت قوي ندهلت علي خالتي جت جري 

خالتي أخدت عمرو في حضنها وشالت المنديل تشوف الجرح وماما جابتني من قفايا  إيه اللي خرجك ؟؟ وعملتي في ايه؟؟
 
وانا بقي هاموت ده هو .. هو ياماما اللي جري مني .. والله مكان قصدي
خالتي قالت لماما ناخده علي المستشفي الجرح غويط وبينزف جامد
ماما طب استني شوية يمكن الدم يتجلط
خالتي لا البسي بسرعه هانروح المستشفي
وانا متابعه الحوار وهاموت من الرعب وعماله احلف لخالتي ميت يمين ان هو اللي خرج وبحكي وانا بعيط 

ماما لبست في ثواني وجابت لخالتي عباية وخمار وجري علي المستشفي وسابوني والعيال أخواتي بقي فتحولي تحقيق وأنا خايفة علي عمرو قوي الجرح كان جنب عينية بأقل من أتنين ملي

بعد شوية رجعوا وعمرو واخد غرزتين وطبعاً كلنا اتلمينا حواليهم ماما بصتلنا كلنا وقالتلنا
- اخد غرزتين علشان اشوف حد منكم بس يهوب ناحية الشارع ، ربنا ستر كان ممكن عينية تضيع
خالتي اخدتة علشان تنيمه كان واخد بنج دخلت وراها وانا مش عارفه اقولها ايه؟
- خالتو انا مكنش قصدي يتعور بس خفت من العربيات
خدتني في حضنها وقالتلي أنا عارفة يا حبيبتي قضا أخف من قضي ياخد غرزتين أحسن ما يموت تحت عربية مش زعلانة منك أنتي حاولتي تنقذيه

طبعا عمرو دلوقتي ماشاء الله بقي طول بعرض ويفصل مني أربعه مرتاحين ومن فترة كدة قولتلة انت فاكر الجرح دة ياعمرو قالي لا
فحكتله الحكاية ومكنش مصدق وقالي طب يا ستي أدي اللي بناخده منك وهو بيضحك

دلوقتي لما بفكر في الحكاية بشوف إن صحيح كان قصدي اني أحافظ عليه بس أكيد كان ممكن اتصرف تصرف تاني
كان ممكن اطلب من حد يساعدني
كان ممكن بدل ما افضل انده عليه اقولة حاسب من العربيات وكان هايخاف ويقف
كان ممكن الحقة من بدري لو مكنتش اترددت في الخروج وراه من الاصل
المهم أني لما راجعت الموقف في دماغي عرفت ان ممكن الخوف والتردد يخلينا نجرح حد بنحبة وبنخاف علية

-----------------------------------
علي الهامش

لو قولتلي انك بتعامليني زي بنتك فأكيد عارفة إني بعتبرك أم تانية ليا ، بنتك غلطت وبتعتذرك



  

26 قالوا رأيهم:

سواحة
أزال المؤلف هذا التعليق.
سواحة

و التعليق راح ولا عمله رقابة؟؟
نقول ثانى لو اتكرر نمسح واحد فيهم

كلامك صح

و من الحب ما قتل
:-)
بصى خلى فى بالك الحب برضه بيختبر فى المواقف ده
حيصمد و لا ميصدق يطير ؟

احساس طفلة محبة للرومانسية بس واقعية

المهم أني لما راجعت الموقف في دماغي عرفت ان ممكن الخوف والتردد يخلينا نجرح حد بنحبة وبنخاف علية

الكلمتين دول بالبوست كله مختصرين بس فيهم كتير

الخوف والتردد وكل المشاعر السلبية اكيد ليها مزايا والا مكناش خلقنا بيها وكانت مشاعر فعلا موجودة بس المهم انها متسيطرش علينا وان عقلنا وتفكرنا يكونوا هم الاسرع

الجميل فى البوست انة موقف من مواقف الماضى بس انتى لسة بتفكرى فيه وبتستفيدى منه

دمتى بكل خير
تقبلى مرورى

P A S H A

أسلوبك جامد جداً
عميق وبسيط في نفس الوقت .. مش مجاملة والله !!

" ممكن الخوف والتردد يخلينا نجرح حد بنحبة وبنخاف علية "

مش لاقي تعليق يليق بجمال الجملة

حقيقي سعيد بإني مريت من هنا .

تحيااااااااااااااااتي

:))

سلام

ميرا ( وومن )

Wanda

يا سلام علي التعليقات اللي في الجون هو كده

بلاش الإختبارات دي انا في إختبار صعب وربنا يستر

منوراني بجد

-----------------------------------

احساس طفلة محبة للرومانسية بس واقعية


أول زيارة وأول تعليق والمدونة أتشرفت ونورت

فعلا أكيد ليها مزايا بس لما نبقي محتاجينها في التروي في اتخاذ القرار انما المواقف الصعبة اللي محتاجة قرار فوري لازم نستعدلها

ميرا ( وومن )

P A S H A

منور يا باشا وبجد ميرسي علي الكلمتين الحلوين دول

بجد رفعوا معنوياتي قوي

أنا أسعد بمرور حضرتك

-----------------------------------

الست غير معرف اللي مش هانشر تعليقها

وانا مال أهلي حد قالك اني من بقيت عيلتها ولا وصلك اني قايمة نايمة واكلة شاربة عندها

أظنك عارفة طريق مدونتها روحي أسأليها بنفسك

وبعدين متشغليش بالك قوي كدة بالموضوع ده هي صريحة قوي وواضحة للجميع لو في حاجة هاتقول

وبصراحة كدة مش بالعه كلامك وانك تفرحيلها وكدة

ولو حد قالك ان ميرا دي هابله مثلا ولا بتاكل من الألبنده دي تبقي غلطانة

ياريت ماتسبيش عندي تعليقات من النوع ده تاني

safa7_karmooz

البوست ده جه فى اكتر وقت متردد وخايف اعمل حاجه معينة

عشان كده قررت مترددش اكتر من كده

ميرسى

^_^

موناليزا

ياخبر
كنت قللقانة جدا طول قراءتى
بس الحمدلله قدر ولطف

===
وفعلا ياحبيبتى عندك حق

Baskouta

بوست حلو اوي
حسيت وانا بقراه اني ماشية معاكي وبجري معاكي
وصفك حلو اوي
وخليتيني اعيش معاكي
فعلا انا معاكي كتير الخوف والتردد بيسبب اننا نجرح حد او ممكن كمان نخسر الحد ده
تحياتي البسكوتية

شمس النهار

ماينفعش نقيم موقف حصل وانا عندي 6 سنين بعقليت النهارده


لكن انتي في راي كاطفلة اتصرفتي صح برغم خوفك ورعبك
يعني لو ماكنش في زجاج في الارض كان الموقف عدي خالص ومسكتيه ورجعتي البيت عادي
وكمان كان ممكن كل علقه علي اللي عمله
::))

لكن انا معاكي ان احيانا من شدة الحب بنجرح
عارفة ليه؟
علشان بنخاف نتكلم بصراحة مع بعض ونسمع بعض
بنخاف احنا ننجرح فابتكون النتيجة اننا بنجرح اللي قصدنا
وسوء الفهم بيجي من قلة الحوار

ارجع واقول لو سمعنا بعض كفاية هنفهم بعض صح
هنتصرف مع بعض صح

بوست لطيف

سلامي

صفــــاء

عزيزتى

الطريق الى الجحيم مفروش بالنوايه الحسنه

آخر أيام الخريف

رائعة كالعادة يا وومن.. و حساسة كمان

الأرمـوطــي

فعلا فى ساعات الخطر الواحد مش بيفكر وبيعمل اعمال طايشة انا مرة نسيت طاست زيت على النار وكنت قاعد لوحدى فى الشقة دخلت لقيت الطاسة والبوتجاز كلة مولع وخرطوم الغاز جنب النار بمفيش تخيلى عملت اية جبت جركن مية ودلقتة فى الزيت طبعا حصل انفجار بس الحمد لله طفيت الحريقة وربنا ستر
تحياتى ليكى

VÖltaa

ممكن الخوف والتردد يخلينا نجرح حد بنحبة وبنخاف علية

بجد انا عايش اليومين دول كده
خايف ومتردد
مش عارف اجرح اللى بحبه ولا استمر ولا اعمل ايه

بس حكاية جميلة بجد

تسلم ايدك

VÖltaa

على فكرة انا متابعك من زمان بس مش كنت بعلق كنت بفضل اقرأ وبس
بس قررت اعلق فجأة وانولك الشرف الرفييييع ده
هههههههه
:D

حلم بيعافر

ياخسارة وشك ياعمرو

سببتى للواد عاهة ؟

تلاقيه بيدعى عليكى

المهم كلامك صح لما نحب حد قوى ممكن ناذيه اوى

حزينه

انتى رقيقه اوى

ميرا ( وومن )

safa7_karmooz

لا متترددش يا سفاح التردد مش هايفيد اياً تكن النتيجة أحسن من نكون عمالين نقول طب يمكن طب إحتمال

-----------------------------------

موناليزا

طب أنتي وأنتي بتقري وكنتي قلقانة أنا ساعتها كانت حالتي ايه؟؟

منورة يا جميلة

ميرا ( وومن )

Baskouta

ايوة يعني هاخاف لوحد لازم تبقوا في الصورة

والنبي بلاش تقولي تخسري انا مش حمل خسارة

-----------------

أنهارد في الدقي شوفت بنوته شبهك تمام كنت هاخدها بالحضن

أرق تحياتي يا أرق بسكوتة

-----------------------------------
شمس النهار

عندك حق انا وقتها اتصرف صح بس ممكن حد غيري كان يتصرف تصرف تاني

كلامك صح يا شمس بنخاف ننجرح بنخاف اللي بنحبهم يقسوا علينا

ياريت تبقي شجاعتنا حقيقية ونستحمل الحقيقة
ونسمع بعض

تقبلي أرق تحياتي ومودتي

ميرا ( وومن )

صفــــــاء

صفاء الكلمة دي بتخليني احس بغلطتي اكتر

ربنا عالم النوايا

----------------------------------
آخر أيام الخريف

ده بس من زوقك يا خريف

انا مش حساسة خالص علي فكرة بس حاسة بغلطتي

تحياتي وودي

ميرا ( وومن )

الأرمـوطــي

لا انت كدة غلبتني فجرت المطبخ وكمان طفيت الحريقة

انا علي كدة احمد ربنا
بس الكلام دة وانت كام سنه ؟؟؟ مش معقول يسيبوا طفل يقلي بطاطس

----------------------------------

Mo7ammed

مقدرش أقولك تترف أزاي بس عارف ساعات الجرح بيرح زي ما الأغنية بتقول

بس انت أكتر حد حاسس بموقفك

---------------------------------

Mo7ammed

محمد تاني صفحة التعليقات فعلا اتشرفت بتعليقك

وانا علي فكرة هارشة كل زياراتك بس بتنور المدونة بجد

تحياتي :)))

ميرا ( وومن )

حلم بيعافر

انت جاي تقلب عليا المواجع يا حلم

مهي عدت الحمد لله والواد مش فاكر اصلا

جاي تهدي النفوس ولا ايه؟

:)))

منور

----------------------------------
حزينه

دة بس من رقتك والله كلمتك دي مش عارفه عملت فيا ايه ؟

أشكرك

romansy

الخوف بيعمل فينا اكتر من كده تعرفى الدبه اللى قلت صاحبها علشان خايفه عليه من دبانه على وشه
بس انتى اتصرفتى فى حدود اللى اتوفلك ساعتها
بس كويس انه عمرو مش فاكر وشكله عارف بس انه بياخد منك المشاكل

صوت من مصر

هههههههههههههههههههههه
عارفه ده على هامش فيلم 1000 مبروك
وتانى حاجه
مش عيب اننا نخاف لاننا بشر

الطائر المهاجر

شو احوالك اعتذر عن غيابي الطويل
بجد إدراج جميل يحوي في طياته كثير من المعاني
المهم أني لما راجعت الموقف في دماغي عرفت ان ممكن الخوف والتردد يخلينا نجرح حد بنحبة وبنخاف علية

الخوف طبيعة بشرية خلقت معه لكن للأسف يتم إستخدامها بطريقة خاطئة قد تؤذي الشخص ومن حوله لذالك كان هنا دور العقل اما التردد فهو الأفة التي تبطل العقل وتلغية فلا يستطيع التمييز
صديقتي كلاهما أفتان يجب ان ننتصر عليهما فلا نستطيع أن نقول لولاهما لما كنا عايشين لكن في النهية اقول لو أن الخوف كان سيدمر البشرية لما خلقه الله
لكن بقدر كما قال الله تعالي وخلقنا كل شئ بقدر فيجب علينا أن نزيده أو ننقصة
فالخوف له فوائده ايضاً
وسبحان من شاء فقدر

MaNoOoSh

التردد سبب ضياع حاجات كتير حلوة
دايما بحب جملة ان الخوف احساس مؤقت
لكن الندم باقي

جميل البوست
تسلم ايدك

Siguiente Anterior Inicio